പുതുവർഷം പുലരാൻ ഇനി ഏതാനും മണിക്കൂറുകൾ മാത്രമേ ബാക്കിയുള്ളൂ. ന്യൂ ഇയർ പാർട്ടികളിലേക്കാണ് ഇനി പലരും കടക്കുക. ഒമിക്രോൺ വ്യാപന സാധ്യത കണക്കിലെടുത്ത് എല്ലായിടങ്ങളിലും ആഘോഷങ്ങൾക്കെല്ലാം നിയന്ത്രണങ്ങൾ ഏർപ്പെടുത്തിയിട്ടുണ്ട്. നിയന്ത്രണങ്ങൾ ഉള്ളതിനാൽ തന്നെ സുഹൃത്തുക്കളുടെയോ ബന്ധുക്കളുടെയോ ഒക്കെ വീടുകളിലായിരിക്കും ഇത്തവണ ന്യൂ ഇയർ ആഘോഷം. ഈ പുതുവർഷത്തിൽ ഇത്തരം ഹൗസ് പാർട്ടികളിൽ പങ്കെടുക്കാൻ‍ തീരുമാനിച്ചിരിക്കുന്നവർ ചില കാര്യങ്ങൾ ശ്രദ്ധിക്കേണ്ടതുണ്ട്. അവ എന്തൊക്കെയാണെന്ന് നോക്കാം.

ഹൗസ് പാർട്ടികളിൽ പങ്കെടുക്കുന്നവർ സ്ത്രീ പുരുഷ ഭേദമന്യേ മദ്യം ഉപയോഗിക്കാറുണ്ട്. പലയിടത്തും ഈ പാർട്ടികളിൽ വ്യാപകമായി ഡ്രിങ്ക് സ്പൈക്കിങ് നടക്കുന്നുണ്ടെന്ന പരാതിയും പൊലീസിന് ലഭിക്കുന്നുണ്ട്.മദ്യമോ മറ്റെന്തെങ്കിലും സോഫ്റ്റ് ഡ്രിങ്കോ കുടിച്ചുകൊണ്ടിരിക്കുമ്പോൾ കുടിക്കുന്നയാൾ അറിയാതെ അതിലേക്ക് സ്വബോധം മറയാൻ കാരണമാവുന്ന പൊടി രൂപത്തിലോ ദ്രാവക രൂപത്തിലോ ഗുളിക രൂപത്തിലോ ഉള്ള ഏതെങ്കിലും മയക്കുമരുന്നുകൾ കലർത്തുന്ന രീതിയാണ് ഡ്രിങ്ക് സ്പൈക്കിങ് എന്ന് അറിയപ്പെടുന്നത്.

യുകെ കേന്ദ്രീകരിച്ച് പ്രവർത്തിക്കുന്ന ദ് ആൽക്കഹോൾ എഡ്യൂക്കേഷൻ ട്രസ്റ്റ് നടത്തിയ പഠനങ്ങൾ തെളിയിക്കുന്നത് ന്യൂ ഇയർ പാർട്ടികളിൽ നടക്കുന്ന ഡ്രിങ്ക് സ്പൈക്കിങ്ങിൽ 35 ശതമാനവും നടക്കുന്നത് ഹൗസ് പാർട്ടികളിൽ ആണെന്നാണ്. ഹൗസ് പാർട്ടികളിൽ‍ പലപ്പോഴും സ്നേഹിതരും പരിചയക്കാരും ആണ് ചുറ്റുമുണ്ടാവുക എന്നത് നമ്മു‌ടെ സ്വാഭാവികമായ ജാഗ്രതയ്ക്ക് ഒരൽപ്പം കുറവ് വരുത്തിയേക്കാം. വീടുകളിൽ പലതിലും സിസിടിവി നിരീക്ഷണം ഉണ്ടാവില്ലയെന്നതും കുറ്റവാളികളുടെ ആത്മവിശ്വാസം വർധിപ്പിച്ചേക്കാം.

