പോളണ്ടിലെ ബാങ്കില്‍ ജീവനക്കാരനായിരുന്ന മലയാളി യുവാവ് കൊല്ലപ്പെട്ടു.... സംഭവത്തില്‍ ഒരാള്‍ പോലീസ് കസ്റ്റഡിയില്‍ , അന്വേഷണം ഊര്‍ജ്ജിതമാക്കി.

പാലക്കാട് പുതുശ്ശേരി സ്വദേശി ഇബ്രാഹിം ഷെരീഫാണ് കൊല്ലപ്പെട്ടത്. പോളണ്ടിലെ ബാങ്കില്‍ ജീവനക്കാരനായിരുന്ന ഇബ്രാഹിമിനെ കഴിഞ്ഞ 24 മുതല്‍ ഫോണില്‍ ലഭ്യമായിരുന്നില്ല. തുടര്‍ന്ന് വീട്ടുകാര്‍ എംബസിയുമായി ബന്ധപ്പെട്ട് നടത്തിയ അന്വേഷണത്തിലാണ് കൊല്ലപ്പെട്ടുവെന്ന വിവരം കിട്ടിയത്.

കഴിഞ്ഞ പത്തുമാസമായി പോളണ്ടിലായിരുന്നു ഇബ്രാഹിം കഴിഞ്ഞിരുന്നത്. ഇബ്രാഹിമിനെ കാണാനില്ലെന്ന വിവരം അറിഞ്ഞപ്പോള്‍, അദ്ദേഹം താമസിച്ചിരുന്ന വീട്ടില്‍ച്ചെന്ന് അന്വേഷിച്ചിരുന്നെന്നും എന്നാല്‍ വീടിനുള്ളില്‍ പ്രവേശിക്കാനായി വീട്ടുടമ സമ്മതിച്ചില്ലെന്നും ഇബ്രാഹിമിന്റെ പോളണ്ടിലെ ഒരു സുഹൃത്ത് പറഞ്ഞതായാണ് സൂചനകള്‍. അതിനു ശേഷം പോലീസിനെ വിവരം അറിയിച്ചു.

എന്നാല്‍ പോളണ്ട് പോലീസ് സ്ഥലത്തെത്തിയെങ്കിലും സെര്‍ച്ച് വാറന്റ് ഇല്ലാതിരുന്നതിനാല്‍ പരിശോധന നടന്നില്ല. തുടര്‍ന്ന് ജനുവരി 25-നാണ് വീടനകത്തേക്ക് കയറാന്‍ സാധിച്ചതും കൊലപാതകവാര്‍ത്ത പുറത്തെത്തുന്നതും. സംഭവവുമായി ബന്ധപ്പെട്ട് ഒരാള്‍ പോലീസിന്റെ കസ്റ്റഡിയിലാണ് എന്നാല്‍ ഇത് ആരാണെന്നോ എന്താണ് കൊലപാതകത്തിന് കാരണമെന്നോ വ്യക്തമായിട്ടില്ല. അന്വേഷണം പോലീസ് ഊര്‍ജ്ജിതമാക്കി.