ഇന്ത്യയിലെ ഐടി വ്യവസായവും യുവാക്കളുടെ തൊഴില്‍ സ്വപ്നങ്ങളും പരിഗണിക്കുമ്പോള്‍ യുഎസിലേക്കുള്ള ഇമിഗ്രേഷന്‍ വിലക്കില്‍ അവ്യക്തതകളുണ്ടെങ്കിലും, ഈ നീക്കം നിര്‍ണായകമാണ്. മിക്ക ഐടി സേവന കമ്പനികളിലും 100 പേരുടെ ടീമില്‍ 10 പേരെങ്കിലും യുഎസിലാണ്. ഇവരെല്ലാം എച്ച്-1ബി തൊഴില്‍ വീസയില്‍ പോയവരാണ്.

എച്ച്-1ബി വീസ താല്‍ക്കാലികമായതിനാല്‍ നോണ്‍-ഇമിഗ്രന്റ് വീസയായിട്ടാണ് പരിഗണിച്ചിരിക്കുന്നത്. എച്ച്-1ബി പുതുക്കി ക്രമേണ ഗ്രീന്‍ കാര്‍ഡ് നേടുന്നവരെയാണ് ഇമിഗ്രന്റ് എന്ന് കണക്കാക്കുന്നത്. എന്നാല്‍ യുഎസിലെ പൗരന്മാരുടെ ജോലി സംരക്ഷിക്കാനാണ് ഇത്തരമൊരു നീക്കമെന്ന് പ്രസിഡന്റ് തന്നെ പറയുമ്പോള്‍ എച്ച്-1ബി വീസയെയും ഇതു ബാധിക്കാനിടയുണ്ട്. യുഎസ് ഏര്‍പ്പെടുത്തുന്ന ഇമിഗ്രേഷന്‍ വിലക്കില്‍ എച്ച്1ബി വീസ ഉള്‍പ്പെടുമോയെന്നതില്‍ വ്യക്തത വരാനുണ്ട്.

കഴിഞ്ഞ 3 വര്‍ഷമായി എച്ച്-1ബി വീസകള്‍ കുറയ്ക്കാനായി യുഎസ് സ്വീകരിച്ചുവരുന്ന കര്‍ശനനിലപാടുകളുടെ ഒരു സ്വാഭാവിക പരിണാമമായിരിക്കാം ഇത്തരമൊരു നയം. വിലക്ക് താല്‍ക്കാലികമെന്നു പറഞ്ഞാല്‍ പോലും അതു മാറിയാലും പഴയ പടിയിലേക്കു കാര്യങ്ങളെത്തുമോയെന്നു സംശയമാണ്. ഈ നിലയ്ക്കാണ് കാര്യങ്ങളെങ്കില്‍ യുഎസില്‍ പോയി ജോലി ചെയ്യാമെന്ന സ്വപ്നത്തില്‍ കരിനിഴല്‍ വീണേക്കാം.

യുഎസില്‍ കേന്ദ്രങ്ങളുള്ള ഐടി കമ്പനികള്‍ അവിടത്തുകാരെ മാത്രം ജോലിക്കെടുക്കാന്‍ നിര്‍ബന്ധിക്കപ്പെട്ടാല്‍ കമ്പനികളുടെ ചെലവും ഭീമമായി വര്‍ധിക്കും. ഇന്ത്യ പോലുള്ള രാജ്യങ്ങളില്‍ നിന്നുള്ള മികച്ച ടാലന്റുകളെ നഷ്ടമാകുകയും ചെയ്യും. അവിടെ മികച്ച ജീവനക്കാരെ കിട്ടാത്തതുകൊണ്ടാണ് കമ്പനികള്‍ ഇവിടെ നിന്ന് കൊണ്ടുപോകുന്നത്.

കമ്പനികള്‍ അവരുടെ പ്രവര്‍ത്തനരീതി മാറ്റേണ്ട സമയമായിരിക്കുന്നു. യുഎസിലേക്ക് അയച്ചിരിക്കുന്ന ടീമിനെ ആശ്രയിക്കുന്നത് പരമാവധി കുറച്ച് ഇന്ത്യയിലോ മറ്റു രാജ്യങ്ങളിലോ ഇരുന്നുകൊണ്ടുതന്നെ ഇപ്പോള്‍ നല്‍കുന്ന സേവനം ഉറപ്പാക്കാന്‍ കഴിയുമോയെന്നും പരിശോധിക്കണം. അതിനു പുറമേ പലയിടത്തിരുന്ന് ജോലി ചെയ്യുന്ന റിമോട്ട് വര്‍ക്കിങ് സംവിധാനങ്ങളും ശക്തിപ്പെടുത്തേണ്ടിവരും.