കഴിഞ്ഞ ഏതാനും ആഴ്ചകളായി ഹൂതി വിമതര്‍ യുഎഇയില്‍ നടത്തിയ മിസൈല്‍, ഡ്രോണ്‍ ആക്രമണങ്ങള്‍ മേഖലയുടെ ഭൗമരാഷ്ട്രീയ സാഹചര്യത്തെ മുമ്പെങ്ങും ഇല്ലാത്ത വിധം പ്രക്ഷുബ്ധമാക്കിയിരിക്കുകയാണ്. ഇറാന്റെ പിന്തുണയോടു കൂടെ ഹൂതികള്‍ യൂ എ ഇ ക്കെതിരെ നടത്തുന്ന സായുധ ആക്രമണങ്ങള്‍ മേഖലയുടെ സമാധാന അന്തരീക്ഷത്തെ തകര്‍ത്തിരിക്കുകയാണ്. ഈ ഒരു സാഹചര്യത്തില്‍ ഇതു വരെ നടത്താത്ത കളികള്‍ക്ക് ഇറങ്ങി പുറപ്പെട്ടിരിക്കുകയാണ് യൂ എ ഇ.


ഹൂത്തികള്‍ക്കെതിരെയുള്ള സായുധ സംഘര്‍ഷത്തില്‍ ഇസ്രായേല്‍ - ഇന്ത്യ സംയുക്ത സംരംഭം ആയ ബരാക് -8 , ബരാക് ഇ ആര്‍ മിസ്സൈലുകളെ രംഗത്തിറക്കാന്‍ ചര്‍ച്ചകള്‍ നടത്തിയിരിക്കുകയാണ് യു എ ഇ

ഹൂത്തികള്‍ നടത്തിയ ഡ്രോണ്‍, മിസൈല്‍ ആക്രമണത്തില്‍ കഴിഞ്ഞയാഴ്ച മൂന്ന് സിവിലിയന്‍മാര്‍ കൊല്ലപ്പെട്ടതിന്റെ സാഹചര്യത്തില്‍ ''ഏത് ഭീഷണികളെയും നേരിടുമെന്ന് ' യുഎഇ പ്രതിജ്ഞയെടുത്തിരുന്നു. ഈ ഒരു പശ്ചാത്തലത്തിലാണ് ചര്‍ച്ചകള്‍ നടക്കുന്നത് .


ഇസ്രയേലിനേയും അത് വഴി പരോക്ഷമായി ഇന്ത്യയെയും കളത്തിലിറക്കാന്‍ തന്നെയാണ് യൂ എ ഇ തീരുമാനിച്ചിരിക്കുന്നത്. അതും മിസൈലുകളുടെ രൂപത്തില്‍.



അബുദാബിയും ഇസ്രയേലും തമ്മില്‍ രഹസ്യ ചര്‍ച്ചകള്‍ നടന്നു കൊണ്ടിരിക്കുകയാണ് എന്നാണ് അന്താരാഷ്ട്ര മാധ്യമങ്ങള്‍ റിപ്പോര്‍ട്ട് ചെയ്യുന്നത്


2024-ല്‍ ദക്ഷിണ കൊറിയയുടെ ഉപരിതല- ആകാശ മിസൈല്‍ സംവിധാനം ലഭിക്കുന്നതുവരെ ഇസ്രായേലി ആയുധങ്ങള്‍ ഒരു താത്കാലിക പ്രതിരോധ നടപടിയായി ഉപയോഗിക്കുമെന്നാണ് അന്താരാഷ്ട്ര മാധ്യമമായ ബ്രേക്കിംഗ് ഡിഫെന്‍സ് പുറത്തു വിട്ട റിപ്പോര്‍ട്ട് സൂചിപ്പിക്കുന്നത് .


ഏതാനും ആഴ്ചകള്‍ക്ക് മുമ്പാണ് ദക്ഷിണ കൊറിയയുമായി അബുദാബി 3.5 ബില്യണ്‍ ഡോളറിന്റെ കരാറില്‍ ഒപ്പുവെച്ചത് , സൗത്ത് കൊറിയന്‍ നിര്‍മ്മിതമായ ചിയോംഗംഗ് കക മിഡ്-റേഞ്ച് സര്‍ഫസ്-ടു-എയര്‍ മിസൈല്‍ ആയുധ സംവിധാനം സ്വന്തമാക്കാന്‍ ആയിരിന്നു ഈ കരാര്‍ , എന്നാല്‍ 2024-ന് മുമ്പ് ഈ സംവിധാനം നിലവില്‍ യു എ ഇ സര്‍ക്കാരിന്റെ കയ്യില്‍ എത്തില്ല . അതിനാല്‍ തന്നെ മേഖലയില്‍ നില നില്‍ക്കുന്ന അടിയന്തര പ്രശ്‌നത്തിന് ഇടക്കാല പരിഹാരം എന്ന നിലയില്‍ ഒരു ഇസ്രായേലി സംവിധാനം വിന്യസിക്കുവാനാണ് യൂ എ ഇ ആലോചിക്കുന്നത് ബന്ധപ്പെട്ട വൃത്തങ്ങള്‍ വ്യക്തമാക്കി


