അബുദാബി: ഇന്ധനങ്ങളിലെ മായം കണ്ടെത്താൻ പുത്തൻ യന്ത്രവുമായി യുണൈറ്റഡ്​ അറബ്​ എമിറേറ്റ്​സ്​ യൂണിവേഴ്​സിറ്റിയിലെ (യു.എ.ഇ.യു) ഗവേഷകർ രംഗത്തെത്തിയിരിക്കുകയാണ്. നീണ്ട ഒന്നര വർഷത്തെ പരിശ്രമം കൊണ്ടാണ് പുതിയ സാങ്കേതിക വിദ്യ യാഥാർത്ഥ്യമായത്​.

ഇതോടെ ഇന്ധനത്തിലെ ഏത്​ തരം മാലിന്യവും കണ്ടെത്താനാകുമെന്ന്​ ശാസ്​ത്രജ്ഞർ പറയുന്നു. ഇന്ധനത്തിൽ മാലിന്യം കലരുന്നതു മൂലമുള്ള ബുദ്ധിമുട്ടുകൾ രണ്ട്​ വർഷം മുമ്പ്​ ഫ്രാൻസിലെ ഒരു വിമാനക്കമ്പനി ഉദ്യോഗസ്​ഥരാണ്​ സർവകലാശാലയുടെ ശ്രദ്ധയിൽപെടുത്തിയത്​.

ഇൗർപ്പം കലരുക, വെള്ളത്തിന്റെ അംശം ഉണ്ടാവുക എന്നിവക്ക്​ പുറമെ പൂപ്പലും ബാക്​ടീരിയയും ഉണ്ടാവുന്നതും ഇന്ധനത്തിന്റെ നിലവാരം കുറക്കും. ഇന്ധനത്തിൽ ബാക്​ടീരിയകളും മറ്റും വളരില്ലെന്നാണ്​ മുമ്പ്​ കരുതിയിരുന്നതെങ്കിലും ഇത്​ ശരിയല്ലെന്ന്​ ശാസ്​ജ്ഞ്രർ പറയുന്നു. ഇവ ഇന്ധസംഭരണികൾക്കും എഞ്ചിനിലെ ഘടകങ്ങൾക്കും തകരാർ വരുത്തുമെന്ന്​ സർവകലാശാല ഇലക്​ട്രിക്​ എഞ്ചിനീയറിങ്​ വിഭാഗത്തിലെ അസോസിയേറ്റ്​ പ്രൊഫസർ ഡോ. റഷാദ്​ റംസാൻ പറഞ്ഞു.

വിമാനങ്ങളുടെ ചിറകുകളിലാണ്​ ഇന്ധന ടാങ്ക്​ ഘടിപ്പിച്ചിരിക്കുന്നത്​. ഇവ ദ്രവിക്കുകയും മാറ്റിവെക്കേണ്ടിവരികയും ചെയ്യുന്നത്​ വൻ പണച്ചിലവിന്​ ഇടയാക്കും. ഇൗ സാഹചര്യത്തിൽ പുതിയ കണ്ടുപിടിത്തം സുപ്രധാനമാണെന്ന്​ അദ്ദേഹം ചൂണ്ടിക്കാട്ടി. ഉപകരണത്തിന്റെ പേറ്റന്റ് നടപടികൾ പുരോഗമിക്കുകയാണെന്നും ഇദ്ദേഹം അറിയിച്ചു.