ഗ്രീസിലെ ആതന്‍സ് നാഷണല്‍ ആര്‍ട്ട് ഗാലറിയില്‍ നിന്ന് 2012 യില്‍ മോഷ്ടക്കപ്പെട്ട കോടിക്കണക്കിന് രൂപ വിലവരുന്ന ചിത്രങ്ങള്‍ ഒന്‍പത് വര്‍ഷത്തിന് ശേഷം കണ്ടെത്തി. 20ാം നൂറ്റാണ്ടില്‍ ജീവിച്ച പാബ്ലോ പിക്കാസോ, പിയററ് മോണ്‍ട്രിയന്‍ എന്നിവരുടെ ചിത്രങ്ങളാണ് പൊലീസ് കണ്ടെത്തിയത്. രാജ്യത്തെ ഏറ്റവും വലിയ ആര്‍ട് ഗാലറിയായ ആതന്‍സ് ഗാലറിയില്‍ നിന്ന് 2012 ജനുവരി 9നാണ് ഇവ മോഷ്ടിക്കപ്പെട്ടത്.

ചിത്രങ്ങള്‍ പൊലീസിന്റെ പക്കലുണ്ടെന്ന് വാര്‍ത്താക്കുറിപ്പിലൂടെയാണ് ഗ്രീക്ക് പൊലീസ് അറിയിച്ചത്. എന്നാല്‍ ഇതേക്കുറിച്ച് കൂടുതല്‍ വിവരങ്ങള്‍ അറിവായിട്ടില്ല. ചിത്രങ്ങള്‍ നല്ല രീതിയില്‍ തന്നെയാണോ ഉളളതെന്നോ കേസില്‍ അറസ്റ്റ് രേഖപ്പെടുത്തിയിട്ടുണ്ടോ തുടങ്ങിയ വിവരങ്ങള്‍ ലഭ്യമല്ല. നാഷണല്‍ ആര്‍ട്ട് ഗാലറിയില്‍ നിന്നും ഗുഗ്ലിമോ കാഷ്യയുടെ പേന കൊണ്ട് വരിച്ച ഒരു ചിത്രവും മോഷ്ടിക്കപ്പെട്ടിരുന്നു.

2012 ജനുവരി 9ന് നാഷണലല്‍ ആര്‍ട്ട് ഗാലറിയില്‍ രണ്ടുപേര്‍ അതിക്രമിച്ച് കയറി ഫ്രെയിമുകളില്‍ നിന്ന് പെയിന്റിംഗുകള്‍ മുറിച്ചെടുത്ത് കടന്നുവെന്നാണ് പൊലീസിന്റെ കണക്ക് കൂട്ടല്‍. കേസുമായി ബന്ധപ്പെട്ട് 49 കാരനായ ഗ്രീക്ക്കാരനായ ഒരാളെ പോലീസ് അറസ്റ്റ് ചെയ്തു. എന്നാല്‍ പിന്നീട് കേസ് അന്വേഷണം മുന്നോട്ട് പോയില്ല. മോഷണത്തിന് ശേഷം ഗാലറിയുടെ സുരക്ഷാ സംവിധാനങ്ങള്‍ മെച്ചപ്പെടുത്തിയിരുന്നു. ലോകത്തിന്റെ വിധഭാഗത്തു നിന്നുള്ള കോടിക്കണക്കിന് രൂപ വിലവരുന്ന പ്രശസ്തരുടെ ചിത്രങ്ങളാണ് ഇവിടെ സൂക്ഷിച്ചിരിക്കുന്നത്.