ദുബായ് അന്താരാഷ്ട്ര വിമാനത്താവളത്തില്‍ അത്യാധുനിക സംവിധാനങ്ങളോടു കൂടിയ റോബോട്ടുകൾ എത്തുമെന്നാണ് പുതിയ റിപ്പോർട്ടുകൾ. സംശയകരമായ വ്യക്തികള്‍, പ്രവൃത്തികള്‍, സാധനങ്ങള്‍ തുടങ്ങിയവ കണ്ടെത്തി നിമിഷങ്ങൾക്കുള്ളിൽ തന്നെ കണ്‍ട്രോള്‍ റൂമില്‍ വിവരമറിയിക്കാന്‍ കഴിവുള്ള റോബോട്ടുകളെയാണ് നിർമ്മിച്ചിരിക്കുന്നത്.

അറബ് ഇന്നോവേഷന്‍ ഫോറത്തിലാണ് ദുബായ് കസ്റ്റംസ് തങ്ങളുടെ ഏറ്റവും പ്രധാനപ്പെട്ട കണ്ടുപിടുത്തമെന്ന നിലയില്‍ ഇത്തരത്തിലൊരു റോബോട്ടിനെ പ്രദര്‍ശിപ്പിച്ചിരിക്കുന്നത്. ഇത്തരം റോബോട്ടുകളുടെ പരീക്ഷണാര്‍ഥത്തിലുള്ള ഉപയോഗം വിജയകരമായി പര്യവസാനിച്ചെന്നു ദുബായ് കസ്റ്റംസ് ഇനൊവേഷന്‍ സെന്ററിലെ സ്പെഷ്യലിസ്റ്റ് ഖാലിദ് അല്‍ സറൂനി പറഞ്ഞു.

വിമാനത്താവളത്തിന്റെ അറൈവല്‍ സെക്ഷനിലായിരിക്കും ഇതിനെ സ്ഥാപിക്കുക. മനുഷ്യരേക്കാള്‍ കൃത്യതയോടെ കാര്യങ്ങള്‍ നിരീക്ഷിച്ചു മനസ്സിലാക്കാനാവും എന്നതാണ് ഇത്തരം റോബോട്ടുകളുടെ പ്രധാന സവിശേഷത.

ആളുകളുടെ മുഖം തിരിച്ചറിയാനും എക്സ്റേ സ്കാനിംഗ് നടത്താനും തെര്‍മല്‍ ഇമേജിംഗിനുമുള്ള പ്രോഗ്രാമുകള്‍ ഉള്‍ക്കൊള്ളുന്ന തലച്ചോറാണ് റോബോട്ടിനുള്ളത്. ഈ സംവിധാനങ്ങളുടെ സഹായത്തോടെ വിവരങ്ങൾ ശേഖരിച്ച് സ്കാൻ ചെയ്യുന്ന വ്യക്തികൾക്കോ സാധനങ്ങൾക്കോ എന്തെങ്കിലും കുഴപ്പമുണ്ടെങ്കിൽ അത് എത്രയും വേഗം തന്നെ കണ്‍ട്രോള്‍ റൂമിന് കൈമാറുകയാണ് ചെയ്യുക.

ഇതുകൂടാതെ അംഗപരിമിതരായ യാത്രക്കാര്‍ക്കായി പ്രത്യേകം സംവിധാനം ചെയ്ത സ്മാര്‍ട്ട് വാഹനമാണ് പ്രദര്‍ശനത്തില്‍ ഉള്‍പ്പെടുത്തിയിരിക്കുന്ന മറ്റൊരു പ്രധാന കണ്ടുപിടുത്തം. അംഗപിരിമിതിയുള്ളവര്‍ക്ക് ബുദ്ധിമുട്ടില്ലാതെ കസ്റ്റംസ് ക്ലിയറന്‍സ് ലഭ്യമാക്കാന്‍ സഹായിക്കുന്നതാണ് ഈ സ്മാര്‍ട്ട് വാഹനം.

ദുബായ് വിമാനത്താവളത്തിലെ മൊബൈല്‍ ഇന്‍സ്പെക്ഷന്‍ വെഹിക്കിളാണ് മറ്റൊരു പ്രധാന കണ്ടുപിടുത്തം. ഇന്റര്‍പോളിന്റെ ഡാറ്റാബേസുമായി ബന്ധപ്പെടുത്തിയ ആളുകളുടെ മുഖം തിരിച്ചറിയാനുള്ള ഉപകരണമാണിത്. ഇന്റര്‍പോള്‍ തെരയുന്ന ഒരാള്‍ ഇതിനു മുൻപിൽ എത്തിയാല്‍ നിമിഷങ്ങള്‍ക്കകം തന്നെ വിവരം കണ്‍ട്രോള്‍ റൂമിനെ അറിയിക്കാന്‍ ഇത്തരം ഉപകരണത്തിന് കഴിയും.