തായ്‌ലന്‍ഡിലെ താം ലുവാങ് ഗുഹാ സമുച്ചയത്തില്‍ പത്തുദിവസം മുമ്പ് അകപ്പെട്ട 12 ഫുട്‌ബോള്‍ കളിക്കാരെയും അവരുടെ കോച്ചിനെയും പുറത്തെത്തിക്കുന്നതിനുള്ള പ്രവര്‍ത്തനങ്ങള്‍ മാസങ്ങള്‍ നീളുമെന്നു റിപ്പോര്‍ട്ട്. രക്ഷാപ്രവര്‍ത്തകരാണ് ഇതു സംബന്ധിച്ചു സൂചന നല്‍കിയത്.
ഗുഹയ്ക്കുള്ളില്‍ കഴിയുന്നവര്‍ക്ക് നാലു മാസത്തെ ഭക്ഷണവും നീന്തല്‍ പരിശീലനവും നല്‍കാനാണു രക്ഷാപ്രവര്‍ത്തകര്‍ പദ്ധതിയിടുന്നത്. ഉയര്‍ന്ന കലോറിയുള്ള ജെല്ലുകള്‍, പാരസെറ്റാമോള്‍ എന്നിവ രക്ഷാപ്രവര്‍ത്തന നടക്കുന്ന സ്ഥലത്ത് എത്തിച്ചിട്ടുണ്ട്. ഗുഹയില്‍ അകപ്പെട്ട മൂപാ( വൈല്‍ഡ് ബോര്‍) ഫുട്‌ബോള്‍ ടീമിലെ 13 പേരെയും കഴിഞ്ഞ ദിവസം സുരക്ഷിതരായി കണ്ടെത്തിയിരുന്നു. വെള്ളം നിറഞ്ഞ ഗുഹയില്‍നിന്ന് ഇവരെ പുറത്തുകൊണ്ടുവരാന്‍ രക്ഷാപ്രവര്‍ത്തകര്‍ ശ്രമം തുടരുകയാണ്.

ജൂണ്‍ 23നാണു വിനോദയാത്രയ്ക്ക് എത്തിയ സംഘം ഗുഹയ്ക്കുള്ളില്‍ കടന്നത്. നേരത്തെയും ഈ ഗുഹയില്‍ വന്നിട്ടുള്ളവരാണു മിക്കവരും. പതിനൊന്നു വയസു മുതല്‍ പതിനാറു വയസുവരെയുള്ള ആണ്‍കുട്ടികളാണു ടീമിലുള്ളത്. പരിശീലകന് 25 വയസുണ്ട്. കനത്ത മഴയെത്തുടര്‍ന്ന് ഗുഹയുടെ പ്രവേശനകവാടം വെള്ളത്തില്‍ മൂടി.

ഏറെ ദൈര്‍ഘ്യമുള്ള ഗുഹയ്ക്കുള്ളിലെ ഏതാനും ഭാഗങ്ങളിലും വെള്ളം കയറി. മുങ്ങല്‍ വിദഗ്ധര്‍ രക്ഷാപ്രവര്‍ത്തനം ആരംഭിച്ചെങ്കിലും ജലനിരപ്പ് ഉയര്‍ന്നുകൊണ്ടേയിരുന്നതിനാല്‍ പലവട്ടം പിന്‍വാങ്ങേണ്ടിവന്നു.
കഴിഞ്ഞ ദിവസം മലതുരന്ന് തുരങ്കമുണ്ടാക്കി ഭക്ഷണവും മരുന്നും അടങ്ങിയ കിറ്റുകള്‍ ഇട്ടുകൊടുത്തെങ്കിലും കുട്ടികള്‍ ഉള്ള ഭാഗത്താണോ കിറ്റുകള്‍ വീണതെന്നു വ്യക്തമല്ല.

രണ്ടുദിവസം മുന്പ് ജലനിരപ്പ് താണതിനെത്തുടര്‍ന്ന് രക്ഷാപ്രവര്‍ത്തനം ഊര്‍ജിതമാക്കുകയായിരുന്നു. യുഎസ് പസഫിക് കമാന്‍ഡിലെ സൈനികരും തായ് നാവികസേനയും ഓസ്‌ട്രേലിയ, ചൈന, ജപ്പാന്‍ എന്നിവിടങ്ങളില്‍നിന്നുള്ള വിദഗ്ധരും നേതൃത്വം നല്‍കിയ തെരച്ചിലിന് ഒടുവിലാണു സംഘാംഗങ്ങള്‍ ജീവനോടെയുണ്ടെന്നു മനസിലായത്.