ലോകത്ത് കോവിഡ് രോഗികളുടെ എണ്ണം 25.38 ലക്ഷം കടന്നു. മരണസംഖ്യ 1.77,000 ത്തോളമായി. അമേരിക്കയില്‍ കോവിഡ് ബാധിതരുടെ എണ്ണം 806,034 ആയി. 44,243 പേരാണ് ഇതുവരെ മരിച്ചത്. സ്‌പെയിനില്‍ രോഗികളുടെ എണ്ണം 2.04 ലക്ഷം കടന്നു.21,282 പേരാണ് മരണെപ്പട്ടത്. ഇറ്റലിയില്‍ മൊത്തം രോഗികളുടെ എണ്ണത്തില്‍ ചെറിയ കുറവ് രേഖപ്പെടുത്തി. ലക്ഷത്തിലധികം ആളുകള്‍ മരിച്ച യൂറോപ്പില്‍ പൊതുവെ മരണനിരക്ക് കുറയുന്നുണ്ടെങ്കിലും ബ്രിട്ടനില്‍ ചൊവ്വാഴ്ചയും വര്‍ധനവുണ്ടായി. അവിടെ മരണസംഖ്യ 20000 കടന്നതായി സര്‍ക്കാര്‍ സൂചിപ്പിച്ചു.

ബ്രിട്ടനില്‍ 828 പേര്‍ കൂടി മരിച്ചതോടെ മരണസംഖ്യ 17337 ആയി. ആശുപത്രികളിലെ മരണസംഖ്യ മാത്രമാണിത്. യഥാര്‍ഥ മരണസംഖ്യ ഇതിലും 41 ശതമാനം അധികമായിരിക്കുമെന്ന് സര്‍ക്കാര്‍ അറിയിച്ചു. ഏപ്രില്‍ 10വരെ ബ്രിട്ടനിലും വെയില്‍സിലും ആശുപത്രികള്‍ക്ക് പുറത്ത് കോവിഡുമായി ബന്ധപ്പെട്ടുണ്ടായ മരണങ്ങള്‍ തിട്ടപ്പെടുത്തി ദേശീയ സ്ഥിതിവിവര ഓഫീസ് അറിയിച്ചതാണിത്. ഇക്കാലത്ത് ആകെ 13121 പേര്‍ കോവിഡുമായി ബന്ധപ്പെട്ട് മരിച്ചെങ്കിലും ആശുപത്രിയില്‍ മരിച്ച 9288 പേര്‍ മാത്രമാണ് കണക്കിലുള്ളതെന്ന് സര്‍ക്കാര്‍ അറിയിച്ചു. ഔദ്യോഗിക മരണസംഖ്യതന്നെ 20000 കടന്നതായാണ് വ്യക്തമാകുന്നത്. എന്നാല്‍ യഥാര്‍ഥ മരണസംഖ്യ അതിനുമപ്പുറമായിരിക്കുമെന്ന് അനൗദ്യോഗിക കേന്ദ്രങ്ങള്‍ അറിയിച്ചു.

അമേരിക്ക തിരിച്ചയച്ച വിദേശ പൗരന്മാര്‍ക്ക് കൊറോണ വൈറസ് സ്ഥിരീകരിച്ചു. ഹെയ്തി, ഗ്വാട്ടിമാല, മെക്‌സിക്കോ എന്നീ രാജ്യങ്ങളില്‍ തിരിച്ചെത്തിയവര്‍ക്കാണ് കോവിഡ് സ്ഥിരീകരിച്ചത്. കൃത്യമായ പരിശോധനകളില്ലാതെയും രോഗമുക്തി ഉറപ്പാക്കാതെയും ആണ് അമേരിക്ക പൗരന്മാരെ തിരിച്ചയച്ചത്.

