തീപിടിച്ച കെട്ടിടത്തില്‍ നിന്ന് അമ്മ താഴേക്കിട്ട കുട്ടിയെ വഴിപോക്കന്‍ സാഹസികമായി രക്ഷപ്പെടുത്തി.

ഇക്കഴിഞ്ഞ ഞായറാഴ്ച്ച അല്‍ നുഐമിയ-2 മേഖലയിലെ ഫ്‌ലാറ്റ് കെട്ടിടത്തിന് തീ പിടിച്ചപ്പോള്‍ ഒരു മൂന്നു വയസ്സുകാരനെ രക്ഷിയ്ക്കാനായി ഏഷ്യക്കാരിയായ അവന്റെ അമ്മ അവനെ ഫ്‌ലാറ്റിന് മുന്നിലുള്ള വഴിയിലൂടെ പോകുകയായിരുന്ന ഒരു വഴിപോക്കന്റെ കൈകളിലേക്ക് എറിഞ്ഞു കൊടുക്കുകയായിരുന്നു.

രണ്ടാം നിലയില്‍ നിന്നും ആ വഴിപോക്കന്റെ കൈകളിലേക്ക് തന്നെ കൃത്യമായി വന്നു വീണതിനാല്‍ ആ കുഞ്ഞ് അത്ഭുതകരമായി രക്ഷപ്പെട്ടു .എന്നാല്‍ തൊട്ടുപിന്നാലെ ചാടിയ അമ്മയ്ക്ക് സാരമായി പരുക്കേറ്റു.

ഫ്‌ലാറ്റിന്റെ രണ്ടാമത്തെയും മൂന്നാമത്തെയും നിലകളില്‍ നിന്ന് താഴേയ്ക്ക് ചാടിയ ഒരു അറബ് വനിതയ്ക്കും മറ്റൊരു പുരുഷനും ഗുരുതരമായി പരുക്കേറ്റതായാണ് റിപ്പോര്‍ട്ട്. അവരെ ഖലീഫാ ആശുപത്രിയില്‍ പ്രവേശിപ്പിച്ചു 

കെട്ടിടത്തിലെ വന്‍പുകയ്ക്കുള്ളില്‍ അകപ്പെട്ടിരുന്ന ഒരു കുടുംബത്തിലെ ഏഴ് പേരെ അജ്മാന്‍ സിവില്‍ ഡിഫെന്‍സിന്റെ റെസ്‌ക്യൂ യൂണിറ്റ് രക്ഷപ്പെടുത്തി. അപകടത്തില്‍ കെട്ടിടം ഭാഗികമായി കത്തിനശിച്ചു.

പ്രസ്തുത കെട്ടിടത്തിലെ ഓപ്പറേഷന്‍സ് റൂമില്‍ തീ പിടിച്ചതായി ഞായറാഴ്ച രാത്രിയാണ് വിളിച്ചു പറഞ്ഞതെന്ന് അജ്മാനിലെ ഫയര്‍ സ്‌റ്റേഷനുകളുടെ ഡെപ്യൂട്ടി ഡയറക്ടര്‍ ലെഫ്റ്റനന്റ് കേണല്‍ റയേദ് അല്‍ സാബി പറഞ്ഞു . അഗ്‌നി ശമന പ്രവര്‍ത്തകരും പോലീസ് സംഘവും നാഷണല്‍ ആംബുലന്‍സും സ്ഥലത്ത് കുതിച്ചെത്തി . പെട്ടെന്ന് തന്നെ തീയ് നിയന്ത്രണ വിധേയമാക്കാനും കെട്ടിടത്തിലുള്ളവരെ സുരക്ഷിത സ്ഥാനത്തേയ്ക്ക് മാറ്റുവാനും കഴിഞ്ഞുവെന്ന് അദ്ദേഹം പറഞ്ഞു.

ഒരു വാഷിംഗ് മെഷീനില്‍ ഉണ്ടായ ഷോര്‍ട് സര്‍ക്യൂട്ട് ആണ് തീ പിടിത്തത്തിനു കാരണമായതെന്ന് കണ്ടെത്തി. പ്രസ്തുത കെട്ടിടത്തിന്റെ കോറിഡോറില്‍ വച്ചിരുന്ന ഫ്രിഡ്ജിലേയ്ക്ക് ആ തീ പടര്‍ന്നതാണ് അഗ്‌നി വ്യാപിയ്ക്കാന്‍ കാരണമായതെന്ന് അദ്ദേഹം തുടര്‍ന്ന് പറഞ്ഞു. അപകടസ്ഥലം സുരക്ഷിതമാക്കിയതിനു ശേഷം തുടരന്വേഷണങ്ങള്‍ക്കായി റെസ്‌ക്യൂ പ്രവര്‍ത്തകര്‍ , കെട്ടിടം അ്ഗ്‌നി ശമന വിദഗ്ധര്‍ക്ക് കൈമാറിയെന്നും അദ്ദേഹം അറിയിച്ചു.

കെട്ടിടങ്ങളുടെ കോറിഡോറുകളിലും എമര്‍ജന്‍സി എക്‌സിറ്റുകളിലും വസ്തുക്കള്‍ കൊണ്ടുവയ്ക്കരുതെന്നും വൈദ്യുത ഉപകരണങ്ങളുടെയും ഇലക്ട്രോണിക് വസ്തുക്കളുടെയും സുരക്ഷാ സംവിധാനങ്ങള്‍ കൃത്യമാണെന്ന് ഉറപ്പു വരുത്തണമെന്നും കെട്ടിടത്തിലെ താമസക്കാരോട് അദ്ദേഹം നിര്‍ദേശിച്ചു . തീപിടുത്തം പോലെയുള്ള അപകടങ്ങളുടെ സമയത്ത് കെട്ടിടം ഒഴിപ്പിയ്ക്കുന്നതിനു നല്‍കപ്പെടുന്ന നിര്‍ദേശങ്ങള്‍ പാലിയ്ക്കണമെന്നും അദ്ദേഹം ഓര്‍മപ്പെടുത്തി .