പിറന്നാൾ ദിനത്തിൽ വാഹനാപകടത്തിൽ ദാരുണാന്ത്യം. വർക്കല ബൈപാസിൽ ബൈക്കിന് പിന്നിലിടിച്ച കാർ നിർത്താതെ പോവുകയായിരുന്നു.  യാത്രികരായ ഐടി ഉദ്യോഗസ്ഥർ അപകടത്തിൽ മരിച്ചു. എറണാകുളം വാഴപ്പള്ളി മുളവൂർ നിരപ്പ് വലിയവീട്ടുപറമ്പിൽ നവീൻ സിബി (25), സുഹൃത്ത് തൊടുപുഴ മുട്ടം മ്രാല അരിക്പുറത്ത് വീട്ടിൽ ഉമ്മൻ വർഗീസിന്റെ മകൾ മൃദുല ആൻ ഉമ്മൻ (25) എന്നിവരാണ് മരിച്ചത്. കഴക്കൂട്ടത്തെ യുഎസ്ടി ഗ്ലോബൽ കമ്പനിയിൽ ടെസ്റ്റിങ് വിഭാഗം ഉദ്യോഗസ്ഥനാണ് നവീൻ.

ബൈപാസിൽ തിരുവല്ലം ടോൾ പ്ലാസയ്ക്കു സമീപം ഇന്നലെ വൈകിട്ട് മൂന്നരയോടെയാണ് അപകടം. മൃദുലയും നവീനും കോളജ് പഠനകാലം മുതൽ സുഹൃത്തുക്കളായിരുന്നു. നവീനിന്റെ പിറന്നാൾ ദിനത്തിൽ ഇരുവരും ഒരുമിച്ച് ഉച്ചഭക്ഷണം കഴിക്കാനായി കോവളത്തേക്ക് പോകുകയായിരുന്നു . മൃദുല സംഭവസ്ഥലത്തും നവീൻ ആശുപത്രിയിലെത്തിച്ച ശേഷവുമാണ് മരിച്ചതെന്ന് തിരുവല്ലം പൊലീസ് പറഞ്ഞു.