ലോകം മുഴുവൻ ബില്യൺ ആരാധകരുള്ള സംഗീത ബാൻഡ് ആണ് ബിടിഎസ്. കെപോപ്, കെഡ്രാമ എന്നിങ്ങനെ കൊറിയൻ സംഗീതത്തിനും ഡ്രാമകൾക്കും ലോകമെമ്പാടും ആരാധകർ ഉണ്ടെങ്കിലും ബിടിഎസിനോട് എന്നും പ്രത്യേക താല്പര്യമാണ് ഏവർക്കും. ബിടിഎസിന്റെ പുതിയ വീഡിയോകൾക്കായി ഏറെ ആകാംക്ഷയോടെയാണ് ആരാധകർ കാത്തിരിക്കുന്നത്. ഇറങ്ങുന്ന ഓരോ ആൽബവും റെക്കോർഡുകൾ സൃഷ്ടിച്ചുകൊണ്ട് ഹിറ്റ് ചാർട്ടുകളിൽ മുന്നേറുകയാണ് പതിവ്. എന്നാൽ ഇപ്പോഴിതാ ഈ ആരാധകരെയെല്ലാം നിരാശയിലാഴ്ത്തുന്ന വെളിപ്പെടുത്തലാണ് ബിടിഎസ് നടത്തിയിരിക്കുന്നത്.

തങ്ങൾ പുറത്തിറക്കാൻ തയ്യാറാക്കി വച്ചിരുന്ന പാട്ടിന്റെ ഫയൽ നഷ്ടപ്പെട്ടു പോയി എന്ന വിവരമാണ് ഇപ്പോൾ ബാൻഡ് പുറത്തു വിട്ടിരിക്കുന്നത്. ബാൻഡിലെ ലീഡർ ആർഎം (കിം നാജൂൻ) ആണ് ഇക്കാര്യം ലോകത്തെ അറിയിച്ചത്. കമ്പ്യൂട്ടറിലെ ചില ഡോക്യുമെന്റുകൾ നീക്കം ചെയ്യുന്നതിനിടെ അബദ്ധത്തിൽ പുതിയ പാട്ടിന്റെ ഫയലുകളും ഡിലീറ്റ് ആയിപ്പോയെന്നും പൂർണമായും തന്റെ ഭാഗത്തു നിന്നുണ്ടായ തെറ്റാണതെന്നും ആർഎം ആരാധകരോട് പറയുന്നു.

ആ പാട്ട് നശിച്ചു പോയെന്നും ഇനിയൊരു വീണ്ടെടുപ്പില്ലെന്നും കുറിച്ച ആർഎം, തന്റെ ജീവിതത്തിലെ ഏറ്റവും മോശം ദിവസമായിരുന്നു ഇതെന്നും താരം കൂട്ടിച്ചേർത്തു. നഷ്ടപ്പെട്ടുപോയ ഫയലിൽ പാട്ടിന്റെ അറുപതോളം ഓഡിയോ ട്രാക്കുകളും നഷ്ടപ്പെട്ടെന്നും അതുകൊണ്ടു തന്നെ ഇനി ആ പാട്ടിനെ പുനസൃഷ്ടിക്കുക സാധ്യമല്ലെന്നും ആർഎം വെളിപ്പെടുത്തി. ഇക്കാര്യം അറിയിച്ചതിന് പിന്നാലെ നിരവധി പേരാണ് ആശ്വാസവാക്കുകളുമായി സമൂഹമധ്യമങ്ങളിലൂടെയും അല്ലാതെയും എത്തുന്നത്. ബിടിഎസിന്റെ കഠിനാധ്വാനം വിഫലമായതിൽ പലരും ദുഃഖം രേഖപ്പെടുത്തിയിരിക്കുകയാണ്.

അതേസമയം കഴിഞ്ഞ വര്‍ഷം ഏപ്രിലില്‍ പുറത്തിറങ്ങിയ 'ഡൈനമൈറ്റ്' എന്ന മ്യൂസിക് വീഡിയോയിലൂടെ ലോകമെമ്പാടുമുള്ള സംഗീതാസ്വാദകര്‍ക്കിടയില്‍ തരംഗം തീർക്കാൻ ബിടിഎസിന് സാധിക്കുകയും ചെയ്‌തിരുന്നു. ഈ മ്യൂസിക് വീഡിയോയിലൂടെ തങ്ങളുടെതന്നെ മുന്‍ റെക്കോര്‍ഡാണ് ബിടിഎസ് മറികടന്നത്. കെ പോപ്പ് മേഖലയിൽ നിന്ന് ലോകോത്തര തലത്തിൽ ഉയർന്നു വന്ന ആദ്യ ബാൻഡാണിത്. ബാങ്താൻ സൊന്യോന്ദാൻ അഥവാ ബുള്ളറ്റ് പ്രൂഫ് ബോയ് സ്കൗട്ട്സ് എന്നാണ് മുഴുവൻ പേര്.

ആർഎം, ജെ-ഹോപ്പ്, ജിൻ, സുഗ, പാർക്ക് ജി-മിൻ, വി, ജംഗ്കൂക്ക് എന്നീ ഏഴ് പേരാണ് ബാൻഡിൽ ഉള്ളത്. ഇവരുടെ ഓരോ പുതിയ പാട്ടുകളും ബിൽബോർഡിൽ ഇടംപിടിച്ചു കഴിഞ്ഞു. ഏറ്റവും ഒടുവിലായി റോക്ക് ബാൻഡായ കോൾഡ് പ്ലേയ്ക്കൊപ്പം ചേർന്ന് പുറത്തിറക്കിയ മൈ യൂണിവേഴ്സ് ബിൽബോർഡ് ചാർട്ടിൽ ഒന്നാമതാണ് ഉള്ളത്.