അമേരിക്കന്‍ മുഖ്യധാരാ മാദ്ധ്യമങ്ങള്‍ ഇന്ത്യയ്‌ക്കെതിരായി പക്ഷപാതപരമായി വാര്‍ത്തകള്‍ നല്‍കുന്നുവെന്ന് വിദേശകാര്യമന്ത്രി എസ് ജയശങ്കര്‍.വാഷിംഗ്ടണ്‍ പോസ്റ്റ് ഉള്‍പ്പെടെയുള്ള പ്രമുഖ മാദ്ധ്യമങ്ങളെ പേരെടുത്ത് പറഞ്ഞാണ് അദ്ദേഹം വിമര്‍ശിച്ചത്. ഇന്ത്യന്‍അമേരിക്കന്‍ വംശജരുടെ സമ്മേളനത്തില്‍ സംസാരിക്കുകയായിരുന്നു അദ്ദേഹം.

അന്താരാഷ്ട്ര മാദ്ധ്യമങ്ങളില്‍ ചിലതിന് പക്ഷപാതം ഉണ്ടെന്ന് തന്നെയാണ് വിശ്വസിക്കുന്നത്.ഇന്ത്യ സ്വന്തം വഴിയ്ക്ക് കാര്യങ്ങള്‍ നീക്കിയാലും, തങ്ങള്‍ മാത്രമാണ് രാജ്യത്തിന്റെ താല്‍പര്യങ്ങളുടെ സംരക്ഷകരും രൂപകല്‍പ്പകരും എന്ന് കരുതുന്നവര്‍ക്ക് ഇന്ത്യയില്‍ സ്ഥാനം നഷ്ടപ്പെടും. സംവാദകര്‍ പുറത്ത് വരുമെന്നായിരുന്നു അദ്ദേഹത്തിന്റെ പരാമര്‍ശം. അമേരിക്കയിലടക്കം ഇന്ത്യ വിരുദ്ധര്‍ സജീവമാകുന്നതിനെ കുറിച്ചുള്ള ചോദ്യത്തിനായിരുന്നു അദ്ദേഹത്തിന്റെ ഈ മറുപടി. അത്തരം ഗ്രൂപ്പുകള്‍ പുറത്ത് നിന്ന് വിജയിക്കാന്‍ ശ്രമിക്കുമെന്നും അല്ലെങ്കില്‍ പുറത്ത് നിന്ന് ഇന്ത്യയെ രൂപപ്പെടുത്താന്‍ ശ്രമിക്കുമെന്നും കേന്ദ്രമന്ത്രി കൂട്ടിച്ചേര്‍ത്തു.

'ഞാന്‍ മാദ്ധ്യമങ്ങളെ നോക്കുന്നു.നിങ്ങള്‍ക്കറിയാവുന്ന ചില പത്രങ്ങളുണ്ട്. ഈ പട്ടണത്തില്‍ അവര്‍ എന്താണ് എഴുതാന്‍ പോകുന്നതെന്ന് അദ്ദേഹം പരിഹസിച്ചു.മിക്ക അമേരിക്കക്കാര്‍ക്കും എന്താണ് യഥാര്‍ത്ഥത്തില്‍ നമ്മുടെ രാജ്യത്ത് സംഭവിക്കുന്നതെന്ന് അറിയില്ല. അത് കൊണ്ട് തന്നെ നമ്മളെ വിലയിരുത്താന്‍ മറ്റുള്ളവരെ അനുവദിക്കേണ്ടതില്ലെന്നും അദ്ദേഹം കൂട്ടിച്ചേര്‍ത്തു. ഇതൊരു മത്സരലോകമാണ്.നമ്മുടെ കാഴ്ചപ്പാടുകള്‍ പുറത്തെടുക്കേണ്ടതുണ്ട്. അതാണ് നിങ്ങള്‍ക്കുള്ള എന്റെ സന്ദേശമെന്ന് എസ് ജയശങ്കര്‍ പറഞ്ഞു.

കശ്മീര്‍ വിഷയത്തെ മാദ്ധ്യമങ്ങള്‍ തെറ്റായി ചിത്രീകരിക്കുന്നതും കേന്ദ്രമന്ത്രി വിമര്‍ശിച്ചു. മാദ്ധ്യമങ്ങള്‍ എന്താണ് കവര്‍ ചെയ്യുന്നത്? എന്താണ് കവര്‍ ചെയ്യാത്തതെന്ന് അദ്ദേഹം ചോദിച്ചു . അങ്ങനെയാണ് പല അഭിപ്രായങ്ങളും ധാരണകളും രൂപപ്പെടുന്നതെന്ന് അദ്ദേഹം വിമര്‍ശിച്ചു. കശ്മീരുമായി ബന്ധപ്പെട്ട് യുഎസ് മാദ്ധ്യമങ്ങളില്‍ വരുന്ന വാര്‍ത്തകളില്‍ പലതും യഥാര്‍ത്ഥമല്ലെന്ന് അദ്ദേഹം പറഞ്ഞു.

ജനങ്ങളുടെ സുരക്ഷയെ കരുതി ചില സമയങ്ങളില്‍ ഇന്റര്‍നെറ്റിന് നിയന്ത്രണം ഏര്‍പ്പെടുത്തുന്നതിനെ ചോദ്യം ചെയ്യുന്നവരോട് എന്ത് പറയാന്‍, ഇന്റര്‍നെറ്റ് നിയന്ത്രണം മനുഷ്യജീവനേക്കാള്‍ വലുതാണെന്ന് പറയുന്ന ഘട്ടത്തില്‍ നിങ്ങള്‍ എത്തിയിട്ടുണ്ടെങ്കില്‍ എന്ത് പറയാന്‍ എന്ന് അദ്ദേഹം കുറ്റപ്പെടുത്തി.

ഇന്ത്യയിലെ പല ആഭ്യന്തരപ്രശ്‌നങ്ങളും പല മുഖ്യധാരാ അന്താരാഷ്ട്ര മാദ്ധ്യമങ്ങള്‍ പെരുപ്പിച്ച് കാണിക്കുന്നതിനെ വിമര്‍ശിക്കുകയായിരുന്നു അദ്ദേഹം.