ഉത്തര കൊറിയന്‍ ഭരണാധികാരി കിം ജോങ് ഉന്നിന്റെ ആരോഗ്യനിലയുമായി ബന്ധപ്പെട്ട് നിരവധി അഭ്യൂഹങ്ങള്‍ നിലനിന്നിരുന്നു. കിം ജോങ് ഉന്നിന് മസ്തിഷ്‌ക മരണം സംഭവിച്ചെന്ന തരത്തിലും അഭ്യൂഹങ്ങള്‍ ഉണ്ടായിരുന്നു. എന്നാല്‍, എല്ലാ സംശയങ്ങള്‍ക്കും മറുപടിയായി മേയ് രണ്ടിന് കിം പൊതുവേദിയില്‍ പ്രത്യക്ഷപ്പെട്ടു. മൂന്ന് ആഴ്ച നീണ്ട അനിശ്ചിതത്വത്തിനൊടുവിലാണ് കിം പൊതുവേദിയില്‍ പ്രത്യക്ഷപ്പെട്ടത്. അതിനുശേഷം, വീണ്ടും ചില സംശയങ്ങള്‍ ഉയര്‍ന്നുവരികയുണ്ടായി. മേയ് രണ്ടിന് പൊതുവേദിയില്‍ പ്രത്യക്ഷപ്പെട്ടത് കിം ജോങ് അല്ലെന്നാണ് സാമൂഹ്യമാധ്യമങ്ങളില്‍ പലരും പറയുന്നത്. കിം ജോങ് ഉന്നിനെ പോലെ സാമ്യമുള്ള ഒരാളാണ് പൊതുവേദിയില്‍ പ്രത്യക്ഷപ്പെട്ടതെന്നാണ് സാമൂഹ്യമാധ്യമങ്ങളിലെ സംസാരം. മനുഷ്യാവകാശ പ്രവര്‍ത്തക ജെന്നിഫര്‍ സെങ് അടക്കം ഈ വിഷയത്തില്‍ രംഗത്തെത്തിയിരുന്നു. ഈ സാഹചര്യത്തില്‍ വീണ്ടും ഞാന്‍ ഇവിടെത്തന്നെ ഉണ്ട് എന്ന് വ്യക്തമാക്കിക്കൊണ്ട് കിം വരികയാണ്. കൊറോണ വൈറസിനെ നിയന്ത്രണവിധേയമാക്കുന്നതില്‍ ചൈന നേടിയ വിജയത്തെ പ്രശംസിച്ചുകൊണ്ടാണ് ഉത്തര കൊറിയന്‍ നേതാവ് കിം ജോങ് ഉന്‍. പ്രശംസ അറിയിച്ചുക്കൊണ്ട് ചൈനീസ് പ്രസിഡന്റ് ഷി ജിന്‍പിങിന് കിം വ്യക്തിപരമായ കത്തയച്ചതായി ഉത്തരകൊറിയ അറിയിച്ചു.

കൊറോണ മഹാമാരി ഉത്തരകൊറിയയുടെ സമ്പദ് വ്യവസ്ഥയെ തകര്‍ക്കുന്നുവെന്ന ദക്ഷിണകൊറിയന്‍ ചാര സംഘടനയുടെ വിലയിരുത്തലിന് പിന്നാലെയാണ് ഉത്തരകൊറിയന്‍ മാധ്യമങ്ങള്‍ ഇക്കാര്യം റിപ്പോര്‍ട്ട് ചെയ്തത്. 'അഭിനന്ദനം അര്‍ഹിക്കുന്നു, അഭൂതപൂര്‍വ്വമായ പകര്‍ച്ചവ്യാധിക്കെതിരായ യുദ്ധത്തില്‍ വിജയിക്കാനായത് വളരെ വിലമതിക്കുന്നു' കിം ചൈനീസ് പ്രസിഡന്റ് ഷി ജിന്‍പിങിനയച്ച കത്തില്‍ കുറിച്ചതായി ഉത്തരകൊറിയന്‍ സെന്‍ട്രല്‍ ന്യൂസ് ഏജന്‍സി പറയുന്നു.

അന്താരാഷ്ട്ര ഉപരോധങ്ങളും നയപരമായ പരാജയങ്ങളും നേരത്തെ തന്നെ തകര്‍ത്ത ഉത്തരകൊറിയന്‍ സമ്പദ് വ്യവസ്ഥ മഹാമാരി കൂടി വന്നതോടെ കൂടുതല്‍ തകര്‍ച്ചയിലെത്തിയതെന്നായിരുന്നു ദക്ഷിണകൊറിയന്‍ ചാര ഏന്‍സിയുടെ വിലയിരുത്തല്‍. ഉത്തരകൊറിയയും ഏറ്റവും പ്രധാനപ്പെട്ട സഖ്യവും സാമ്പത്തിക ഉറവിടവുമാണ് ചൈന. ഉത്തരകൊറിയയുടെ ബാഹ്യവ്യാപരത്തിന്റെ 90 ശതമാനവും ചൈനയുമായിട്ടാണ്. കോവിഡ് പശ്ചാത്തലത്തില്‍ അടുത്തിടെ ഇതില്‍ 55 ശതമാനം ഇടിവുണ്ടായതായാണ് ദക്ഷിണ കൊറിയയുടെ വിലയിരുത്തല്‍.


