തായ്‌ലന്‍ഡിലെ ഗുഹയില്‍ കുടുങ്ങിയ കുട്ടികളെയും ഫുട്‌ബോള്‍ കോച്ചിനെയും രക്ഷിക്കാനുള്ള ശ്രമങ്ങള്‍ ഊര്‍ജിതമായി തുടരുന്നതിനിടെ കോച്ച് കുട്ടികളുടെ രക്ഷിതാക്കളോട് മാപ്പു ചോദിച്ചുകൊണ്ട് എഴുതിയ കുറിപ്പ് നാവിക ഉദ്യോഗസ്ഥര്‍ പുറത്തു വിട്ടു. എക്കപോള്‍ ചന്ദോങ് എന്ന 25 കാരന്‍ ഫുട്‌ബോള്‍ കോച്ചാണ് സംഘത്തിലെ മുതിര്‍ന്ന അംഗം. 11 മുതല്‍ 16 വരെ പ്രായമുള്ള കുട്ടികളാണ് സംഘത്തിലെ മറ്റ് 12 പേര്‍.

കഴിഞ്ഞ ദിവസം കോച്ച് രക്ഷാ പ്രവര്‍ത്തകരുടെ കൈവശം കൊടുത്തയച്ച കുറിപ്പിലാണ് മാപ്പപേക്ഷയുള്ളത്. ഇന്നാണ് തായ് നേവി അത് ഫേസ്ബുക്കിലൂടെ പ്രസിദ്ധീകരിച്ചത്. 'എല്ലാ രക്ഷിതാക്കളും അറിയാന്‍, കുട്ടിളെല്ലാവരും നിലവില്‍ സുരക്ഷിതരാണ്. കുട്ടികളെ നന്നായി സംരക്ഷിക്കുമെന്ന് ഞാന്‍ ഉറപ്പു നല്‍കുന്നു. എല്ലാവരും നല്‍കുന്ന ധാര്‍മിക പിന്തുണക്ക് നന്ദി. കുട്ടികളുടെ രക്ഷിതാക്കളോട് മാപ്പു ചോദിക്കുന്നു. മുത്തശ്ശിയും ആന്റിയും വിഷമിക്കരുത്. ഞാനിവിടെയുണ്ട്.'' കുറിപ്പില്‍ പറയുന്നു.

കാച്ച് എഴുതിയ കുറിപ്പ്

കുറിപ്പ് പ്രസിദ്ധീകരിച്ചതോടെ സമൂഹ മാധ്യമങ്ങളില്‍ കോച്ചിനെ അനുകൂലിച്ചും വിമര്‍ശിച്ചും നിരവധി പേര്‍ പ്രതികരണങ്ങളുമായി എത്തി. തന്റെ ഭക്ഷണം കുട്ടികള്‍ക്ക് പങ്കുവെച്ച് കൊടുക്കുകയും ഒമ്പതു ദിവസത്തോളം കുട്ടികള്‍ക്ക് ആ ഇരുട്ടില്‍ തുണയാവുകയും ചെയ്ത കോച്ചിനെ പലരും അഭിനന്ദിച്ചു.

എന്നാല്‍, മഴക്കാലത്ത് കുട്ടിളെ ഗുഹയിലേക്ക് കൊണ്ടുപോയതിന് മറ്റു പലരും വിമര്‍ശിക്കുകയും ചെയ്തു. അതേസമയം, സംഘത്തെ രക്ഷിക്കാനുള്ള ശ്രമങ്ങള്‍ ഊര്‍ജിതമായി തുടരുകയാണ്. കഴിഞ്ഞ ദിവസം ഗുഹയില്‍ ഓക്‌സിജന്‍ എത്തിക്കാനുള്ള ശ്രമത്തിനിടെ രക്ഷാ പ്രവര്‍ത്തകരിലൊരാള്‍ ശ്വാസം കിട്ടാതെ മരിച്ചത് ആശങ്ക ഉയര്‍ത്തിയിട്ടുണ്ട്.

ഗുഹയില ഓക്‌സിജന്റെ അളവ് കുറയാനുള്ള സാധ്യതയും അതിശക്തമായ മഴക്കുള്ള സാധ്യതയും രക്ഷാ പ്രവര്‍ത്തനത്തെ തടസപ്പെടുത്തുന്നുണ്ട്. ഗുഹയിലെ വെള്ളം പമ്പ് ചെയ്ത് ഒഴിവാക്കാന്‍ ശ്രമിക്കുന്നുണ്ടെങ്കിലും ശക്തമായ മഴ പെയ്യുന്നതു മൂലം ജലനിലരപ്പ് വീണ്ടും ഉയരുന്നതും ആശങ്കക്കിടവെക്കുന്നു. എത്രയും പെട്ടെന്ന് കുട്ടികളെ രക്ഷിക്കുന്നതിനു വേണ്ട ശ്രമങ്ങളാണ് നടക്കുന്നത്.