22,000ലേറെ അമേരിക്കന്‍ പൗരന്മാര്‍ വിവിധ രാജ്യങ്ങളിലായി കുടുങ്ങിക്കിടക്കിടപ്പുണ്ട്. ഇതില്‍ ഭൂരിഭാഗവും ഇന്ത്യയിലാണ് ഇത്തരത്തില്‍ ഇന്ത്യയുള്‍പ്പെടെയുള്ള രാജ്യങ്ങളില്‍ കുടുങ്ങിക്കിടക്കുന്ന തങ്ങളുടെ പൗരന്മാരെ തിരിച്ചെത്തിക്കാനുള്ള ശ്രമത്തില്‍ ആണ് അമേരിക്കയും ബ്രിട്ടനും.. ഇവരെ പ്രത്യേക വിമാനങ്ങള്‍ അയച്ച് കൂട്ടിക്കൊണ്ട് പോകാനാണ് പദ്ധതി. ഈ മാസം എട്ട്, 10, 12 തീയതികളില്‍ ഇന്ത്യയില്‍ കുടുങ്ങിയവരെ കൊണ്ടുപോകാനായി പ്രത്യേക വിമാനം ലണ്ടനില്‍ നിന്ന് ഗോവയിലെത്തും. ഒന്‍പത്, 11 തീയതികളില്‍ മുംബൈയില്‍ നിന്നും ഡല്‍ഹിയില്‍ നിന്നും വിമാനമുണ്ടാകും.

കോവിഡിന് മുന്നില്‍ അമേരിക്ക വിറയ്ക്കുന്നു , മരണം പതിനായിരത്തോട് അടുക്കുന്നു . വൈറസ് ബാധിതര്‍ 3 ലക്ഷം കടന്നു. 3,11,,735 പേര്‍ക്കാണ് രോഗം ബാധിച്ചത്. മരിച്ചവരുടെ എണ്ണം 9,171 ആയി. 16,600 പേര്‍ രോഗം ഭേദമായി ആശുപത്രി വിട്ടു. അമേരിക്കയില്‍ ഇന്നലെയും മരിച്ചവരുടെ എണ്ണം ആയിരത്തിന് മുകളിലാണ്. 1224 മരണമാണ് റിപ്പോര്‍ട്ട് ചെയ്തത്. ഇതില്‍ 630 മരണങ്ങളും ന്യൂയോര്‍ക്കിലാണ്. ന്യൂയോര്‍ക്കില്‍ ഓരോ രണ്ടര മിനിറ്റിലും ഒരാള്‍ മരിക്കുന്നതായി ഗവര്‍ണര്‍ ആന്‍ഡ്രു കൂമോ പറഞ്ഞു. രോഗികളുടെ എണ്ണം നിത്യേന വര്‍ധിച്ചുവരികയാണ്.

അതേസമയം കോവിഡ് ബാധ ആരംഭിച്ചതിന് പിന്നാലെ രാജ്യങ്ങളില്‍ നിന്നായി 4000ത്തിലേറെപ്പേരെ അമേരിക്ക നാട്ടിലെത്തിച്ചിട്ടുണ്ട്. തുടര്‍ന്നും വിദേശത്ത് നിന്ന് പൗരന്മാരെ കൊണ്ടുവരാനായി 70 ഓളം വിമാനങ്ങള്‍ അയക്കാനാണ് യു.എസ് സ്റ്റേറ്റ് ഡിപ്പാര്‍ട്ട്‌മെന്റ് ആലോചിക്കുന്നതെന്ന് കോണ്‍സുലാര്‍ അഫയേഴ്‌സ് പ്രിന്‍സിപ്പല്‍ ഡെപ്യൂട്ടി അസിസ്റ്റന്റ് സെക്രട്ടറി ഇയാന്‍ ബ്രൗണ്‍ലി അറിയിച്ചു.

അതേസമയം കഠിനമായ ആഴ്ചകളാണ് വരാനിരിക്കുന്നതെന്ന് പ്രസിഡന്റ് ഡോണള്‍ഡ് ട്രംപ് മുന്നറിയിപ്പ് നല്‍കി. നിര്‍ഭാഗ്യവശാല്‍ ഒട്ടേറെ മരണങ്ങളുണ്ടാകുമെന്നും ഭയാനകമായ കാലത്തിലൂടെയാണ് കടന്നുപോകുന്നതെന്നും ട്രംപ് പറഞ്ഞു.