ഒരു താല്‍ക്കാലിക നടപടിയെന്ന നിലയില്‍ - റാഫേല്‍ സ്‌പൈഡര്‍, ബരാക് 8 അല്ലെങ്കില്‍ ബരാക് ഇആര്‍ എന്നീ മൂന്ന് ഓപ്പറേറ്റിംഗ് സിസ്റ്റങ്ങളില്‍ ഒന്ന് ഉപയോഗിക്കാനുള്ള സാധ്യതയാണ് അബുദാബി തേടുന്നത്.


ഇതില്‍ കൂടുതല്‍ സാധ്യത കല്പിക്കപെടുന്ന ബരാക് 8 , അല്ലെങ്കില്‍ ബാരാക് ഇ ആര്‍ മിസൈലുകള്‍ ഒരു ഇന്ത്യ - ഇസ്രായേല്‍ സംയുക്ത സംരംഭം ആണ്. ഇന്ത്യന്‍ സൈന്യവും ഇസ്രായേലി സൈന്യവും ഒരേ പോലെ ഉപയോഗിക്കുന്നതും ആണ് ഇത്.


ഇസ്രായേലിന്റെ പ്രതിരോധ മന്ത്രാലയവും ഇന്ത്യയുടെ ഡിഫെന്‍സ് റിസര്‍ച്ച് ഓര്‍ഗനൈസേഷന്‍ അഥവാ ഡിആര്‍ഡിഒയും സംയുക്തമായി വികസിപ്പിച്ച ബരാക്-8 ഇന്ത്യയുടെയും ഇസ്രായേലിന്റെയും ആവനാഴിയിലെ ഒരു പ്രധാന ആയുധമാണ് . ബരാക്ക്-8 ന് ഏകദേശം 70 കിലോമീറ്റര്‍ ദൂരപരിധിയുണ്ട്, കൂടാതെ ഈ വിമാനം, താഴ്ന്ന-പറക്കുന്ന ആന്റി-ഷിപ്പ്, ക്രൂയിസ് മിസൈലുകള്‍, രഹസ്യ ലക്ഷ്യങ്ങള്‍ എന്നിവയെ തകര്‍ക്കുവാനുള്ള കഴിവും ഇതിനുണ്ട് . കടല്‍ വിക്ഷേപണത്തിലും കര അധിഷ്ഠിത സംവിധാനങ്ങളും ഇതിനു നിലവിലുണ്ട്


ബരാക് ഇ ആര്‍ അഥവാ ബരാക് -8 ന്റെ വിപുലീകരിച്ച ശ്രേണി ബരാക് -8 ന്റെ ഒരു വകഭേദമാണ്, ഇതിന് ഒരു അധിക റോക്കറ്റ് ബൂസ്റ്റര്‍ ഉള്ളതിനാല്‍ താരതമ്യേനെ വലുപ്പം കൂടുതല്‍ ആണ് , ഇതിന് 150 കിലോമീറ്റര്‍ റേഞ്ച് ആണുള്ളത് . ക്രൂയിസ് മിസൈലുകളും വിമാനങ്ങളും കൈകാര്യം ചെയ്യുന്നതിനു പുറമേ, 500 കിലോമീറ്ററില്‍ താഴെ ദൂരപരിധിയുള്ള തന്ത്രപരമായ ബാലിസ്റ്റിക് മിസൈലുകളെ തടസ്സപ്പെടുത്താന്‍ ബരാക് ഇ ആറിന് കഴിയും.


ബരാക് -8 മിസൈല്‍ 2020 ല്‍ അസര്‍ബൈജാന്‍ അര്‍മേനിയയുമായുള്ള പോരാട്ടത്തില്‍ അര്‍മേനിയ തൊടുത്ത റഷ്യന്‍ നിര്‍മ്മിത ബാലിസ്റ്റിക് മിസൈലിനെ വെടി വച്ചിടാന്‍ ഉപയോഗിച്ചതായിട്ടാണ് റിപ്പോര്‍ട്ട് ചെയ്യപ്പെടുന്നത് .


