പൂച്ചകള്‍ പൊതുവേ ശാന്ത സ്വഭാവക്കാരും മനുഷ്യരോട് അടുത്തിടപെഴകുന്നവരുമാണ്. എന്നാല്‍ പൂച്ച കാരണം ആകെ പൊല്ലാപ്പ് പിടിച്ചിരിക്കുകയാണ് ഒരു നഗരം. ദക്ഷിണകൊറിയയില്‍ കഴിഞ്ഞ മൂന്ന് വര്‍ഷത്തിനിടെ പൂച്ചകള്‍ കാരണം നൂറിലേറെ വീടുകള്‍ക്കാണ് തീപിടിച്ചത്. സോളിലെ മെട്രോപൊളിറ്റന്‍ ഫയര്‍ ആന്‍ഡ് ഡിസാസ്റ്റര്‍ മാനേജ്‌മെന്റ് ആണ് ഇക്കാര്യം വ്യക്തമാക്കിയിരിക്കുന്നത്.


2019 ജനുവരി മുതല്‍ കഴിഞ്ഞ നവംബര്‍ വരെ ആകെ 107 വീടുകളിലുണ്ടായ തീപിടിത്തത്തിന് കാരണമായത് പൂച്ചകളാണെന്നതാണ് പ്രധാനപ്പെട്ട കാര്യം. തലസ്ഥാന നഗരമായ സോളിലാണ് ഇത്തരം കേസുകള്‍ കൂടുതലും.

ഇതില്‍ പൂച്ചകള്‍ ഓണ്‍ ചെയ്‌തെന്ന് കരുതുന്ന ഇലക്ട്രിക് സ്റ്റൗവില്‍ നിന്ന് തീപടര്‍ന്ന് അപകടം സംഭവിച്ച കേസുകളാണ് കൂടുതലും. ടച്ച് സെന്‍സിറ്റീവ് ബട്ടണുകളാല്‍ പ്രവര്‍ത്തിക്കുന്ന അടുപ്പുകളിലേക്ക് പൂച്ചകള്‍ ചാടി വീഴുന്നതാണ് ഓണ്‍ ആകാനുള്ള പ്രധാന കാരണമായി ചൂണ്ടിക്കാണിക്കുന്നത്. ഇവ അമിതമായി ചൂടാകുന്നത് തീപിടിത്തത്തിലേക്ക് എത്തുന്നു.


പലപ്പോഴും ഉടമകള്‍ വീട്ടിലില്ലാത്ത നേരത്താണ് തീപിടിത്തം ഉണ്ടായിരിക്കുന്നതും. നാല് പേര്‍ക്ക് ഈ അപകടങ്ങളില്‍ നിന്ന് പരിക്കേറ്റിട്ടുണ്ടെങ്കിലും ആളപായമില്ല.

പൂച്ചകളുമായി ബന്ധപ്പെട്ട തീപിടിത്ത കേസുകള്‍ സമീപകാലത്ത് തുടരുകയാണെന്നും വീട്ടില്‍ ആരുമില്ലാത്ത സമയത്ത് തീ വ്യാപകമായി പടരാന്‍ സാധ്യതയുള്ളതിനാല്‍ വളര്‍ത്തുമൃഗങ്ങളുള്ള വീട്ടുകാര്‍ കൂടുതല്‍ ശ്രദ്ധ ചെലുത്തണമെന്നും അധികൃതര്‍ പറയുന്നു. വേഗത്തില്‍ തീപിടിക്കാന്‍ സാധ്യതയുള്ള വസ്തുക്കള്‍ വളര്‍ത്തുമൃഗങ്ങളില്‍ നിന്ന് മാറ്റി സ്ഥാപിക്കണമെന്നും അധികൃതര്‍ വ്യക്തമാക്കുന്നുണ്ട്.


ദക്ഷിണ കൊറിയയില്‍ മാത്രമല്ല അമേരിക്കയില്‍ ഓരോ വര്‍ഷവും 1000ത്തോളം വീടുകളിലെ തീപിടിത്തങ്ങളുടെ ഉത്തരവാദി വളര്‍ത്തുമൃഗങ്ങള്‍ ആണെന്നാണ് അമേരിക്കന്‍ ഹ്യൂമന്‍ അസോസിയേഷന്റെ കണക്കുകള്‍ സൂചിപ്പിക്കുന്നത്.