ഇൻഡിപെൻഡന്റ് എന്ന് പേരുള്ള പത്രം അടുത്തിടെ നടത്തിയ ഒരു പഠനം പറയുന്നത് യുകെയിലെ ഒൻപതു സ്ത്രീകളിൽ ഒരാളുടെയെങ്കിലും ഡ്രിങ്ക് ജീവിതത്തിൽ ഒരിക്കൽ എങ്കിലും സ്പൈക്ക് ചെയ്യപ്പെട്ടിട്ടുണ്ട് എന്നാണ്. യുകെയിൽ മൂന്നിൽ ഒരാളെങ്കിലും ഇത്തരത്തിൽ സ്പൈക്ക് ചെയ്യപ്പെട്ട റേപ്പിന് ഇരയായവരെപ്പറ്റി കേട്ടിട്ടുണ്ട്. കഴിഞ്ഞ മാസങ്ങളിൽ യുകെയിൽ നടന്നിട്ടുള്ളത് ഡ്രിങ്ക് സ്പൈക്കിങ്ങുമായി ബന്ധപ്പെട്ടുള്ള 200 ലധികം കുറ്റകൃത്യങ്ങളാണെന്നതും ഞെട്ടിക്കുന്ന റിപ്പോർട്ടാണ്.

സ്പൈക്ക് ചെയ്യപ്പെടാതിരിക്കാൻ ശ്രദ്ധിക്കാവുന്ന മുൻകരുതലുകൾ...

* ഡ്രിങ്ക് ഒഴിക്കുന്നത് കൃത്യമായി നിരീക്ഷിക്കുക.
* അപരിചിതരിൽ നിന്ന് ഡ്രിങ്ക് വാങ്ങി കു‌ടിക്കാതിരിക്കുക.
* സ്വന്തം ഡ്രിങ്ക് ഒരിക്കലും മേശപ്പുറത്തോ മറ്റെവിടെയെങ്കിലുമോ വച്ചിട്ട് എങ്ങോട്ടും പോകാതെയിരിക്കുക.
* മറ്റൊരാളുടെ കൈയ്യിലുള്ള ഡ്രിങ്ക് രുചിക്കാതെയിരിക്കുക
* കുടിക്കുന്ന ഡ്രിങ്കിന് സ്വാദ് വ്യത്യാസം തോന്നിയാൽ കമഴ്ത്തി കളയുക.

ഡ്രിങ്ക് സ്പൈക്ക് ചെയ്തെന്ന് തോന്നിയാൽ ചെയ്യേണ്ടത്

* കൂടുതൽ അളവിൽ മദ്യപിക്കാതെ തന്നെ സ്വബോധം നഷ്ടമാവുന്ന പോലെ തോന്നിയാൽ ഉടനെ തന്നെ വിശ്വസിക്കാവുന്ന ഏതെങ്കിലും സുഹൃത്തുക്കളെയോ, പാർട്ടി നടക്കുന്ന വേദിയിലെ മാനേജ്‌മെന്റിനെയോ വിവരം അറിയിക്കുക.

* സംശയം തോന്നിയാൽ നിങ്ങളുടെ ഏറ്റവും അടുത്ത സുഹൃത്തിനെ ഫോണിൽ വിളിച്ച് കാര്യം പറയുക, ലൈവ് ലൊക്കേഷൻ ഷെയർ ചെയുക.

* എത്രയും പെട്ടെന്ന് സ്വന്തം വീട്ടിലേക്കോ, സുരക്ഷിതമായ മറ്റേതെങ്കിലും ഇടത്തിലേക്കോ മാറുക.

* പൊലീസിൽ വിവരമറിയിക്കുക, അങ്ങനെ വിളിച്ചു വിവരം പറയാനുള്ള എമർജൻസി നമ്പർ പാർട്ടിക്ക് പുറപ്പെടും മുമ്പ് തന്നെ മൊബൈലിൽ ഫീഡുചെയ്യുക.