ഖത്തറിലെ എല്എന്ജി ഫാക്ടറിയില് വന്സ്ഫോടനം 54 പേര്ക്ക് പരിക്ക് 18 പേരെ കാണാനില്ല
ഖത്തറിലെ പ്രമുഖ ദ്രവീകൃത പ്രകൃതിവാതക (എല്എന്ജി) പ്രോസസിംഗ് കേന്ദ്രമായ റാസ് ലഫാനിലെ ബാര്സാന് ഗ്യാസ് പ്ലാന്റിലുണ്ടായ വന് സ്ഫോടനത്തില് 54 പേര്ക്ക് പരിക്കേറ്റു. സ്ഫോടനത്തിന് തൊട്ടുപിന്നാലെ 18 പേരെ കാണാതായി. ഇവര്ക്കായി ദുരന്ത നിവാരണ സേനയുടെയും സുരക്ഷാ വിഭാഗങ്ങളുടെയും നേതൃത്വത്തില് പ്രദേശത്ത് ഊര്ജിതമായ തിരച്ചില് പുരോഗമിക്കുകയാണ്
ഞായറാഴ്ച വൈകുന്നേരമാണ് പ്ലാന്റില് വന് സ്ഫോടനവും അതിനെത്തുടര്ന്ന് കനത്ത തീപിടിത്തവുമുണ്ടായത്. രാജ്യത്തെ ആഭ്യന്തര വിപണിയിലേക്ക് ആവശ്യമായ വാതകം വിതരണം ചെയ്യുന്ന പ്രധാന ഇന്ധന സ്രോതസ്സുകളിലൊന്നായ ബാര്സാന്റെ പ്രാദേശിക ഗ്യാസ് സപ്ലൈ പ്ലാന്റിലാണ് വന് അപകടമുണ്ടായത്. പ്ലാന്റിലെ അറ്റകുറ്റപ്പണികള് കഴിഞ്ഞു പതിവ് ഉത്പാദനം പുനരാരംഭിക്കുന്ന ഘട്ടത്തിലുണ്ടായ സാങ്കേതിക തകരാറാണ് സ്ഫോടനത്തിലേക്ക് നയിച്ചത്.
അപകടം സംഭവിച്ച ഉടന് തന്നെ റാസ് ലഫാന് ഇന്ഡസ്ട്രിയല് സിറ്റിയിലെ അത്യാധുനിക അടിയന്തര രക്ഷാസേനയെയും അഗ്നിശമന വിഭാഗങ്ങളെയും പ്ലാന്റിലേക്ക് വിന്യസിച്ചിരുന്നു. മണിക്കൂറുകള് നീണ്ട ദൗത്യത്തിനൊടുവിലാണ് പ്ലാന്റിലെ തീ പൂര്ണമായും നിയന്ത്രണവിധേയമാക്കാന് ഫയര്ഫോഴ്സിന് സാധിച്ചത്. തീ അണച്ചെങ്കിലും തുടര് അപകടങ്ങള് ഉണ്ടാകാതിരിക്കാനുള്ള സുരക്ഷാ പരിശോധനകള് പുരോഗമിക്കുകയാണ്.
തീപിടിത്തത്തിന്റെ വ്യാപ്തിയും സ്ഫോടനത്തിന്റെ തീവ്രതയും കിലോമീറ്ററുകള് അകലെയുള്ള തലസ്ഥാന നഗരമായ ദോഹയില് വരെ അനുഭവപ്പെട്ടതായാണ് പ്രാദേശിക മാധ്യമങ്ങള് റിപ്പോര്ട്ട് ചെയ്യുന്നത്. റാസ് ലഫാന് പ്ലാന്റിന് കിലോമീറ്ററുകള് തെക്കുഭാഗത്തായി സ്ഥിതി ചെയ്യുന്ന ദോഹ നഗരത്തില് പലയിടത്തും ഞായറാഴ്ച വൈകുന്നേരത്തോടെ വലിയൊരു സ്ഫോടന ശബ്ദം കേട്ടതായി പ്രദേശവാസികള് പലരും പറഞ്ഞു.
കാണാതായവര്ക്കായി ഹെലികോപ്റ്ററുകളും ഡ്രോണുകളും ഉപയോഗിച്ചാണ് തിരച്ചില് നടത്തുന്നത്. അപകടത്തില് പരിക്കേറ്റ 54 ജീവനക്കാരെയും റാസ് ലഫാനിലെയും ദോഹയിലെയും ആശുപത്രികളില് പ്രവേശിപ്പിച്ചിരിക്കുകയാണ്. പരിക്കേറ്റവരില് ഭൂരിഭാഗം പേരുടെയും ആരോഗ്യനില തൃപ്തികരമാണ്. പ്രവാസികള് അടക്കുള്ളവര്ക്കാണ് പരിക്കേറ്റത്. വലിയൊരു വിഭാഗം പ്രവാസി തൊഴിലാളികള് ഇന്ധന പ്ലാന്റില് ജോലി ചെയ്യുന്നുണ്ട്.
എന്നാല് അപകടസ്ഥലത്തു നിന്നും മറ്റു സുരക്ഷിത മേഖലകളിലേക്ക് ജീവനക്കാരെ കൃത്യസമയത്ത് മാറ്റിപ്പാര്പ്പിക്കാന് സുരക്ഷാ വിഭാഗത്തിന് സാധിച്ചു. നിലവില് ഫാക്ടറിക്ക് സമീപമുള്ള ജനവാസ മേഖലകള്ക്ക് ആശങ്കപ്പെടേണ്ട സാഹചര്യം ഇല്ലെന്നാണ് ആഭ്യന്തര മന്ത്രാലയം അറിയിച്ചത്. സ്ഫോടനമുണ്ടായ ബാര്സാന് പ്ലാന്റിന്റെ പ്രധാന ഘടനയ്ക്ക് എത്രത്തോളം തകരാറുകള് സംഭവിച്ചു എന്നതിനെക്കുറിച്ച് ഔദ്യോഗിക വിവരങ്ങള് കമ്പനി ഇതുവരെ പുറത്തുവിട്ടിട്ടില്ല.
ഖത്തര് ആഭ്യന്തര ഇന്ധന വിപണിയുടെ നട്ടെല്ലാണ് തകരാറിലായ ബാര്സാന് ഗ്യാസ് കണ്സോര്ഷ്യം. പ്രതിദിനം ഏകദേശം 1.4 ബില്യണ് ക്യുബിക് അടി പ്രകൃതിവാതകം ശുദ്ധീകരിക്കാനും വിതരണം ചെയ്യാനും ശേഷിയുള്ളതാണ് ഈ പ്ലാന്റ്. രാജ്യത്തെ പ്രമുഖ സിമന്റ് നിര്മാണ വ്യവസായ മേഖലകള്ക്കും വന്കിട വൈദ്യുതി ഉത്പാദന നിലയങ്ങള്ക്കും ആവശ്യമായ ഇന്ധനം നല്കുന്നത് പ്രധാനമായും ഈ വിതരണ ശൃംഖല വഴിയാണ്.
സാധാരണ പ്രകൃതിവാതകത്തിന് പുറമെ ഈഥേന്, പ്രകൃതിവാതക കണ്ടന്സേറ്റ്, ദ്രവീകൃത പെട്രോളിയം ഗ്യാസ് (എല്പിജി), ശുദ്ധമായ സള്ഫര് എന്നിവയും ഇവിടെ വന്തോതില് പ്രോസസ്സ് ചെയ്യുന്നുണ്ട്.
https://www.facebook.com/Malayalivartha
