ഈ വണ്ടുകളേ കൊണ്ട് തോറ്റു! റോഡും വീടും ഓടയും വരെ കൈയ്യടക്കി വണ്ടുകള്: പുറത്തിറങ്ങാന് പോലും കഴിയാതെ ജനങ്ങള്
വണ്ടുകളേ കൊണ്ട് നിറഞ്ഞിരിക്കുകയാണ് ഒരു ഗ്രാമം മുഴുവന്. വണ്ടുകള് കാരണം പുറത്തിറങ്ങാനോ സൈ്വര്യജീവിതം നടത്താനോ പോലും ആളുകള്ക്ക് ഇപ്പോള് കഴിയുന്നില്ല.
അര്ജന്റീനയിലെ സാന്റ ഇസബെല് എന്ന നഗരത്തില് താമസിക്കുന്നവര്ക്കാണ് ഈ ദുരിത ജീവിതം. ഇപ്പോള് കോടിക്കണക്കിന് വണ്ടുകളാണ് നഗരത്തിന്റെ മുക്കിലും മൂലയിലും കയ്യേറിയിരിക്കുന്നത്. കഴിഞ്ഞ രണ്ടാഴ്ചയ്ക്കിടെയാണ് സ്ഥിതി ഗുരുതരമായിരിക്കുന്നത്.
നഗരത്തില് റോഡ് പോലും കാണാനാകാത്ത സ്ഥിതിയിലാണ് വണ്ടുകള് മൂടിയിരിക്കുന്നത്. വീടുകളിലും കടകളിലും വാഹനങ്ങളിലുമെല്ലാം ഇവ കൂട്ടം കൂട്ടമായി കടന്നു കയറിയിരിക്കുകയാണ്. ഇതിന്റെ ചിത്രങ്ങളും വിഡിയോയും എല്ലാം സമൂഹമാധ്യമങ്ങളില് വ്യാപകമായി പ്രചരിക്കുന്നുണ്ട്.
ഒന്നിലധികം നിലകളുള്ള കെട്ടിടങ്ങളുടെ മുകള് നിലകളിലേക്കും ഇവ എത്തിയിട്ടുണ്ട്. വെള്ളം ഒഴുക്കി വിടാനുള്ള സംവിധാനങ്ങളിലും ഇവ കൂട്ടമായി ഇടം പിടിച്ചത് കാരണം ഡ്രെയിനേജ് സംവിധാനവും തടസപ്പെട്ട നിലയിലാണ്.
പൊലീസ് സ്റ്റേഷനുകള് ഉള്പ്പെടെ ഉള്ള സ്ഥലങ്ങള് ഇവയുടെ ആക്രമണത്തില് വലഞ്ഞിരിക്കുകയാണിപ്പോള്. വണ്ടുകള് വെളിച്ചം കണ്ട് ആകൃഷ്ടരാകാനുള്ള സാധ്യത ഒഴിവാക്കുന്നതിനായി സ്ട്രീറ്റ് ലൈറ്റുകളും പൊതു ഉടമസ്ഥതയിലുള്ള കെട്ടിടങ്ങളിലെ ലൈറ്റുകളും ഒന്നും പ്രവര്ത്തിപ്പിക്കുന്നില്ല.
വീടുകള്ക്കുള്ളില് കയറുന്ന വണ്ടുകളെ വാരിക്കൂട്ടി പെട്ടികളിലാക്കി ദൂരെയുള്ള സ്ഥലങ്ങളില് കൊണ്ടുകളയുകയാണ് ഇവിടെയുള്ളവരിപ്പോള്. അര്ജന്റീനയില് കാലം തെറ്റി പെയ്ത മഴയും വീശിയടിച്ച ഉഷ്ണക്കാറ്റും ചെറുപ്രാണികളുടെ പ്രജനനത്തിന് അനുയോജ്യമായ കാലാവസ്ഥ ഒരുക്കിയിരുന്നു. ഇതാണ് വണ്ടുകളുടെ കൂട്ടപ്പെരുകലിന് കാരണമെന്നാണ് നിഗമനം.
https://www.facebook.com/Malayalivartha
