തായ്‌ലന്‍ഡില്‍ കനത്ത മഴക്കിടെ ഗുഹയില്‍ അകപ്പെട്ട 13 പേരെ ഒമ്പതു ദിവസത്തിനു ശേഷം ജീവനോടെ കണ്ടെത്തി. ഫുട്ബാള്‍ താരങ്ങളായ 12 കുട്ടികളെയും സഹ പരിശീലകനെയുമാണ് ദിവസങ്ങള്‍ക്ക് ശേഷം കണ്ടെത്തിയത്. പ്രവിശ്യ ഗവര്‍ണറാണ് തിങ്കളാഴ്ച വൈകീട്ട് ഇക്കാര്യം സ്ഥിരീകരിച്ചത്.

ചിയാങ് റായിലെ താം ലുവാങ് ഗുഹയിലാണ് 13 പേര്‍ അകപ്പെട്ടിരുന്നത്. കനത്ത മഴ കാരണം വെള്ളം ഉയര്‍ന്നതോടെ പുറത്തുവരാന്‍ കഴിയാതെ കുടുങ്ങുകയായിരുന്നു. 10 കി.മീറ്ററിലേറെവരുന്ന ഗുഹയില്‍ ചളി നിറഞ്ഞത് നേരത്തെ രക്ഷാപ്രവര്‍ത്തനത്തിന് തടസ്സം സൃഷ്ടിച്ചിരുന്നു. എന്നാല്‍, മല തുരന്ന് ഗുഹയിലേക്ക് മറ്റൊരു വഴിതുറന്ന് നടത്തിയ രക്ഷാപ്രവര്‍ത്തനമാണ് വിജയത്തിലെത്തിയത്. ജൂണ്‍ 23നാണ് സംഘം ഇവിടെ സന്ദര്‍ശനത്തിനെത്തിയത്. കുട്ടികള്‍ 11നും 16നും ഇടയില്‍ പ്രായമുള്ളവരാണ്. 25കാരനായ സഹ പരിശീലകന്‍ കുട്ടികളെ നേരത്തെയും ഇവിടെ സന്ദര്‍ശനത്തിന് കൊണ്ടുവന്നിരുന്നു.

ഈ പരിചയത്തില്‍ ഇവര്‍ ഗുഹയുടെ സുരക്ഷിത ഭാഗങ്ങളില്‍ കഴിയുകയായിരുന്നെന്നാണ് കരുതപ്പെടുന്നത്.'മൂ പാ' ഫുട്ബാള്‍ ക്ലബിലെ അംഗങ്ങളാണ് അപകടത്തില്‍പെട്ടവരെല്ലാം. 1000ത്തിനടുത്തുവരുന്ന തായ് നാവികസേന വിദഗ്ധര്‍ക്കൊപ്പം യു.എസ്, ആസ്‌ട്രേലിയ, ചൈന, ജപ്പാന്‍ എന്നീ രാജ്യങ്ങളും രക്ഷാപ്രവര്‍ത്തനത്തില്‍ വളരെയധികം സഹകരിച്ചിരുന്നു.