പന്ത്രണ്ടുലക്ഷത്തിലധികം പേരെ രോഗികളാക്കിയ കൊറോണ വൈറസ് മഹാമാരി ലോകരാഷ്ട്രങ്ങളെ മുള്‍മുനയില്‍ നിര്‍ത്തുന്നു. ഞായറാഴ്ചയോടെ 208 രാജ്യങ്ങളിലാണ് വൈറസ് എത്തിയിട്ടുള്ളത്. അടച്ചുപൂട്ടിയും സാമൂഹിക അകലം പാലിച്ചും വൈറസിനെ പ്രതിരോധിക്കാന്‍ ശ്രമിക്കുകയാണ് ലോകം. സ്‌പെയിനും സൗദി അറേബ്യയും യു.എ.ഇ.യും വൈറസ് തടയാന്‍ പ്രതിരോധപ്രവര്‍ത്തനങ്ങളും നിയന്ത്രണങ്ങളും കൂടുതല്‍ ശക്തമാക്കി. കുവൈത്തിലും ജോര്‍ജിയയിലും ആദ്യ വൈറസ് മരണം റിപ്പോര്‍ട്ടുചെയ്തു. ദക്ഷിണസുഡാനില്‍ ആദ്യ വൈറസ് ബാധ സ്ഥിരീകരിച്ചു.

കഴിഞ്ഞദിവസങ്ങളില്‍ വൈറസ് ബാധ ഏറ്റവും കൂടുതലായിരുന്ന യു.എസില്‍ സ്ഥിതിഗതികള്‍ അതിഗുരുതരമായി തുടരുകയാണ്. ബ്രിട്ടനിലും കാര്യങ്ങള്‍ പിടിവിട്ടുകഴിഞ്ഞു. പ്രതിദിനം വൈറസ് ബാധയും മരണവും വര്‍ധിക്കുന്ന ബ്രിട്ടനിലും യു.എസിലും വരാന്‍പോകുന്നത് ഏറ്റവും മോശമായ ദിവസങ്ങളാണെന്നാണ് ആരോഗ്യവിദഗ്ധര്‍ മുന്നറിയിപ്പുനല്‍കുന്നത്.

ബ്രിട്ടനില്‍ 24 മണിക്കൂറിനിടെ 708 പേരാണ് മരിച്ചത്. മരണനിരക്ക് ഇനിയും ഉയരുമെന്ന് ബ്രിട്ടീഷ് ആരോഗ്യവിഭാഗം ഡയറക്ടര്‍ സ്റ്റീഫന്‍ പൊവിസ് പറഞ്ഞു. കടുത്തനിയന്ത്രണങ്ങള്‍ തുടരുന്ന രാജ്യത്ത് ലോക്ഡൗണ്‍ നീട്ടുന്ന കാര്യമാണ് ഇപ്പോള്‍ സര്‍ക്കാര്‍ ആലോചിക്കുന്നത്. സമ്പൂര്‍ണ അടച്ചിടല്‍ ഒരുമാസം പിന്നിട്ട സ്‌പെയിനില്‍ കൊറോണ വൈറസ് ബാധിച്ചുള്ള മരണം തുടര്‍ച്ചയായ മൂന്നാംദിവസവും കുറഞ്ഞു. ഞായറാഴ്ച 674 പേരാണ് രാജ്യത്ത് മരിച്ചത്. ശനിയാഴ്ച 809 പേര്‍ മരിച്ചിരുന്നു. എന്നാല്‍, മരണസംഖ്യ കുറയുന്നതുകൊണ്ട് ആശ്വസിക്കാനാവില്ലെന്നും ഞായറാഴ്ച 4591 പേര്‍ക്ക് പുതുതായി രോഗം പിടിപെട്ടതായും അധികൃതര്‍ അറിയിച്ചു. വൈറസ് നിയന്ത്രണങ്ങള്‍ക്കിടെ ആയുധവുമായി പുറത്തിറങ്ങി ഉദ്യോഗസ്ഥരെയും പോലീസിനെയും ആക്രമിച്ചയാളെ ഫിലിപ്പീന്‍സില്‍ വെടിവെച്ചുകൊന്നു. 63-കാരനാണ് മരിച്ചത്.

തെക്കന്‍ പ്രവിശ്യയായ അഗുസന്‍ ദെല്‍ നോര്‍ത്തിലാണ് സംഭവം. ആരോഗ്യപ്രവര്‍ത്തകര്‍ക്കും പോലീസിനും ഭീഷണിയാവുന്നവരെ വെടിവെച്ചുകൊല്ലാന്‍ ഫിലിപ്പീന്‍സ് പ്രസിഡന്റ് റോഡ്രിഗോ ഡ്യൂട്ടേര്‍ട്ട് കഴിഞ്ഞദിവസം ഉത്തരവിട്ടിരുന്നു. വൈറസ് ബാധിച്ച് മരിച്ചവരുടെ മൃതദേഹങ്ങള്‍ റോഡില്‍ ഉപേക്ഷിക്കപ്പെട്ട സംഭവത്തില്‍ ആഫ്രിക്കന്‍ രാജ്യമായ എക്വഡോര്‍ മാപ്പുപറഞ്ഞു. വൈറസ് ഏറ്റവുമധികം ബാധിച്ച തീരനഗരമായ ഗയാകിലിലാണ് മൃതദേഹങ്ങള്‍ ഉപേക്ഷിക്കപ്പെട്ടനിലയില്‍ തെരുവില്‍ കിടക്കുന്നതിന്റെ ചിത്രങ്ങള്‍ സാമൂഹികമാധ്യമങ്ങളിലൂടെ പുറത്തായത്.

ഒരിക്കലും സംഭവിക്കാന്‍ പാടില്ലാത്തത് സംഭവിച്ചതായി എക്വഡോര്‍ വൈസ് പ്രസിഡന്റ് ഓട്ടോ സൊനെന്‍ ഹൊല്‍നര്‍ പറഞ്ഞു. 150 മൃതദേഹങ്ങളാണ് അധികൃതര്‍ തെരുവില്‍നിന്ന് മാറ്റിയത്.