മസ്‌ക്കറ്റില്‍ നാലിനം ഹെര്‍ബല്‍ മരുന്ന് ഉല്‍പന്നങ്ങളുടെ വിപണനം നിരോധിച്ചതായി ആരോഗ്യമന്ത്രാലയം അറിയിച്ചു. ഷാര്‍ക്ക് എക്‌സ്ട്രാറ്റ് ടാബ്‌ലെറ്റ്‌സ്, വിമാക്‌സ് കാപ്‌സൂള്‍സ്, കാമാഗ്ര ഓറല്‍ ജെല്ലി, ഡ്രാഗണ്‍ ഡിലേ സ്‌പ്രേ എന്നിവയുടെ വില്‍പനക്കാണ് നിരോധം ഏര്‍പ്പെടുത്തിയതെന്ന് മന്ത്രാലയത്തിലെ ഫാര്‍മസി ആന്‍ഡ് ഡ്രഗ് കണ്‍ട്രോള്‍ വിഭാഗം ഡയറക്ടര്‍ ജനറല്‍ ഡോ. മുഹമ്മദ് അല്‍ റുബായി അറിയിച്ചു.

ഹൃദയാഘാതത്തിനും മരണത്തിനും വരെ കാരണമായേക്കാവുന്ന രാസവസ്തു ഇവയില്‍ അടങ്ങിയതാണ് നിരോധത്തിന് കാരണം. പ്രകൃതിദത്ത ഹെര്‍ബല്‍ ഉല്‍പന്നങ്ങള്‍ എന്ന് പറഞ്ഞാണ് ഇവ വിപണനം നടത്തുന്നത്. എന്നാല്‍, ലബോറട്ടറി തല പരിശോധനയില്‍ മരുന്നിന്റെ കൂട്ടില്‍ രാസവസ്തുവിന്റെ സാന്നിധ്യം ഉള്ളതായി കണ്ടെത്തി. ഇവയുടെ ഒപ്പമുള്ള ലീഫ്‌ലെറ്റിലും മറ്റും രാസവസ്തുവിന്റെ സാന്നിധ്യം പ്രതിപാദിച്ചിട്ടില്ല. ഇത് വാണിജ്യതട്ടിപ്പിന്റെ പരിധിയില്‍ ഉള്‍പ്പെടുത്താവുന്ന വിഷയമാണെന്നും ഡോ. മുഹമ്മദ് അല്‍ റുബായി പറഞ്ഞു.
സ്ലൈഡ്‌നാഫില്‍ എന്ന രാസവസ്തുവിന്റെ സാന്നിധ്യമാണ് മൂന്ന് ഉല്‍പന്നങ്ങളില്‍ കണ്ടെത്തിയത്. വയാഗ്രയില്‍ ഉപയോഗിക്കുന്ന രാസവസ്തുവാണ് സ്ലൈഡന്‍ഫെല്‍. ഒന്നിലധികം പാര്‍ശ്വഫലങ്ങള്‍ക്ക് ഇടയാക്കുന്നതാണ് ഈ രാസവസ്തു. ഒപ്പം ചിലതരം ഹൃദ്രോഗങ്ങള്‍ക്ക് മരുന്നുകള്‍ ഉപയോഗിക്കുന്നവരാണെങ്കില്‍ ഇത് ഗുരുതരമായ പ്രതിപ്രവര്‍ത്തനത്തിനും കാരണമാകും.

നൈട്രേറ്റ്‌സ് അടങ്ങിയ മരുന്നുകള്‍ കഴിക്കുന്ന ഹൃദ്രോഗികള്‍ ഈ രാസവസ്തു അടങ്ങിയ മരുന്ന് കഴിക്കുന്ന പക്ഷം രക്തസമ്മര്‍ദം കുറയാനും ഹൃദയാഘാതത്തിനും മരണത്തിനും വരെ കാരണമാവുകയും ചെയ്യും. അതിനാല്‍, ഏറ്റവും അപകടകരമായ വഞ്ചനകളില്‍ ഒന്നായാണ് ഇതിനെ കാണുകയെന്നും ഡയറക്ടര്‍ ജനറല്‍ പറഞ്ഞു.

സുരക്ഷിതമല്ലാത്തതും വിശ്വസിക്കാന്‍ കൊള്ളാത്തതുമായ മരുന്നുകള്‍ ഉപയോഗിക്കുന്നതില്‍നിന്ന് ജനങ്ങള്‍ വിട്ടുനില്‍ക്കണമെന്നും അദ്ദേഹം പറഞ്ഞു. ഇത്തരം മരുന്നുകളെ കുറിച്ച് അറിവ് പകരാന്‍ മന്ത്രാലയത്തിന്റെ വെബ്‌സൈറ്റില്‍ ഒരു പേജ് നീക്കിവെച്ചിട്ടുണ്ട്. ഒമാനില്‍ വിതരണം നിരോധിച്ച മരുന്നുകളെ കുറിച്ച വിവരങ്ങള്‍ ചിത്രസഹിതം  moh.gov.om/ar_OM/web/dgpadc/-10 എന്ന വെബ്‌പേജില്‍ ലഭ്യമാണെന്നും അദ്ദേഹം കൂട്ടിച്ചേര്‍ത്തു.