ഹൃദയ ശസ്ത്രക്രിയയെത്തുടര്‍ന്നു കിമ്മിനു മസ്തിഷ്‌കമരണം സംഭവിച്ചെന്ന മട്ടിലാണ് നേരത്തെ റിപ്പോര്‍ട്ടുകള്‍ പ്രചരിച്ചിരുന്നത്. ഏപ്രില്‍ 11-നുശേഷം കിം പൊതുവേദിയില്‍ പ്രത്യക്ഷപ്പെടാത്ത സാഹചര്യത്തിലാണ് ഊഹാപോഹങ്ങള്‍ പ്രചരിച്ചത്. കിം ഏപ്രില്‍ 15നു മുത്തച്ഛനും മുന്‍ സര്‍വാധിപതിയുമായ കിം ഇല്‍ സുരാഗിന്റെ ജന്മദിനാഘോഷത്തില്‍ പങ്കെടുത്തില്ല. ഉത്തരകൊറിയയിലെ ഒരു പ്രധാന ദേശീയാഘോഷദിനമാണിത്. ഇതോടെയാണ് കിം വാര്‍ത്തകളില്‍ നിറഞ്ഞത്. അതേസമയം, കിമ്മിന്റെ പ്രത്യേക ട്രെയിന്‍ രാജ്യത്തെ റിസോര്‍ട്ട് ടൗണായ വോന്‍സാനില്‍ പ്രത്യക്ഷപ്പെട്ടതായി റിപ്പോര്‍ട്ടുകളുണ്ടായിരുന്നു. വാഷിങ്ടണ്‍ കേന്ദ്രീകരിച്ച് പ്രവര്‍ത്തിക്കുന്ന ഉത്തരകൊറിയ മോണിറ്ററിങ് പ്രൊജക്ട് ഇതുസംബന്ധിച്ച സാറ്റലൈറ്റ് ചിത്രങ്ങള്‍ പുറത്തുവിട്ടിരുന്നു.

കിം കുടുംബത്തിനായി പ്രത്യേകം തയാറാക്കിയ സ്റ്റേഷനില്‍ ഏപ്രില്‍ 21 മുതല്‍ 23 വരെ ട്രെയിന്‍ പാര്‍ക്ക് ചെയ്തതായി ശനിയാഴ്ച പുറത്തുവിട്ട റിപ്പോര്‍ട്ടില്‍ പറയുന്നു. ഗ്രൂപ്പ് ട്രെയിന്‍ കിമ്മിന്റേതാണെന്ന് പറയുന്നുണ്ടെങ്കിലും ബ്രീട്ടിഷ് വാര്‍ത്താ ഏജന്‍സിയായ റോയിട്ടേഴ്‌സ് കിം നഗരത്തിലുണ്ടായിരുന്ന കാര്യം സ്ഥിരീകരിച്ചിരുന്നില്ല ട്രെയിനിന്റെ സാന്നിധ്യം കൊണ്ട് ഉത്തരകൊറിയന്‍ നേതാവിന്റെ ആരോഗ്യനിലയെ പറ്റി ഒരു സൂചനയും ലഭിച്ചിരുന്നില്ല. എന്നാല്‍, രാജ്യത്തിന്റെ കിഴക്കന്‍ തീരത്തുള്ള പ്രത്യേക മേഖലയിലാണ് കിം ഉള്ളതെന്ന റിപ്പോര്‍ട്ടുകള്‍ക്കാണ് പ്രാധാന്യമെന്നായിരുന്നു റോയിട്ടേഴ്‌സ് പറഞ്ഞത്. ഇതിന് മുന്‍പ് 2014-ല്‍ കിം ആറാഴ്ചയോളം പൊതുവേദിയില്‍ വന്നില്ല. പിന്നീട് ഒരു ചൂരല്‍വടിയുമായാണ് പ്രത്യക്ഷപ്പെട്ടത്. കാല്‍ക്കുഴയിലെ ഒരു മുഴ നീക്കംചെയ്യാന്‍ ശസ്ത്രക്രിയ നടത്തി എന്നാണ് പിന്നീട് വാര്‍ത്ത പുറത്തുവന്നത്.