താലിബാൻ അഫ്ഗാനിസ്ഥാൻ പിടിച്ചടക്കിയതോടെ എല്ലാ രാജ്യങ്ങളിലേക്കും അഭയാർത്ഥികൾ എത്തുകയാണ്... ഇന്ത്യയടക്കം നിരവധി രാജ്യങ്ങൾ സഹായവുമായി എത്തുമ്പോൾ ചില രാജ്യങ്ങൾ ഭയത്തിൽ പിന്മാറുകയാണ്. വർഷങ്ങൾക്ക് മുൻപ് ഗ്രീക്കിൽ സംഭവിച്ചത് ഇനി സംഭവിക്കാതിരിക്കാൻ അതിർത്തിയിൽ കൂറ്റൻ മതിലുകൾ ഉയർത്തിയിരിക്കുകയാണ്.

അഭയാര്‍ഥികള്‍ ഒഴുകാന്‍ സാധ്യത കണക്കിലെടുത്ത്​ അതിര്‍ത്തിയില്‍ 40 കിലോമീറ്റര്‍ നീളത്തില്‍ കൂറ്റന്‍ മതിലാണ് ഉയർത്തിയത്. 2015ല്‍ ആഭ്യന്തര സംഘർഷം രൂക്ഷമായ സിറിയയിൽ നിന്നും ഇറാഖിൽ നിന്നും നിരവധിപേരാണ് ഇവിടേക്ക് എത്തിയത്. ഇതിന് സമാനമായഅഭയാര്‍ഥി ഒഴുക്ക്​ ഇത്തവണ അഫ്​ഗാനിസ്​താനില്‍നിന്ന്​ സംഭവിക്കുമെന്നാണ്​ ഗ്രീസിന്‍റെ ആശങ്ക. ഈ സാഹചര്യത്തിലാണ്​ തുര്‍ക്കി അതിര്‍ത്തിയില്‍ കൂറ്റന്‍ മതിലുയര്‍ന്നത്​.

ആറു വര്‍ഷം മുന്നെ നടന്നതിന്‍റെ ആവര്‍ത്തനം ഇനിയും സംഭവിക്ക​രുതെന്ന്​ ഗ്രീക്​ പൗര സംരക്ഷണ മന്ത്രി മൈക്കലിസ്​ ക്രിസോകോയിഡിസ്​ വ്യക്തമാക്കി. അഫ്​ഗാനികളെ യൂറോപിലേക്ക്​ അതിര്‍ത്തി വഴി കടക്കാന്‍ അനുവദിക്കില്ലെന്നും തിരിച്ചയക്കുമെന്നും കഴിഞ്ഞയാഴ്ച ഗ്രീസ്​ വ്യക്​തമാക്കിയിരുന്നു. ''നിയമവിരുദ്ധ അഫ്​ഗാന്‍ കുടിയേറ്റക്കാര്‍ക്ക്​ യൂറോപിലേക്ക്​ വഴിയാകാന്‍ രാജ്യത്തെ അനുവദിക്കില്ല''- കുടിയേറ്റ മന്ത്രി നോടിസ്​ മിറ്ററാഷി പറഞ്ഞു.

രണ്ടായിരത്തി പതിനഞ്ചിലെ സംഘർഷത്തിൽ ഒരു വർഷത്തിനിടെ പത്തുലക്ഷത്തോളംപേരാണ് യൂറോപിലേക്ക്​ തുര്‍ക്കി വഴി കടന്നിരുന്നത്​. പലരും ബോട്ടുകളില്‍ ഈജിയന്‍ കടല്‍ കടന്നായിരുന്നു യാത്ര. അഭയാര്‍ഥികള്‍ വരുന്നത്​ നിരീക്ഷിക്കാന്‍ 40 കിലോമീറ്റര്‍ മതിലുയര്‍ത്തിയ ഗ്രീസ്​ അത്യാധുനിക നിരീക്ഷണ സംവിധാനവും ഏർപ്പെടുത്തിയിരിക്കുകയാണ്.