പ്രധാനമന്ത്രി നരേന്ദ്രമോദി നേപ്പാളിലെത്തി. 2566 ാമത് ബുദ്ധജയന്തി ആഘോഷങ്ങളില്‍ പങ്കെടുക്കാനാണ് അദ്ദേഹം നേപ്പാളിലെത്തിയത്.നേപ്പാളിലെത്തിയ പ്രധാനമന്ത്രിയെ നേപ്പാള്‍ പ്രധാനമന്ത്രി ഷേര്‍ ബഹാദൂര്‍ ദ്യൂബൈ സ്വീകരിച്ചു.മൂവര്‍ണ കൊടി കൈകളിലേന്തി നിരവധി വിദ്യാര്‍ത്ഥികളും ഇന്ത്യന്‍ പൗരന്മാരും ചേര്‍ന്നാണ് പ്രധാനമന്ത്രിയെ സ്വീകരിച്ചത്.

ആദ്യമായിട്ടാണ് പ്രധാനമന്ത്രി ലുംബിനി സന്ദര്‍ശിക്കുന്നത്. ഒരു ദിവസത്തെ സന്ദര്‍ശനത്തിനെത്തിയ പ്രധാനമന്ത്രി നേപ്പാള്‍ പ്രധാനമന്ത്രിയോടൊപ്പം മായാദേവി ക്ഷേത്രത്തിലെത്തി പ്രത്യേക പ്രാര്‍ത്ഥനയില്‍ പങ്കെടുത്തു.ബുദ്ധപൂര്‍ണിമ ദിനത്തില്‍ നേപ്പാളിലെ ജനതയോടൊപ്പം ചെലവഴിക്കാന്‍ സാധിച്ചതില്‍ സന്തോഷമുണ്ടെന്ന് അദ്ദേഹം പറഞ്ഞു.

മായാദേവി ക്ഷേത്രത്തിലെ സന്ദര്‍ശനത്തിന് ശേഷം കേന്ദ്രസര്‍ക്കാര്‍ 100 കോടി ചെലവിട്ടു നിര്‍മിക്കുന്ന ബുദ്ധ ആശ്രമത്തിന്റെ ശിലാസ്ഥാപനം ഇരു നേതാക്കളും ചേര്‍ന്ന് നിര്‍വഹിക്കും.സാംസ്‌കാരിക മന്ത്രാലയത്തിനു കീഴിലുള്ള രാജ്യാന്തര ബുദ്ധിസ്റ്റ് കോണ്‍ഫെഡറേഷന്‍ മുഖേനയാണ് ഇന്ത്യ സഹായം ചെയ്യുന്നത്. ലുംബിനിയിലെ അശോക സ്തംഭവും ബോധിവൃക്ഷവും പ്രധാനമന്ത്രി സന്ദര്‍ശിക്കും.

ഇന്ത്യന്‍ നാവിക സേനയുടെ പ്രത്യേക ഹെലികോപ്ടറില്‍ ലുംബിനിയിലെത്തിയ നരേന്ദ്ര മോദിയെ നേപ്പാള്‍ പ്രധാനമന്ത്രി ദ്യുബെ നേരിട്ടെത്തിയാണ് സ്വീകരിച്ചത്. 2014ല്‍ പ്രധാനമനമന്ത്രിയായ ശേഷമുള്ള മോദിയുടെ അഞ്ചാമത്തെ നേപ്പാള്‍ സന്ദര്‍ശനമാണിത്.

ബുദ്ധപൂര്‍ണിമ ദിനമായ ഇന്ന് രാവിലെ ഗൗതമ ബുദ്ധന്റെ ജന്മസ്ഥലമായ ലുംബിനിയിലെത്തിയ മോദി ദ്യുബേയ്‌ക്കൊപ്പം ഇവിടുത്തെ പ്രശസ്ത മായാ ദേവി ക്ഷേത്രത്തിലും പ്രാര്‍ത്ഥന നടത്തിയിരുന്നു. ക്ഷേത്രാംഗണത്തിലെ ബോധി മരത്തിന് ഇരുവരും ചേര്‍ന്ന് വെള്ളമൊഴിക്കുന്ന ചിത്രം പ്രധാനമന്ത്രിയുടെ ഓഫീസ് ട്വിറ്ററില്‍ പങ്ക് വച്ചിട്ടുണ്ട്.

ബുദ്ധമതത്തിന്റെ തത്വചിന്ത പ്രോത്സാഹിപ്പിക്കുന്നതിനായിട്ടാണ് ലുംബിനിയില്‍ കേന്ദ്ര സര്‍ക്കാര്‍ നൂറ് കോടി രൂപ ചെലവിട്ട് ബുദ്ധമതകേന്ദ്രത്തിന്റെ നിര്‍മാണം ആരംഭിക്കുന്നത്. മൂന്ന് വര്‍ഷത്തിനുള്ളില്‍ ഇതിന്റെ നിര്‍മാണം പൂര്‍ത്തിയാകുമെന്നാണ് പ്രതീക്ഷിക്കുന്നത്. യുഎസ്, ചൈന, കാനഡ, ഫ്രാന്‍സ്, ജര്‍മ്മനി, തായ്‌ലന്‍ഡ് എന്നിവയുള്‍പ്പെടെ മിക്ക വിദേശ രാജ്യങ്ങളും ലുംബിനിയില്‍ ഇതിനോടകം തന്നെ തങ്ങളുടെ ബുദ്ധമത കേന്ദ്രങ്ങള്‍ നിര്‍മ്മിച്ചിട്ടുണ്ട്.