ന്യൂയോര്‍ക്കിലെ റിയല്‍ എസ്‌റ്റേറ്റ് രംഗത്തെ പ്രമുഖനായ കോടീശ്വരനാണ് ഡസ്റ്റ് (71). എന്തും ചെയ്യാന്‍ മടിക്കാത്ത സ്വഭാവം; ഒപ്പം വായാടിത്തവും. മൂന്നു കൊലക്കേസുകളില്‍ അഴിയെണ്ണുന്ന നിലയില്‍ റോബര്‍ട്ട് ഡസ്റ്റിനെ ഇനി ജയിലഴികള്‍ക്കുള്ളിലൂടെ കാണാം. എച്ച്ബിഒ ടെലിവിഷന്‍ പരിപാടിയുടെ ഫൈനല്‍ ചിത്രീകരിക്കുന്നതിനിടയില്‍ ബാത്ത്‌റൂമില്‍വച്ചു വീരവാദം പറഞ്ഞതിനെത്തുടര്‍ന്നാണ് അമളി പിണഞ്ഞത്.

\'റോബര്‍ട്ട് ഡസ്റ്റിന്റെ ജീവിതവും മരണങ്ങളും\' എന്ന ആറു ഭാഗങ്ങളുള്ള എച്ച്ബിഒ ടിവി പരമ്പരയുടെ ഫൈനല്‍ ചിത്രീകരിക്കുന്നതിനിടയിലാണ്, താന്‍ സംശയിക്കപ്പെട്ടെങ്കിലും കുറ്റവിമുക്തനാക്കപ്പെട്ട കൊലപാതകങ്ങളെക്കുറിച്ച് അബദ്ധത്തില്‍ വെളിപ്പെടുത്താനിടയായത്.

1982ല്‍ ഡസ്റ്റിന്റെ ഭാര്യ കാതലീനെ കാണാതായി. ഈ സംഭവത്തില്‍ പൊലീസ് ചോദ്യം ചെയ്യുന്നതിന്റെ തലേന്നു തലയ്ക്കു പിറകില്‍ വെടിയേറ്റ് എഴുത്തുകാരിയും സുഹൃത്തും ആയ സൂസന്‍ ബര്‍മന്‍ കൊല്ലപ്പെട്ടു. ഈ രണ്ടു കേസിലും ഡസ്റ്റിനെ സംശയിച്ചെങ്കിലും തെളിവുകളില്ലാത്തതിനാല്‍ രക്ഷപ്പെട്ടു. ഇതുകൂടാതെ മൂന്നാമതൊരു കേസില്‍ കൂടി 2001ല്‍ സംശയിക്കപ്പെട്ടെങ്കിലും കുറ്റവിമുക്തനായി. ഇതുമായി ബന്ധപ്പെട്ട കാര്യങ്ങള്‍ ചര്‍ച്ച ചെയ്യുന്ന ടിവി പരമ്പരയുടെ ചിത്രീകരണമാണ് നടന്നു കൊണ്ടിരുന്നത്.

ഈ ഷൂട്ടിങ്ങിനിടയില്‍ ബാത്ത്‌റൂമില്‍ പോയ ഡസ്റ്റ് സ്വയം പറഞ്ഞു: \'ഞാനെന്താ ചെയ്തത്? അവരെ എല്ലാവരെയും കൊന്നു. അത്ര തന്നെ. ഷൂട്ടിങ്ങിനുവേണ്ടി ഷര്‍ട്ടില്‍ ഘടിപ്പിച്ചിരുന്ന മൈക്രോഫോണ്‍ ഇക്കാര്യവും റിക്കോര്‍ഡു ചെയ്തു. പരിപാടി സംപ്രേഷണം ചെയ്തു രണ്ടു വര്‍ഷത്തിനുശേഷമാണ് ഒരു എഡിറ്റര്‍ ഈ ആത്മഗതം കണ്ടെത്തിയത്. സംഭവം ട്വിറ്ററിലൂടെ പെട്ടെന്നു പരന്നു. അവസാനം ഡസ്റ്റിന്റെ വക്കീല്‍ തന്നെ രംഗത്തുവന്നു കാര്യങ്ങള്‍ സമ്മതിച്ചു- എന്റെ കക്ഷി സൂസന്‍ ബര്‍മനെ കൊലപ്പെടുത്തിയതു തന്നെയാണ്. വിചാരണ നേരിടാന്‍ തയാറാണ്.

ടിവി പരിപാടിയുടെ ഇടയ്ക്കു പറഞ്ഞതെങ്കിലും അതിനു സാധുത ഉണ്ടെന്നാണു നിയമവിദഗ്ധര്‍ പറയുന്നത്. അതേസമയം ഡസ്റ്റിന്റെ അറസ്റ്റ് തെളിവുകളുടെ അടിസ്ഥാനത്തിലാണെന്നും അതിനു ഡോക്കുമെന്ററിയുമായി ബന്ധമില്ലെന്നുമാണു ലൊസാഞ്ചല്‍സിലെ പൊലീസ് ഉദ്യോഗസ്ഥ റൊസാരിയോ ഹെരേര പ്രതികരിച്ചത്. അറസ്റ്റിലായ ഡസ്റ്റ്, ന്യൂ ഓര്‍ലന്‍സിലെ ജയിലിലാണിപ്പോള്‍.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha