മക്കയില്‍ നിന്ന് മലയാളി ഹാജിമാരുടെ അവസാന സംഘം മദീനയിലേക്ക് തിരിച്ചു. രണ്ട് പേര്‍ മക്കയിലെ ആശുപത്രികളില്‍ ചികില്‍സയിലാണ്. ഇതിലൊരാള്‍ കോഴിക്കോട് സ്വദേശിയാണ്. 310 തീര്‍ഥാടകരാണ് അവസാന സംഘത്തിലുണ്ടായിരുന്നത്.

ഇന്ത്യയില്‍ നിന്നുള്ള അവസാന സംഘം ചൊവ്വാഴ്ച മക്ക വിടും. ഇതോടെ ഈ വര്‍ഷം സര്‍ക്കാര്‍ ഹജ്ജ് കമ്മിറ്റികള്‍ മുഖേന എത്തിയ തീര്‍ഥാടകര്‍ മക്കയോട് വിടപറയും. 1,24,882 പേരാണ് ഇത്തവണ ഇന്ത്യയില്‍ നിന്ന് സര്‍ക്കാര്‍ കമ്മിറ്റികള്‍ വഴി എത്തിയത്.

ആറ് സ്ത്രീകള്‍ ഹജ്ജിന് എത്തിയ ശേഷം പ്രസവിച്ചു. 190 ഓളം പേര്‍ മരിച്ചു. സ്വകാര്യഗ്രൂപ് വഴി വന്നവര്‍ നേരത്തെ മടങ്ങി. കേരളത്തില്‍ നിന്ന് 23 കുട്ടികളടക്കം 11807 പേരാണ് സര്‍ക്കാര്‍ ക്വാട്ടയില്‍ എത്തിയത്. ഇതില്‍ 305 പേര്‍ ലക്ഷദ്വീപില്‍ നിന്നും 35 പേര്‍ മാഹിയില്‍ നിന്നുമാണ്.