ഗള്‍ഫ് പ്രതിസന്ധി മൂന്നാഴ്ച പിന്നിട്ടിട്ടും പരിഹാരമാകാതെ തുടരുമ്പോള്‍ സൗദിയും കൂട്ടരും നല്‍കിയ നിബന്ധനകളുടെ പട്ടിക ഖത്തര്‍ ഔദ്യോഗികമായി തള്ളി. സൗദിയും ബഹ്റൈനും യുഎഇയും നല്‍കിയ പട്ടിക അംഗീകരിക്കാനാകില്ലെന്ന് ഖത്തര്‍ വിദേശകാര്യ മന്ത്രി ശൈഖ് മുഹമ്മദ് ബിന്‍ അബ്ദുര്‍റഹ്മാന്‍ അല്‍ഥാനി പറഞ്ഞു. അന്ത്യശാസനം അനുസരിക്കില്ലെന്നും സൗദിക്ക് തങ്ങളുടെ പരാധികാരം അടിയറവ് വയ്ക്കില്ലെന്നും ഖത്തര്‍ പ്രഖ്യാപിച്ചു.

അതേസമയം, ചര്‍ച്ചയ്ക്ക് ഖത്തര്‍ തയ്യാറാണെന്നും അദ്ദേഹം വ്യക്തമാക്കി. നിബന്ധനകളുടെ പട്ടികയിലെ ആവശ്യങ്ങള്‍ അംഗീകരിക്കാന്‍ പ്രയാസമുണ്ട്. അതില്‍ പറയുന്നതെല്ലാം കള്ളമാണെന്നും ഖത്തര്‍ വിദേശ കാര്യമന്ത്രി വിശദീകരിച്ചു. അതിനിടെ ഖത്തറിനെതിരേ ഉപരോധം പ്രഖ്യാപിച്ച സൗദിയെയും കൂട്ടുരാജ്യങ്ങളെയും കോടതി കയറ്റാനുള്ള നീക്കങ്ങള്‍ ഖത്തര്‍ ആരംഭിച്ചിട്ടുണ്ട്. ഖത്തര്‍ ദേശീയ മനുഷ്യാവകാശ കമ്മീഷനാണ് (എന്‍എച്ച്ആര്‍സി) ഇതിനുള്ള ശ്രമം തുടങ്ങിയത്. ഇവര്‍ സ്വിറ്റ്സര്‍ലാന്റിലെ നിയമ കമ്പനിയുടെ സഹകരണം ആവശ്യപ്പെട്ടിട്ടുണ്ട്.

കൂടുതല്‍ സാമ്പത്തിക ഉപരോധം പ്രഖ്യാപിക്കുമെന്ന് യുഎഇ മുന്നറിയിപ്പും നല്‍കി. ഗള്‍ഫ് പ്രതിസന്ധി കൂടുതല്‍ രൂക്ഷമാകുമെന്ന സൂചനയാണിപ്പോള്‍ ലഭിക്കുന്നത്. മേഖലയിലെ എല്ലാ പ്രശ്നങ്ങളും ചര്‍ച്ച ചെയ്തു പരിഹാരം കാണാന്‍ ഖത്തര്‍ തയ്യാറാണ്. എന്നാല്‍ സൗദിയും യുഎഇയും ബഹ്റൈനും സമര്‍പ്പിച്ച 13 ഇന നിര്‍ദേശങ്ങള്‍ എല്ലാം വ്യാജമാണ്. യാഥാര്‍ഥ്യവുമായി നിരക്കാത്ത കാര്യങ്ങളാണ് അതില്‍ പറയുന്നതെന്നും വിദേശകാര്യ മന്ത്രി പറഞ്ഞു.

അല്‍ ജസീറ അടച്ചുപൂട്ടണം, ഇറാന്‍ ബന്ധം ഒഴിവാക്കണം തുടങ്ങി 13 കാര്യങ്ങളാണ് പട്ടികയിലുള്ളത്. പത്ത് ദിവസത്തിനകം പ്രതികരണം അറിയിക്കണമെന്നായിരുന്നു ഈ രാജ്യങ്ങളുടെ നിബന്ധന. ഈ സമയപരിധി ഞായറാഴ്ചയാണ് അവസാനിക്കുക.