5ജി മൊബൈല്‍ ടവറുകള്‍ മുഖേനയാണ് കൊറോണ വൈറസ് പടരുന്നതെന്ന വ്യാജപ്രചാരണത്തെത്തുടര്‍ന്ന് യൂറോപ്പില്‍ ടവറുകള്‍ അഗ്‌നിക്കിരയാക്കുന്ന സംഭവം വ്യാപകമായി. ഹോളണ്ടിലെ ബിസിനസ് കേന്ദ്രത്തില്‍ അജ്ഞാതന്‍ എന്തോ ദ്രാവകമൊഴിച്ച് ടവറിനു തീകൊളുത്തി മറയുന്ന ദൃശ്യം സിസിടിവിയില്‍ പതിഞ്ഞതോടെ മൊബൈല്‍ വ്യവസായം പരിഭ്രാന്തിയിലായി.

ലോകം മഹാമാരിയെ നേരിടാന്‍ കൈകോര്‍ത്തു നില്‍ക്കുമ്പോള്‍ നിര്‍ണായകമായ ടെലികമ്യൂണിക്കേഷന്‍ രംഗത്തെ തളര്‍ത്തുന്ന ഇത്തരം നടപടിയില്‍ നിന്നു പിന്മാറണമെന്ന് ആരോഗ്യ- സാങ്കേതിക വിദഗ്ധര്‍ അഭ്യര്‍ഥിച്ചു.

ബ്രിട്ടനില്‍ മാത്രം ഇത്തരം 50 സംഭവങ്ങള്‍ ഈ മാസമുണ്ടായി. മൊബൈല്‍ ടവറുകള്‍ രോഗം പരത്തുന്നവയാണെന്ന ആരോപണം മുന്‍പും ഉയര്‍ന്നിട്ടുണ്ടെങ്കിലും കൊറോണ ബന്ധം ആരോപിക്കപ്പെട്ടതോടെ ടവര്‍ ആക്രമണം കൂടി. ടെലികോം എന്‍ജിനീയര്‍മാരെ അധിക്ഷേപിച്ചെന്ന 80 പരാതികള്‍ വന്നു. സൈപ്രസ്, ബല്‍ജിയം, അയര്‍ലന്‍ഡ് എന്നിവിടങ്ങളിലും സമാന ആക്രമണങ്ങള്‍ റിപ്പോര്‍ട്ട് ചെയ്തിട്ടുണ്ട്.

കോവിഡ് ബാധിച്ച് ഐസലേഷന്‍ വാര്‍ഡില്‍ കഴിയുന്ന രോഗികള്‍ക്ക് ആകെയുള്ള ആശ്വാസം ബന്ധുക്കളുടെ വിഡിയോ കോളുകളാണെന്നും ഇത്തരം വിധ്വംസക പ്രവര്‍ത്തനങ്ങള്‍ നിരാശാജനകമാണെന്നും ഇംഗ്ലണ്ടിലെ നാഷനല്‍ ഹെല്‍ത്ത് സര്‍വീസ് ഡയറക്ടര്‍ സ്റ്റീഫന്‍ പൊവിസ് പറഞ്ഞു. ബര്‍മിങ്ങാമില്‍ കോവിഡ് രോഗികളുള്ള ആശുപത്രിക്കു സമീപത്തെ ടവര്‍ കഴിഞ്ഞ ദിവസം തകര്‍ത്തിരുന്നു.

കാന്‍സറും കോവിഡുംേ വേണ്ട എന്നു പറഞ്ഞ് ടവര്‍ ആക്രമിക്കുന്നതിന്റെ ദൃശ്യങ്ങള്‍ സമൂഹമാധ്യമങ്ങളില്‍ വ്യാപകമായി പ്രചരിക്കുന്നുണ്ട്. ഹോങ്കോങ്ങില്‍ പ്രക്ഷോഭകാരികള്‍ മൊബൈല്‍ ടവര്‍ തകര്‍ക്കുന്ന ദൃശ്യങ്ങള്‍ ചൈനയിലും പ്രചരിച്ചിരുന്നു.