ഇഷ്ടമുള്ളയാളെ മകള്‍ വിവാഹം ചെയ്തതിന്റെ പേരില്‍ കുടുംബത്തിലെ ഏഴ് പേരെ ചുട്ടുകൊന്ന് പിതാവ്. പാകിസ്ഥാനിലെ മുസാഫര്‍ഗഘട്ടിലാണ് ഞെട്ടിക്കുന്ന സംഭവം നടന്നത്. പെണ്‍മക്കളും പേരക്കുട്ടികളുമടക്കമുള്ള ഏഴ് പേരെയാണ് പിതാവ് കൊന്നത്. ഇന്‍ഡിപെന്റന്റ് റിപ്പോര്‍ട്ട് അനുസരിച്ച്, പാകിസ്ഥാനിലെ പഞ്ചാബ് പ്രവിശ്യയിലുള്ള മുസാഫര്‍ഘട്ട് സ്വദേശിയായ മന്‍സൂര്‍ ഹുസൈന്‍ എന്നയാളാണ് ദുരഭിമാനക്കൊല നടത്തിയത്. പെണ്‍മക്കളായ ഫൗസിയ ബീവി, ഖുര്‍ഷിദ് മായ് എന്നിവര്‍ക്കൊപ്പമായിരുന്നു ഇയാള്‍ താമസിച്ചിരുന്നത്.

ഫൗസിയയുടെ മാസങ്ങള്‍ മാത്രം പ്രായമുള്ള കുഞ്ഞും ഖുര്‍ഷിദിന്റെ ഭര്‍ത്താവും എല്ലാം ഒരേ വീട്ടിലായിരുന്നു താമസം. ഖുര്‍ഷിദിന് നാല് കുട്ടികളാണുള്ളത്. പിതാവിന്റെ ക്രൂരതയില്‍ ഫൗസിയയും പിഞ്ചു കുഞ്ഞും ഖുര്‍ഷിദും ഭര്‍ത്താവും ഇവരുടെ നാല് മക്കളുമാണ് കൊല്ലപ്പെട്ടത്.
ആകെ രക്ഷപ്പെട്ടത് ഫൗസിയയുടെ ഭര്‍ത്താവ് മെഹബൂബ് അഹമ്മദ് മാത്രമാണ്. മെഹബൂബാണ് ഫൗസിയയുടെ പിതാവിനും സഹോദരനുമെതിരെ പൊലീസില്‍ പരാതി നല്‍കിയത്. രണ്ട് പെണ്‍മക്കളും ഒരു ആണ്‍കുട്ടിയുമാണ് മന്‍സൂര്‍ ഹുസൈന് ഉള്ളത്. പെണ്‍മക്കളില്‍ ഒരാള്‍ തന്‌റെ താത്പര്യത്തിന് വിരുദ്ധമായി വിവാഹം കഴിച്ചതാണ് കൊലപാതകത്തിന് കാരണമെന്ന് ഫൗസിയയുടെ ഭര്‍ത്താവിന്റെ പരാതിയില്‍ പറയുന്നു.
സംഭവ സമയത്ത് മെഹബൂബ് അഹമ്മദ് വീട്ടില്‍ ഉണ്ടായിരുന്നില്ല. മുല്‍ട്ടാനില്‍ ബിസിനസ് ആവശ്യത്തിനായി പോയിരിക്കുകയായിരുന്നു ഇദ്ദേഹം. തിരിച്ചെത്തിയപ്പോഴാണ് വീട് അഗ്‌നിക്കിരയാക്കിയതായി കാണുന്നത്. സമീപത്ത് മന്‍സൂര്‍ ഹുസൈനും മകന്‍ സാബിര്‍ ഹുസൈനും ഉണ്ടായിരുന്നുവെന്ന് മെഹബൂബ് പൊലീസിനോട് പറഞ്ഞു.