അതിര്‍ത്തിയിലെ ചൈനീസ് ഭീഷണിയ്ക്ക് കഴിഞ്ഞ ദിവസമാണ് ഇന്ത്യ ചുട്ട മറുപടി നല്‍കിയത്. ഇന്ത്യന്‍ അതിര്‍ത്തിയ്ക്ക് സമീപം യുദ്ധ വിമാനങ്ങള്‍ പറത്തിയായിരുന്നു ചൈനയുടെ പ്രകോപനം. തൊട്ടടുത്ത ദിവസം തന്നെ റാഫേല്‍ യുദ്ധ വിമാനങ്ങളിറക്കി ചൈനീസ് അതിര്‍ത്തിയില്‍ ഇന്ത്യ പ്രകമ്പനം സൃഷ്ടിച്ചു. ഇതോടെ ചൈനയുടെ നീക്കങ്ങള്‍ കെട്ടടങ്ങി.

ഇപ്പോഴിതാ തായ്വാന്‍ അതിര്‍ത്തിയില്‍ ചൈന യുദ്ധം തുടങ്ങി എന്ന വാര്‍ത്തയാണ് പുറത്തു വരുന്നത്. പ്രാദേശിക സമയം ഉച്ചതിരിഞ്ഞ് 1.30 ആയപ്പോഴേക്കും വ്യോമാക്രമണത്തിനെതിരെ മുന്നറിയിപ്പ് നല്‍കുന്ന സൈറണുകള്‍ അന്തരീക്ഷത്തില്‍ മുഴങ്ങാന്‍ തുടങ്ങി. വടക്കന്‍ തെയ്വാനിലെ നഗരങ്ങളിലേയും പട്ടണങ്ങളിലേയുംജനങ്ങളെല്ലാം വീടുകള്‍ക്കകത്തേക്ക് ഓടിക്കയറി. കടകളെല്ലാം കൊട്ടിയടച്ചു റോഡുകള്‍ തീര്‍ത്തും വിജനമായി. വാഹനങ്ങളില്‍ പോയിരുന്നവരോട് വാഹനങ്ങള്‍ വശത്തേക്ക് ഓതുക്കിയിട്ട് ഏതെങ്കിലും അടുത്തുള്ള മേല്‍ക്കൂരക്ക് കീഴെ അഭയം തേടാന്‍ പൊലീസ് നിര്‍ദ്ദേശിച്ചു.

തൊട്ടടുത്ത നിമിഷം ആകാശത്തില്‍ യുദ്ധവിമാനങ്ങളുടെ ഇരമ്പല്‍. ആയിരക്കണക്കിന് മൊബൈലുകളിലേക്ക് എത്തിയ സന്ദേശം ഒരു മിസൈല്‍ ആക്രമണത്തെ കുറിച്ചുള്ള മുന്നറിയിപ്പായിരുന്നു. എത്രയും പെട്ടെന്ന് സുരക്ഷിത സ്ഥാനത്ത് അഭയം തേടാനുള്ള നിര്‍ദ്ദേശവും അതിലുണ്ടായിരുന്നു. തീര്‍ത്തും ഭീതിദമായ ഒരു അന്തരീക്ഷം. എന്നാല്‍, പിന്നീട് ആശ്വാസത്തിന്റെ നിശ്വാസമുയരുകയായിരുന്നു. ഏതു നിമിഷവും ഉണ്ടായേക്കാവുന്ന ചൈനീസ് ആക്രമണത്തെ നേരിടാനുള്ള ഒരു സമ്പൂര്‍ണ്ണ ഡ്രില്‍ ആയിരുന്നു അവിടെ നടന്നത്.

