രാജ്യത്ത് ഒമിക്രോൺ വ്യാപനത്തിന്റെ പശ്ചാത്തലത്തിൽ കൊവിഡ് നിയന്ത്രണങ്ങൾ കർശനമാക്കിയതിനാൽ ഞായറാഴ്ച നടക്കാനിരുന്ന തന്റെ വിവാഹം മാറ്റി വയ്ക്കുന്നുവെന്ന് ന്യൂസിലാന്റ് പ്രധാനമന്ത്രി ജെസീന്ത ആർഡേൺ. തന്റെ വിവാഹ ചടങ്ങുകൾ നടക്കില്ല. ന്യൂസിലാന്റിലെ സാധാരണ ജനങ്ങളും താനും തമ്മില്‍ വ്യത്യാസമൊന്നുമില്ല. കൊവിഡ് കാരണം സമാനമായ അനുഭവം ഉണ്ടായവര്‍ക്കൊപ്പം താനും ചേരുന്നു. ഇതേ അവസ്ഥ ഉള്ളവരോട് ക്ഷമ ചോദിക്കുന്നു.

ഈ മഹാമാരി നിരവധി പ്രശ്നങ്ങൾക്കാണ് കാരണമായത്. അതിൽ പ്രധാനപ്പെട്ട ഒന്നാണ് പ്രിയപ്പെട്ട ഒരാളുമായി ജീവിക്കാൻ കഴിയാതെ വരുന്നത്. പക്ഷേ വർദ്ധിച്ചുവരുന്ന ഈ കൊവിഡ് വ്യാപനം നമുക്ക് നിയന്ത്രിക്കണമെന്നും ജെസിന്ത ആർഡേൺ വ്യക്തമാക്കി. പുതിയ നിയന്ത്രണങ്ങൾ വിശദീകരിച്ച ശേഷം പ്രധാനമന്ത്രി ജെസീന്ത ആര്‍ഡേണ്‍ പറഞ്ഞു.

പൂര്‍ണമായും വാക്‌സിനെടുത്ത 100 പേരെ പങ്കെടുപ്പിച്ച് ചടങ്ങ് നടത്താമെന്നിരിക്കിലും വിവാഹം മാറ്റിവയ്ക്കാന്‍ ജെസീന്ത തീരുമാനിക്കുകയായിരുന്നു. ടെലിവിഷന്‍ അവതാരകനായ ക്ലാര്‍ക്ക് ഗേഫോഡാണ് ജെസീന്തയുടെ വരന്‍. മൂന്നു വയസുള്ള ഒരു മകളും ഇവര്‍ക്കുണ്ട്. അടുത്തകാലത്താണ് തങ്ങള്‍ വിവാഹിതരാകാന്‍ പോകുന്നുവെന്ന് ഇരുവരും അറിയിച്ചത്. പൊതുസ്ഥലത്തും വ്യാപാര സ്ഥാപനങ്ങളിലുമടക്കം മാസ്ക് നിർബന്ധമാണ്.

ന്യൂസിലൻഡിൽ ബന്ധുവിൻ്റെ വിവാഹത്തിന് എത്തിയ കുടുംബത്തിലെ ഒമ്പത് പേർക്കും അവർ സഞ്ചരിച്ച വിമാനത്തിലെ ജീവനക്കാരനും ഒമിക്രോൺ സ്ഥരീകരിച്ച പശ്ചാത്തലത്തിലാണ് രാജ്യത്ത് നിയന്ത്രണങ്ങൾ ശക്തമാക്കിയത്. രാജ്യത്ത് കൊവിഡ് വ്യാപനം രൂക്ഷമായിരിക്കെ ജെസീന്തയുടെ നേതൃത്വത്തിൽ മികച്ച രീതിയിലുള്ള പ്രതിരോധ പ്രവർത്തനങ്ങളാണ് നടന്നത്. വാക്സിനേഷൻ വേഗത്തിലാക്കിയതിനൊപ്പം മികച്ച പ്രതിരോധ പ്രവർത്തനങ്ങളാണ് സർക്കാർ നടത്തിയത്.