'ഞാന് പുരുഷന്മാരുമായും അതുപോലെതന്നെ സ്ത്രീകളുമായും ബന്ധത്തില് ഏര്പ്പെട്ടു'; അതിലെന്താണ് തെറ്റ്'; സ്വവര്ഗാനുരാഗികളോടുള്ള വെറുപ്പ് മാറ്റണം; തുറന്നുപറഞ്ഞ് ഫുട്ബോള് താരം റിച്ചാര്ലിസന്
മുന് ബ്രസീല് രാജ്യാന്തര ഫുട്ബോള് താരം റിച്ചാര്ലിസന്റെ വെളിപ്പെടുത്തലുകളാണ് ഇപ്പോള് ചര്ച്ചാ വിഷയമായിരിക്കുന്നത്. താന് ബൈസെക്ഷ്വലാണെന്നും സ്ത്രീകളുമായും പുരുഷന്മാരുമായും ബന്ധത്തിലേര്പ്പെട്ടിട്ടുണ്ടെന്നുമുള്ള വെളിപ്പെടുത്തലാണ് അദ്ദേഹം നടത്തിയിരിക്കുന്നത്. ഇത് അദ്ദേഹത്തിന്റെ ആരാധകരെ ഞെട്ടിച്ചിരിക്കുകയാണ്.
'ഇന് ദ് ലോക്കര് റൂംസ്' എന്ന ഫുട്ബോള് പോഡ്കാസ്റ്റിലൂടെയാണു റിച്ചാര്ലിസന്റെ വെളിപ്പെടുത്തല്. സ്വവര്ഗാനുരാഗികളോടുള്ള വെറുപ്പിനും യാഥാസ്ഥിതിക നിലപാടുകള്ക്കും എതിരായ പോഡ്കാസ്റ്റ് സീരിസാണ് 'ഇന് ദ് ലോക്കര് റൂംസ്'.
ബ്രസീലിയന് സംസ്കാരത്തില് സ്വവര്ഗാനുരാഗികളോടുള്ള സമീപനത്തില് മാറ്റമുണ്ടാകണമെന്നാണ് അദ്ദേഹം സീരിസിലൂടെ തുറന്നുപറഞ്ഞത്. മാത്രമല്ല താന് ബൈസെക്ഷ്വല് ആണ് എന്നതു കൊണ്ട് മറ്റുള്ളവരില്നിന്നും താന് വ്യത്യസ്തനാക്കുന്നില്ലെന്നും പറഞ്ഞു.
'ജീവിതകാലം മുഴുവന് ആളുകള് എന്നോടു ചോദിച്ചിരുന്നത് ഞാന് സ്വവര്ഗാനുനരാഗിയാണോ (ഗേ) എന്നാണ്. ഞാന് പുരുഷന്മാരുമായും അതുപോലെതന്നെ സ്ത്രീകളുമായും ബന്ധത്തില് ഏര്പ്പെട്ടിട്ടുണ്ട്. ഞാന് ബൈസെക്ഷ്വലാണ്. ഞാനും ഒരു സാധാരണ മനുഷ്യനാണ്. എന്റേതായ ആവശ്യങ്ങളും വികാരങ്ങളും എനിക്കുണ്ട്. ഞാന് പുരുഷന്മാരുമായും സ്ത്രീകളുമായും ലൈംഗിക ബന്ധത്തില് ഏര്പ്പെട്ടിട്ടുണ്ട്, അവര്ക്കൊപ്പം സമയം ചെലവഴിച്ചിട്ടുമുണ്ട്. സമൂഹത്തില് മാറ്റമുണ്ടാകണമെന്ന് ഏറ്റവും അധികം ആഗ്രഹിക്കുന്ന വ്യക്തിയാണു ഞാന്, കാരണം സ്വവര്ഗാനുരാഗികള് ഏറ്റവും കൂടുതല് കൊല്ലപ്പെടുന്ന രാജ്യം ബ്രസീലാണ്' -- റിച്ചാര്ലിസന്റെ വാക്കുകള് ഇങ്ങനെയാണ്.
ബ്രസീലിയന് ക്ലബായ പാല്മിറസാസ് മുന് പരിശീലകന് ഹോസെ സിറില്ലോ ജൂനിയര് പരസ്യമായി താന് ഗേയാണെന്നു പറഞ്ഞ സംഭവത്തെക്കുറിച്ചും അദ്ദേഹം ഓര്ത്തു. എന്നാല് അന്ന് ആ സംഭവം വിവാദമായതോടെ സിറില്ലോ പരസ്യമായി മാപ്പു പറഞ്ഞിരുന്നു.
നിലവില് സ്പോര് ടിവിയില് ഫുട്ബോള് വിദഗ്ധനായി സേവനം അനുഷ്ടിക്കുകയാണ് 39കാരനായ റിച്ചാര്ലിസന്.
https://www.facebook.com/Malayalivartha
