മുന്‍പ് എച്ച്‌ഐവിയും ഡെങ്കിയും വന്നപ്പോഴത്തെപ്പോലെ കൊറോണ വൈറസ് രോഗത്തിനെതിരെയും ഒരു വാക്‌സിന്‍ വികസിപ്പിക്കാന്‍ ശാസ്ത്രജ്ഞര്‍ക്കാവില്ലെന്ന് ലോകത്തിലെ പ്രമുഖ ആരോഗ്യ വിദഗ്ധര്‍ മുന്നറിയിപ്പു നല്‍കുന്നു. നൂറിലധികം വാക്‌സിനുകള്‍ ഇപ്പോള്‍ ക്ലിനിക്കല്‍ പരീക്ഷണങ്ങള്‍ക്കു മുന്‍പുള്ള ഘട്ടത്തിലാണ്. ഏതാനും ചിലത് മനുഷ്യരില്‍ പരീക്ഷിക്കുന്ന ഘട്ടത്തിലുമെത്തി. ഓക്‌സ്ഫസഡ് സര്‍വകലാശാല ചിമ്പാന്‍സിയില്‍ വൈറസ് പരീക്ഷിച്ചു. യുഎസില്‍ ഒരു വാക്‌സിന്‍ മനുഷ്യരിലും പരീക്ഷിച്ചു.

അതേസമയം ചില വൈറസുകള്‍ക്കെതിരെ ഇപ്പോഴും നമുക്ക് വാക്‌സിന്‍ ഇല്ല എന്ന് ലണ്ടനിലെ ഇംപീരിയല്‍ കോളജിലെ പ്രൊഫസറായ ഡോ. ഡേവിഡ് നബാറോ സിഎന്‍എന്നിനോടു പറഞ്ഞതോടെ ലോകം മുള്‍മുനയിലാണ്. വാക്‌സിന്‍ ലഭ്യമാകുമോ ഇല്ലയോ എന്ന് നമുക്ക് കൃത്യമായി പറയാനാകില്ല. അവ സുരക്ഷാപരിശോധനകളില്‍ വിജയിക്കുമോ എന്നും പറയാനാകില്ല എന്നാണ് ലോകാരോഗ്യ സംഘടനയുടെ കോവിഡ് 19 പ്രത്യേക ദൂതന്‍ കൂടിയായ നബാറോ പറയുന്നത്.

ഒരു വര്‍ഷം മുതല്‍ ഒന്നര വര്‍ഷത്തിനുള്ളില്‍ വാക്‌സിന്‍ വരുമെന്നാണ് നാഷനല്‍ ഇന്‍സ്റ്റിറ്റ്യൂട്ട് ഓഫ് അലര്‍ജി ആന്‍ഡ് ഇന്‍ഫക്ഷ്യസ് ഡിസീസ് ഡയറക്ടറായ ആന്റണി ഫൗസ്യ പറയുന്നത്. മറ്റുള്ളവര്‍ പറയുന്നത് അതിലുമധികം സമയമെടുക്കുമെന്നാണ്. എച്ച്‌ഐവിയും മലേറിയയും പോലെ കൊറോണ വൈറസ് വളരെ പെട്ടെന്ന് ജനിതകമാറ്റം സംഭവിക്കാത്തതിനാല്‍, കോവിഡ് 19ന് വാക്‌സിന്‍ കണ്ടുപിടിക്കാനാകും എന്ന ആത്മവിശ്വാസം വിദഗ്ദരില്‍ പലര്‍ക്കുമുണ്ട്. എന്നാല്‍ വാക്‌സിന്‍ വികസിപ്പിക്കുക എന്നത് വളരെ സാവധാനവും വേദന നിറഞ്ഞതുമായ പ്രക്രിയ ആണെന്നാണ് നബോറ ചൂണ്ടിക്കാട്ടുന്നത്. ഉയര്‍ന്ന പ്രതീക്ഷകളാണ്, നിങ്ങള്‍ക്ക് ഒടുവില്‍ പ്രതീക്ഷകള്‍ നശിക്കും. നമ്മള്‍ ജീവശാസ്ത്രപരമായ സംവിധാനത്തോടാണ് ഇടപെടുന്നത്. അല്ലതെ യാന്ത്രിക സംവിധാനത്തോടല്ല. എങ്ങനെയാണ് ശരീരം പ്രതികരിക്കുന്നത് എന്നതിനെ ആശ്രയിച്ചിരിക്കുമത് നബോറ പറഞ്ഞു. ഒന്നു മുതല്‍ ഒന്നര വര്‍ഷം വരെ സമയം കൊണ്ട് ഇതുവരെ ഒരു വാക്‌സിനും ഉണ്ടായിട്ടില്ല. അതിനര്‍ഥം ഇത് അസാധ്യമാണെന്നല്ല. കോവിഡ് 19നെതിരെ ഒരു വാക്‌സിന്‍ വികസിപ്പിക്കാത്തിടത്തോളം നാം നമ്മളെതന്നെ കരുതേണ്ടതാണെന്ന് നബാറോ പറയുന്നു. ലോകത്തെല്ലായിടത്തുമുള്ള എല്ലാ സമൂഹങ്ങളും കൊറോണ വൈറസിനെ ഒരു ഭീഷണിയായിക്കണ്ട് അതിനെതിരെ പൊരുതണമെന്നും ഇതിനിടയിലും സാമ്പത്തികവും സാമൂഹികവുമായ ജീവിതക്രമം പിന്തുടരേണ്ടതുണ്ടെന്നും നബാറോ പറയുന്നു.