ലോകത്തെ ആകെ രോഗികളില്‍ നാലിലൊന്നും അമേരിക്കയിലാണ്. അതിവേഗത്തില്‍ രോഗം പടരുന്നത് ന്യൂയോര്‍ക്കിലും ലൂസിയാനയിലുമാണ്. ന്യൂയോര്‍ക്കില്‍ മാസ്‌ക്, കയ്യുറ, ഗൗണ്‍ എന്നിവ അടക്കം അടിസ്ഥാന സുരക്ഷാ മെഡിക്കല്‍ ഉപകരണങ്ങള്‍ കിട്ടാതെ ആരോഗ്യപ്രവര്‍ത്തകര്‍ വലയുകയാണ്. ന്യൂയോര്‍ക്കില്‍ ഓക്‌സിജന്‍ ക്ഷാമവും അനുഭവപ്പെടുന്നുണ്ട്. ലൂസിയാനയില്‍ രോഗികളുടെ എണ്ണം 10,000 കവിഞ്ഞു. ജയിലുകളിലെ നൂറോളം പേര്‍ക്ക് കൊവിഡ് സ്ഥിരീകരിച്ചിട്ടുണ്ട്. ആറ് മാസത്തില്‍ താഴെ തടവിന് ശിക്ഷിക്കപ്പെട്ടവരെ വീടുകളില്‍ നിരീക്ഷത്തിലാക്കും.

അടിയന്തര സഹായത്തിന് സൈന്യമിറങ്ങിയിട്ടുണ്ട്. സൈന്യത്തില്‍ നിന്ന് വിരമിച്ച 9,000 ആരോഗ്യ പ്രവര്‍ത്തകര്‍ സേവനത്തിനിറങ്ങിയിട്ടുണ്ട്. 50 സംസ്ഥാനങ്ങളിലായി സൈന്യം നൂറിലേറെ താത്ക്കാലിക ആശുപത്രികളാണ് നിര്‍മിക്കുന്നത്.

രാജ്യത്തു വസിക്കുന്ന എല്ലാവര്‍ക്കും ആരോഗ്യപരിരക്ഷ നല്‍കാത്ത ഏക വികസിതരാജ്യമാണ് അമേരിക്ക എന്ന ആരോപണം ഈയടുത്തിടെ ഏറ്റവുമധികം ഉന്നയിച്ചവരിലൊരാളാണ് ഡെമോക്രാറ്റിക് പാര്‍ട്ടിയില്‍നിന്ന് അമേരിക്കന്‍ പ്രസിഡന്റ് സ്ഥാനത്തേക്കു മത്സരിക്കുന്ന ബേണി സാന്‍ഡേഴ്‌സ്. കാനഡയും ബ്രിട്ടനും ഓസ്‌ട്രേലിയയും സാര്‍വത്രിക ആരോഗ്യപരിരക്ഷ നടപ്പാക്കിയതിനെയാണ് ഇദ്ദേഹമുള്‍പ്പെടെയുള്ളവര്‍ ചൂണ്ടിക്കാട്ടുന്നത്. വര്‍ഷങ്ങളുടെ ശ്രമഫലമായാണ് പലകോണുകളില്‍നിന്നുള്ള എതിര്‍പ്പുനേരിട്ട് ഈ രാജ്യങ്ങള്‍ അതു സാധ്യമാക്കിയത്. ഓരോ രാജ്യത്തും രാഷ്ട്രീയക്കാര്‍ കര്‍ക്കശനിലപാടെടുത്തപ്പോള്‍, ഇതുസാധ്യമായി. അമേരിക്കയില്‍ ഇതിനിടയാക്കല്‍ ഈ രാജ്യങ്ങളിലേതിനെക്കാള്‍ പ്രയാസമുള്ള ഏര്‍പ്പാടാകുമെന്ന് 'ന്യൂയോര്‍ക്ക് ടൈംസ്'പത്രം ചൂണ്ടിക്കാട്ടുന്നു.