എല്ലാ കലാകാരന്മാരെയും ഒരുമിച്ച് ഓര്ക്കാന് കഴിയുന്ന ഒറ്റ കേന്ദ്രമാണ് വേണ്ടത്; പുതിയ സര്ക്കാര് ഇക്കാര്യം ആലോചിക്കണമെന്ന് സംവിധായകന് കമല്
സലിം കുമാറിന് സ്മാരകം പ്രഖ്യാപിച്ച ബഡ്ജറ്റില്, ഗായകന് ജയചന്ദ്രന്, നെടുമുടി വേണു, ശ്രീനിവാസന്, തിലകന് തുടങ്ങിയ പ്രതിഭകളെ ഓര്ത്തില്ലെന്ന് സംവിധായകന് കമല്. അന്തരിച്ച പ്രമുഖ കലാകാരന്മാര്ക്കായി ഓരോ സ്ഥലത്തും വെവ്വേറെ സ്മാരകങ്ങള് നിര്മിക്കുന്നതിന് പകരം, എല്ലാവര്ക്കുമായി പൊതു സ്മാരകകേന്ദ്രം ഒരുക്കുന്നതിനെക്കുറിച്ച് സര്ക്കാര് ആലോചിക്കണമെന്ന് കമല്. പ്രതിമ നിര്മിച്ചത് കൊണ്ട് ഭാവി തലമുറയ്ക്ക് എന്ത് ഗുണമാണ് ഉള്ളതെന്നും കമല് ചോദിച്ചു. മാദ്ധ്യമപ്രവര്ത്തകരോട് സംസാരിക്കുകയായിരുന്നു അദ്ദേഹം. മുന്പ് താന് ചലച്ചിത്ര അക്കാദമി ചെയര്മാന് ആയിരുന്നപ്പോഴും സിനിമാ കോണ്ക്ലേവിലും ഈ നിര്ദേശം മുന്നോട്ടുവച്ചിരുന്നു. പുതിയ സര്ക്കാര് ഇക്കാര്യം ആലോചിക്കണമെന്നും അദ്ദേഹം പറഞ്ഞു.
'അമ്മ' സംഘടനയിലെ ആഭ്യന്തര പ്രശ്നങ്ങളില് ഇടപെടുന്നില്ലെങ്കിലും അന്സിബയുടെ മതത്തെ മുന്നിര്ത്തി ഉയര്ന്ന 'ജിഹാദി' പരാമര്ശം വെറുമൊരു സംഘടന പ്രശ്നമല്ല മറിച്ച് ഗൗരവമുള്ള സാമൂഹിക പ്രശ്നമാണെന്നും കമല് ചൂണ്ടിക്കാണിച്ചു. തമാശയ്ക്കാണ് പറഞ്ഞതെങ്കില് പോലും ഭാരവാഹികളില് നിന്നും ഇത്തരം വാക്കുകള് വരാന് പാടില്ലായിരുന്നു. അന്സിബ പറയുന്നത് എന്താണെന്ന് കേള്ക്കാന് എല്ലാവരും തയ്യാറാകണമെന്നും കമല് അഭിപ്രായപ്പെട്ടു.
അടുത്തിടെ കേരളത്തില് ഒളിഞ്ഞും തെളിഞ്ഞും സംഘപരിവാര് ആശയങ്ങള് സ്വാധീനം ചെലുത്തുന്നുണ്ടെന്നും അദ്ദേഹം പറഞ്ഞു. ഇതിന്റെ പ്രതിഫലനങ്ങള് മലയാള സിനിമയിലുമുണ്ട്. നമ്മള് ഇഷ്ടപ്പെടുന്ന പല കലാകാരന്മാരും ഇന്ന് പ്രത്യക്ഷ രാഷ്ട്രീയത്തിലുണ്ട്. മലയാള സിനിമ എന്നും നിലനിന്നിട്ടുള്ളത് മതനിരപേക്ഷയിലാണെന്നും ആ മനസ് മലയാളികള്ക്ക് നഷ്ടപ്പെടാന് സിനിമ ഒരിക്കലും കാരണമാകരുതെന്നും അദ്ദേഹം വ്യക്തമാക്കി.
https://www.facebook.com/Malayalivartha