അമേരിക്കയില്‍ നിന്നെത്തിയ 51 പേര്‍ക്ക് വൈറസ് സ്ഥിരീകരിച്ചതായി ഗ്വാട്ടിമാല സര്‍ക്കാര്‍ പറഞ്ഞു. വിദേശ പൗരന്മാരെ തിരിച്ചയക്കുന്നതിനു മുന്പ് അവര്‍ക്ക് കോവിഡ് പരിശോധന നടത്തണമെന്ന് ഗ്വാട്ടിമാല അമേരിക്കയോട് ആവശ്യപ്പെട്ടു. കോവിഡ് മുക്തരാണെന്ന് സ്ഥിരീകരിച്ചശേഷമേ വിദേശ പൗരന്മാരെ തിരിച്ചയക്കാവൂ എന്നും അവര്‍ ആവശ്യപ്പെട്ടു. അമേരിക്കയില്‍നിന്ന് തിരിച്ചെത്തിയവര്‍ക്ക് രോഗം സ്ഥിരീകരിച്ചതായും അവരിലൂടെ രോഗം പടര്‍ന്നതായും മെക്‌സിക്കോ, ഹെയ്തി സര്‍ക്കാരുകളും അറിയിച്ചു. വിദേശ പൗരന്മാരെ കയറ്റിയയക്കുന്ന അമേരിക്കന്‍ നടപടിക്കെതിരെ പ്രതിഷേധം ശക്തമായിട്ടുണ്ട്.

സ്‌പെയിനിലും ഏതാനും ദിവസമായി കുറഞ്ഞുവന്ന മരണനിരക്ക് ചൊവ്വാഴ്ച കൂടി. 430 പേര്‍ കൂടി മരിച്ചതോടെ മരണസംഖ്യ 21282 ആയി. അമേരിക്കയില്‍ മാസച്യുസെറ്റ്‌സും രോഗത്തിന്റെ പ്രഭവകേന്ദ്രമായി. ഈയാഴ്ച അവിടെ മരണം ഇരട്ടിയായി രണ്ടായിരം കടക്കുമെന്നാണ് റിപ്പോര്‍ട്ട്. റഷ്യയിലും ഏതാനും ദിവസങ്ങളായി രോഗബാധിതരുടെ എണ്ണവും മരണവും കുത്തനെ കൂടുകയാണ്. 52763 പേര്‍ക്ക് രോഗം സ്ഥിരീകരിച്ച റഷ്യയില്‍ 456 പേരാണ് ഇതുവരെ മരിച്ചത് എന്നാല്‍ ഏപ്രില്‍ ഒമ്ബത്വരെ 10131 പേര്‍ക്ക് മാത്രമായിരുന്നു രോഗം സ്ഥിരീകരിച്ചത്. 76 പേരായിരുന്നു മരിച്ചത്.

ബെല്‍ജിയത്തില്‍ മരണസംഖ്യ ആറായിരത്തോടും ജര്‍മനിയില്‍ അയ്യായിരത്തോടും അടുക്കുന്നു. നെതര്‍ലന്‍ഡ്‌സില്‍ 4000 ആകാറായി. ഇറ്റലിയില്‍ 24648 പേരാണ് മരിച്ചത്. ഫ്രാന്‍സില്‍ 21000 ആകാറായി. അതേസമയം ചൈനയില്‍ പുതിയ മരണമില്ലാത്ത സ്ഥിതി തുടരുന്നു. ഇറാനിലും പുരോഗതിയുണ്ട്. 5297 ആണ് അവിടെ മരണസംഖ്യ.

രാജ്യത്തെ കോവിഡ് ബാധിതരുടെ എണ്ണം 20,000 കടന്നു. 640 പേര്‍ മരിച്ചു. 24 മണിക്കൂറിനകം 1540 പുതിയ രോഗബാധ റിപ്പോര്‍ട്ട് ചെയ്തു. 31 പേര്‍കൂടി മരിച്ചു. കേന്ദ്ര ആരോഗ്യമന്ത്രാലയത്തിന്റെ കണക്കുപ്രകാരം കോവിഡ് ബാധിതതരുടെ എണ്ണം 18,601. മരണം 590. രോഗമുക്തരായവര്‍ 3252.