12 വയസ്സുള്ള പെണ്‍കുട്ടിയെ മൂന്നു മാസത്തോളം ശാരീരികമായി ചൂഷണം ചെയ്തതിന് ഇന്ത്യക്കാരന് സിംഗപ്പൂരില്‍ 13 വര്‍ഷം തടവും 12 ചൂരല്‍ അടിയും ശിക്ഷ. 2016-ല്‍ പ്രായപൂര്‍ത്തിയാകാത്ത പെണ്‍കുട്ടിയെ പീഡിപ്പിച്ച കേസില്‍ ഉദയകുമാര്‍ ദക്ഷിണാമൂര്‍ത്തി എന്ന 31-കാരന്‍ ആണ് ശിക്ഷിക്കപ്പെട്ടത്.

ശക്തമായ വകുപ്പുകളാണ് പ്രതിക്കെതിരെ ചുമത്തിയത്. പെണ്‍കുട്ടിയുടെ കളങ്കമില്ലാത്ത മനസും നിഷ്‌കളങ്കതയും ചൂഷണം ചെയ്താണ് ദക്ഷിണാമൂര്‍ത്തി കൃത്യം നടത്തിയതെന്ന് പാങ് കാങ് ചാവ് ഹൈക്കോടതി ജുഡീഷ്യല്‍ കമ്മിഷണര്‍ വ്യക്തമാക്കി.

പെണ്‍കുട്ടിക്ക് ഇയാള്‍ സമ്മാനങ്ങള്‍ നല്‍കിയിരുന്നു. 'ഭാര്യ' എന്നാണ് 12-കാരിയെ ഇയാള്‍ വിളിച്ചിരുന്നതെന്നും വിവാഹം കഴിക്കാന്‍ താല്‍പര്യമുണ്ടെന്നു പറഞ്ഞാണ് പീഡിപ്പിച്ചതെന്നും മാധ്യമങ്ങള്‍ റിപ്പോര്‍ട്ട് ചെയ്തു. താനുമായി ലൈംഗിക ബന്ധത്തില്‍ ഏര്‍പ്പെടണമെന്ന് ആവശ്യപ്പെട്ടപ്പോള്‍ തനിക്ക് അതിനെ പറ്റി ഒന്നും അറിയില്ലെന്ന് പെണ്‍കുട്ടി പ്രതിയോട് പറഞ്ഞു. എന്നാല്‍ പഠിപ്പിച്ചുതരാമെന്ന് പറഞ്ഞായിരുന്നു ഇയാള്‍ കുട്ടിയെ ചൂഷണം ചെയ്തതെന്ന് ദേശീയമാധ്യമങ്ങള്‍ റിപ്പോര്‍ട്ട് ചെയ്തു.

മിനിമാര്‍ട്ടിലാണ് പ്രതി ജോലി ചെയ്തിരുന്നത്. ഇവിടെ നിന്നും കുട്ടിക്ക് സൗജന്യമായി സാധനങ്ങളെടുക്കാനും ഉദയകുമാര്‍ അനുവാദം നല്‍കിയിരുന്നു. ഇയാളുടെ പുതിയ കാമുകി ഫോണ്‍പരിശോധിച്ചപ്പോള്‍ 12-കാരിയുടെ ദൃശ്യങ്ങള്‍ കാണുകയും യുവതി പൊലീസില്‍ അറിയിക്കുകയുമായിരുന്നു. സ്‌കൂള്‍ യൂണിഫോമിലുള്ള പെണ്‍കുട്ടിയുടെ ദൃശ്യങ്ങളാണ് ഇതില്‍ ഉണ്ടായിരുന്നത്. തുടര്‍ന്ന് പൊലീസ് അറസ്റ്റ് രേഖപ്പെടുത്തുകയും കോടതിയില്‍ ഹാജരാക്കുകയും ചെയ്തു.

ചോദ്യം ചെയ്യലില്‍ ഫ്‌ലാറ്റിലെ സ്‌റ്റെയര്‍കേസിനു സമീപത്തുവച്ചാണ് ആദ്യം പെണ്‍കുട്ടിയെ ചൂഷണം ചെയ്തതെന്ന് പ്രതി സമ്മതിച്ചു. പെണ്‍കുട്ടിയുടെ നഗ്‌നചിത്രങ്ങള്‍ അയച്ചുതരാന്‍ ഇയാള്‍ ആവശ്യപ്പെട്ടിരുന്നുവെന്നും റിപ്പോര്‍ട്ടില്‍ പറ!യുന്നു. പെണ്‍കുട്ടിക്കൊപ്പം ഇയാള്‍ പല സ്ഥലങ്ങളില്‍ പോവുകയും സമ്മാനങ്ങള്‍ നല്‍കുകയും ചെയ്തിരുന്നു. പലപ്പോഴും ഇയാള്‍ പണവും പെണ്‍കുട്ടിക്ക് നല്‍കിയിരുന്നുവെന്നും റിപ്പോര്‍ട്ടില്‍ വ്യക്തമാക്കുന്നു.