യുക്രെയിനില്‍ റഷ്യയുടെ അധിനിവേശം തുടരുമ്പോള്‍, യൂറേഷ്യയുടെ ഇങ്ങേ തലക്കലും ഒരു പ്രതിസന്ധി ഏത് നിമിഷവും ഉണ്ടായേക്കാം എന്ന് പ്രതീക്ഷിച്ചിരിക്കേണ്ടതുണ്ട്. ഒരുപാട് സമാനതകള്‍ ഉള്ളതാണ് ഇത് രണ്ടുംന. റഷ്യന്‍ പ്രസിഡണ്ട് പുടിനെ പോലെ തന്നെ ദുര്‍ബലരായ അയല്‍രാജ്യങ്ങളുടെ അവകാശങ്ങളെ മാനിക്കുന്നതില്‍ തീരെ താല്പര്യമില്ലാത്ത വ്യക്തിയാണ് ചൈനീസ് ഏകാധിപതി ഷീ ജിന്‍പിംഗും. മാത്രമല്ല, 1949ല്‍ ചൈനീസ് കമ്മ്യുണിസ്റ്റ് പാര്‍ട്ടി അധികാരത്തിലെത്തിയ അന്നു മുതല്‍ തന്നെ തായ്വാന്‍ ചൈനയുടെ ഭാഗമാണെന്ന അവകാശവാദം ചൈന ഉന്നയിക്കുന്നുമുണ്ട്.

ഔദ്യോഗികമായി ചൈനയുടെ ഭാഗമാണെങ്കിലും, കഴിഞ്ഞ 30 വര്‍ഷക്കാലത്തിലേറെയായി ജനാധിപത്യ ഭരണ സംവിധാനം നിലനില്‍ക്കുന്ന ഒരു രാജ്യമാണ് തെയ്വാന്‍. റഷ്യന്‍ അതിര്‍ത്തിയില്‍ യുക്രെയിന്‍ എന്നൊരു ജനാധിപത്യ രാജ്യത്തിന്റെ സാന്നിദ്ധ്യം ചൈന ഇഷ്ടപ്പെടാത്തതുപോലെ തന്നെ, കേവലം 100 മൈലുകള്‍ക്ക് അപ്പുറം ഒരു ജനാധിപത്യ സമ്പ്രദായം ചൈനയ്ക്കും സഹിക്കാനാകില്ല. ഈയടുത്ത കാലത്തായി ചൈനീസ് നാവിക സേനയും വ്യോമസേനയും തായ്വാന് ചുറ്റും സജീവമായിക്കൊണ്ടിരിക്കുകയാണ്.

കേവലം മൂന്ന് കോടിയില്‍ താഴെമാത്രം ജനസംഖ്യയുള്ള ഈ കുഞ്ഞ് ദ്വീപ് രാഷ്ട്രം അതിന്റെ തന്ത്രപരമായ ഭൂമിശാസ്ത്ര സ്ഥാനം കൊണ്ട് ചൈനയേറെ പ്രാധാന്യമുള്ളതാണ്. അതുകൊണ്ടു തന്നെ ചൈനയുടെ ആക്രമണം തായ്വാന്‍ മാത്രമല്ല, പാശ്ചാത്യ ശക്തികളുംപ്രതീക്ഷിക്കുന്നുണ്ട്. ജപ്പാന്‍ സന്ദര്‍ശനവേളയില്‍, തായ്വാന്‍ ആക്രമിക്കപ്പെട്ടാല്‍ അമേരിക്ക പ്രതിരോധിക്കും എന്ന് ജോ ബൈഡന്‍ പറഞ്ഞതും ഈ പശ്ചാത്തലത്തിലാണ്.

അത്തരമൊരു യുദ്ധ സാഹചര്യം ഉണ്ടായാല്‍ അതില്‍ ഏറെ സന്തോഷിക്കുക പുടിന്‍ ആയിരിക്കും. കിഴക്കന്‍ യൂറോപ്പിലെ നാറ്റോയുടെ സൈനിക സന്നാഹത്തിന്റെ വലിയൊരു ഭാഗം വിദൂരപൂര്‍വ്വ ദേശത്തേക്ക് മാറ്റപ്പെടുമ്പോള്‍, അവിടെ പുടിന് മേല്‍ക്കോയ്മ നേടാനാകും. മാത്രമല്ല, ചൈനീസ് അധിനിവേശമുണ്ടായാല്‍ അത് യുക്രെയിന്‍ പ്രതിസന്ധിയേക്കാള്‍ ഏറെ ഗുരുതരമായി ആഗോളാടിസ്ഥാനത്തില്‍ പ്രത്യാഘാതങ്ങള്‍ സൃഷ്ടിക്കും. ഒരുപക്ഷെ 1962ല്‍ ക്യുബന്‍ മിസൈല്‍ പ്രതിസന്ധിക്ക് ശേഷം ലോകം കാണുന്ന ഏറ്റവും ഭീതിദമായ ഒരു സാഹചര്യമായിരിക്കും ഉണ്ടാവുക.