ഇനി ഓണക്കാലമാണ് . നാട്ടിൽ ഇല്ലാത്തവർ എല്ലാം നാട്ടിലേക്ക് ഓണം ആഘോഷിക്കാൻ എത്തും . ഈ സമയത്ത് കെ എസ് ആർ ടി സിയുടെ വക സന്തോഷ വാർത്ത . ഓണാവധിയിലെ തിരക്ക് പരിഗണിച്ച് കര്‍ണാടകയില്‍ നിന്ന് കേരളത്തിലേക്ക് കൂടുതല്‍ ബസ് സര്‍വീസ് ഏർപ്പെടുത്തുന്നു. കെ സി വേണുഗോപാല്‍ എം പിയുടെ നിര്‍ദ്ദേശമനുസരിച്ച് 150 സര്‍വീസ് നടത്താനാണ് ഗതാഗത മന്ത്രി ബി എസ് ബൈരതി സുരേഷ് ഉത്തരവിട്ടിരിക്കുന്നത്.ബംഗളൂരുവിൽ നിന്ന് 60 ബസുകളാണ് ആദ്യം ഷെഡ്യൂള്‍ ചെയ്തിരുന്നത്.

എന്നാല്‍ ട്രെയിനില്‍ ടിക്കറ്റ് കിട്ടാത്ത സാഹചര്യവും സ്വകാര്യബസുകളുടെ അമിത ടിക്കറ്റ് നിരക്കുംകേരളത്തിലേയ്ക്കുള്ള യാത്രക്കാര്‍ക്ക് വലിയ പ്രതിസന്ധി സൃഷ്ടിക്കുമെന്നതിനാൽ ബസ് സര്‍വീസുകളുടെ എണ്ണം വര്‍ദ്ധിപ്പിക്കണമെന്ന് കെസി വേണുഗോപാല്‍ ആവശ്യപ്പെടുകയായിരുന്നു.കോഴിക്കോട്, കോട്ടയം, പാലക്കാട്, തൃശൂര്‍, എറണാകുളം, ആലപ്പുഴ, കൊല്ലം, തിരുവനന്തപുരം, കാസര്‍കോട് എന്നീ ജില്ലകളിലേക്കാണ് ബസ് സര്‍വീസ് നടത്തുക. ഈ മാസം 21 മുതല്‍ 25 വരെയാണ് കർണാടകയിൽ നിന്ന് കേരളത്തിലേക്കുള്ള ബസ് സര്‍വീസ് ഷെഡ്യൂള്‍ ചെയ്തിരിക്കുന്നത്.

കേരളത്തിൽ നിന്ന് കര്‍ണാടകയിലേയ്ക്കുള്ള മടക്ക സര്‍വീസുകള്‍ 27 മുതല്‍ 30 വരെയുള്ള ദിവസങ്ങളിലുമായാണ് ക്രമീകരിച്ചിരിക്കുന്നത്.കഴിഞ്ഞ സർക്കാരിന്റെ കാലത്ത് വാങ്ങിയ ബിസിനസ് ക്ലാസ് ആഡംബര ബസുകൾ കെ.എസ്.ആർ.ടി.സി. ഏറെക്കാലത്തെ കാത്തിരിപ്പിനുശേഷം പേരിൽ ചെറിയ മാറ്റത്തോടെ നിരത്തിലിറക്കുന്നു. എക്സിക്യുട്ടീവ് ക്ലാസ് എന്നാണ് പുതിയ പേര്,വിമാനത്തെ അനുസ്മരിപ്പിക്കുന്ന അകത്തളമുള്ള ബസ് ആലപ്പുഴ-ബെംഗളൂരു പാതയിൽ ഞായറാഴ്ച ഓടിത്തുടങ്ങും.

ആലപ്പുഴയിൽനിന്ന് വൈകീട്ട് അഞ്ചരയ്ക്കു പുറപ്പെടുന്ന ബസ് വൈറ്റില, തൃശ്ശൂർ മണ്ണുത്തി ബൈപ്പാസ്, പാലക്കാട് ചന്ദ്രനഗർ, കോയമ്പത്തൂർ എൽ ആൻഡ് ടി ബൈപ്പാസ്, സേലം വഴി പിറ്റേദിവസം രാവിലെ 5.55-ന് ബെംഗളൂരുവിൽ എത്തും. ബെംഗളൂരുവിൽനിന്ന് രാത്രി എട്ടിനു പുറപ്പെടുന്ന സർവീസ് പിറ്റേന്ന് രാവിലെ എട്ടിന് ആലപ്പുഴയിൽ എത്തും