ഇസ്രായേല്‍ വികസിപ്പിച്ച രണ്ട് മിസൈലുകളായ പൈത്തണ്‍-5, ഡെര്‍ബി എന്നിവ ഉള്‍ക്കൊള്ളുന്ന ആയുധ പ്ലാറ്റ്ഫോമാണ് സ്‌പൈഡര്‍ . ഡെര്‍ബി ഒരു ഇടത്തരം റഡാര്‍ ഗൈഡഡ് മിസൈലാണ്, അതേസമയം പൈത്തണ്‍-5 ഒരു ഹ്രസ്വദൂര , ശത്രു ആയുധങ്ങളുടെ താപ നില അനുസരിച്ച് അവയെ തകര്‍ക്കുന്ന തരത്തിലുള്ള മിസൈലാണ്.


വിമാനങ്ങള്‍, ക്രൂയിസ് മിസൈലുകള്‍, ആളില്ലാ ആകാശ വാഹനങ്ങള്‍, വിമാനത്തില്‍ നിന്ന് വിക്ഷേപിക്കുന്ന ബോംബുകള്‍ എന്നിവയുള്‍പ്പെടെ വിവിധ ഭീഷണികളെ വെടിവയ്ക്കാന്‍ കഴിയുന്ന സ്‌പൈഡര്‍ സംവിധാനം ഇന്ത്യന്‍ വ്യോമസേനയ്ക്ക് ഇതിനകം ഉണ്ട്.


അതെ സമയം മേഖലയില്‍ സ്ഥിതി ഗതികള്‍ രൂക്ഷമായി തന്നെ തുടരുകയാണ്


ഏതാനും ദിവസങ്ങള്‍ക്ക് മുമ്പാണ് യെമന്‍ നഗരമായ മദിരിബില്‍ ഹൂത്തികള്‍ നടത്തിയ മിസൈല്‍ ആക്രമണത്തില്‍ അനവധി സാധാരണക്കാര്‍ കൊല്ലപ്പെട്ടത്. റിപ്പോര്‍ട്ട് അനുസരിച്ച് അഞ്ച് സാധാരണക്കാര്‍ കൊല്ലപെട്ടുവെന്നും കുട്ടികള്‍ ഉള്‍പ്പെടെ 23 പേര്‍ക്ക് പരിക്കേല്‍ക്കുകയും ചെയ്തു എന്നാണ് അറിയാന്‍ കഴിയുന്നത് . യെമന്‍ സര്‍ക്കാര്‍ പ്രതിനിധികളും മനുഷ്യാവകാശ പ്രവര്‍ത്തകരും ഹൂതികളുടെ ഈ മിസൈല്‍ ആക്രമണത്തെ അപലപിച്ചു കൊണ്ട് രംഗത്തെത്തിയിരുന്നു ,


ബുധനാഴ്ച വൈകുന്നേരം ഇറാന്‍ പിന്തുണയുള്ള മിലീഷ്യ തൊടുത്തുവിട്ട മിസൈല്‍ വിമാനത്താവള പരിസരത്ത് പതിച്ചതായി ഇന്‍ഫര്‍മേഷന്‍, കള്‍ച്ചര്‍, ടൂറിസം മന്ത്രി മുഅമ്മര്‍ അല്‍-എറിയാനി പറഞ്ഞു.

സിവിലിയന്മാര്‍ക്കെതിരായ കുറ്റകൃത്യങ്ങള്‍ക്ക് ഹൂതികളെ ശിക്ഷിക്കണമെന്ന് അദ്ദേഹം ലോകത്തോട് ആവശ്യപ്പെട്ടു.


മാരിബിലെ പാര്‍പ്പിട പ്രദേശങ്ങളെയും സിവിലിയന്മാരെയും ഹൂത്തി തീവ്രവാദി മിലിഷ്യ ബോധപൂര്‍വം ലക്ഷ്യമിടുന്നത് ഒരു സമ്പൂര്‍ണ്ണ യുദ്ധക്കുറ്റമാണ്,'' അദ്ദേഹം ട്വിറ്ററില്‍ പറഞ്ഞു,


ഈ ഒരു സാഹചര്യത്തിന് തടയിടാന്‍ തന്നെയാണ് യു എ ഇ , ഇപ്പോള്‍ ഇസ്രായേല്‍ - ഇന്ത്യ സംയുക്ത സംവിധാനം ഓര്‍ഡര്‍ ചെയ്യുന്നതിലൂടെ ലക്ഷ്യം വയ്ക്കുന്നത്.