പെണ്‍മക്കള്‍ക്ക് മികച്ച വിദ്യാഭ്യാസം നല്‍കാന്‍ കുട്ടികളുമായി ദിവസവും 12 കിലോമീറ്റര്‍ യാത്ര ചെയ്യുന്ന പിതാവ്!
അഫ്ഗാനിസ്ഥാനിലെ ഷാരണ സ്വദേശിയായ ഒരു പിതാവ് തന്റെ മൂന്ന് പെണ്‍മക്കള്‍ക്കും മികച്ച വിദ്യാഭ്യാസം ലഭിക്കുവാനായി ഒരു ദിവസത്തിന്റെ ഭൂരിഭാഗം സമയവും അവര്‍ക്കായി മാറ്റി വയ്ക്കുന്നു. അതിനായി ദിവസവും 12 കിലോമീറ്റര്‍ അകലെയുള്ള സ്‌കൂളിലേക്ക് അവരെയും കൊണ്ട് യാത്ര ചെയ്യുകയും ചെയ്യും.
തന്റെ ബൈക്കിലാണ് മിയാ ഖാന്‍ എന്ന ആ പിതാവ് മക്കളെ സ്‌കൂളില്‍ എത്തിക്കുന്നത്. ഇവര്‍ പഠിക്കുന്ന സമയം സ്‌കൂളിന് പുറത്ത് കാത്തിരിക്കുന്ന മിയ ക്ലാസ് കഴിഞ്ഞ് വരുന്ന മക്കളെയും കൂട്ടിയാണ് തിരികെ വീട്ടിലേക്ക് മടങ്ങുന്നത്.
തങ്ങള്‍ താമസിക്കുന്ന മേഖലയില്‍ വനിത ഡോക്ടര്‍മാര്‍ ആരുമില്ല എന്ന കാരണം കൊണ്ടാണ് മിയ ഖാന്‍ തന്റെ പെണ്‍ മക്കളുടെ പഠനത്തിന് ഇത്രയും പ്രാധാന്യം നല്‍കുന്നത്. അഫ്ഗാനിസ്ഥാനില്‍ പ്രവര്‍ത്തിക്കുന്ന സ്വീഡിഷ് എന്‍ജിഒ ആയ നൂറാനിയ സ്‌കൂളിലാണ് അദ്ദേഹം തന്റെ മക്കളെ പഠിപ്പിക്കുന്നത്.
എനിക്ക് വിദ്യാഭ്യാസമില്ല. എന്റെ ദിവസവേതനം കൊണ്ടാണ് ഞങ്ങള്‍ ജീവിക്കുന്നത്. മക്കളുടെ വിദ്യാഭ്യാസം എനിക്ക് വളരെ പ്രധാനപ്പെട്ടതാണ്. കാരണം ഞങ്ങള്‍ താമസിക്കുന്ന മേഖലയില്‍ വനിത ഡോക്ടര്‍മാര്‍ ആരുമില്ല. എന്റെ ആണ്‍മക്കളെ പോലെ തന്നെ പെണ്‍മക്കള്‍ക്കും മികച്ച വിദ്യാഭ്യാസം നല്‍കണം. അതാണ് എന്റെ ഏറ്റവും വലിയ ആഗ്രഹം. മിയാ ഖാന്‍ പറഞ്ഞു.
മിയാ ഖാനെക്കുറിച്ചും അദ്ദേഹത്തിന്റെ മക്കളെക്കുറിച്ചും ഫേസ്ബുക്ക് കുറിപ്പിലൂടെയാണ് പുറത്തറിയുന്നത്. മക്കളുടെ വിദ്യാഭ്യാസത്തിനായി ഏറെ പരിശ്രമിക്കുന്ന അദ്ദേഹത്തെ അഭിനന്ദിച്ച് നിരവധിയാളുകളാണ് രംഗത്തെത്തിയിരിക്കുന്നത്.
https://www.facebook.com/Malayalivartha
