കൂടുതല്‍ പിരിച്ചുവിടലിനുള്ള സാധ്യതയെക്കുറിച്ച് സൂചന നല്‍കി മെറ്റാ സിഇഒ മാര്‍ക്ക് സക്കര്‍ബര്‍ഗ്. 11,000ത്തിലധികം തൊഴിലവസരങ്ങള്‍ വെട്ടിക്കുറച്ച് മാസങ്ങള്‍ക്ക് ശേഷമാണ് പുതിയ നടപടി. ഇത്തവണ മാനേജര്‍മാര്‍ക്കാണ് മുന്നറിയിപ്പ് ലഭിച്ചിരിക്കുന്നത്. പിരിച്ചുവിടലിനു പിന്നാലെ ജോബ് ഓഫറുകള്‍ പിന്‍വലിക്കുന്നുവെന്നും മെറ്റ അറിയിച്ചിരുന്നു. ഫേസ്ബുക്ക്, ഇന്‍സ്റ്റഗ്രാം, വാട്‌സാപ്പ് തുടങ്ങിയ സാമൂഹികമാധ്യമങ്ങളുടെ മാതൃകമ്പനിയാണ് മെറ്റ. കമ്പനിയുടെ വരുമാനത്തിലുണ്ടായ ഇടിവും ഡിജിറ്റല്‍ വ്യവസായ മേഖലയിലെ വെല്ലുവിളികളുമാണ് തീരുമാനത്തിന് പിന്നിലെന്നാണ് മെറ്റ സി.ഇ.ഒ. മാര്‍ക്ക് സക്കര്‍ബര്‍ഗ് പറയുന്നത്.

ഫെബ്രുവരിയില്‍ ജോലിയില്‍ പ്രവേശിക്കുന്നവരുടെ ഓഫര്‍ ലെറ്ററുകളാണ് മെറ്റ പിന്‍വലിച്ചത്. പല കമ്പനികളിലും മെറ്റ ഇപ്പോഴും പിരിച്ചുവിടലുകള്‍ തുടരുകയാണ്. ന്യൂയോര്‍ക്കിലെ ഒരു ഓഫീസ് അടച്ചിടാനും കമ്പനിയ്ക്ക് പദ്ധതിയുണ്ട്. ചെലവ് ചുരുക്കാന്‍ ജീവനക്കാരെ പിരിച്ചുവിടുകയല്ലാതെ മറ്റ് വഴികളില്ലെന്നാണ് കമ്പനി വ്യക്തമാക്കുന്നത്.

അടുത്തിടെ നടന്ന ഒരു ഇന്റേണല്‍ മീറ്റിംഗിലാണ് ജീവനക്കാര്‍ക്ക് പിരിച്ചുവിടലിനെ കുറിച്ചുള്ള സൂചന ലഭിച്ചത്. മാനേജര്‍മാരെ മാനേജ് ചെയ്യുന്ന മാനേജര്‍മാരെ ആവശ്യമുള്ളതായി തോന്നുന്നില്ലെന്നാണ് മാര്‍ക്ക് സക്കര്‍ബര്‍ഗ് വ്യക്തമാക്കിയത്. ജോലി ചെയ്യുന്ന ആളുകളെ നിയന്ത്രിക്കുന്ന ഒരു മാനേജ്‌മെന്റ് ഘടന നിങ്ങള്‍ക്ക് ആവശ്യമാണെന്ന് ഞാന്‍ കരുതുന്നില്ലെന്ന് സക്കര്‍ബര്‍ഗ് പറഞ്ഞു.

കമ്പനിയുടെ ചരിത്രത്തിലെ ആദ്യത്തേതും ഏറ്റവും വലിയതുമായ പിരിച്ചുവിടലായിരുന്നു കഴിഞ്ഞ വര്‍ഷം നവംബറില്‍ ഉണ്ടായത്. 13 ശതമാനം തൊഴിലാളികളെ മെറ്റാ വെട്ടിക്കുറച്ചു. ആഗോള സാമ്പത്തിക മാന്ദ്യത്തിന്റെ പിടിയിലാണ് ടെക്ക് കമ്പനികളെന്നാണ് സൂചന. ചെലവുകള്‍ വെട്ടിക്കുറയ്ക്കാനും ടീമുകളെ മാറ്റാനും മെറ്റ ഉദ്ദേശിക്കുന്നതായി സെപ്തംബര്‍ അവസാനം തന്നെ സക്കര്‍ബര്‍ഗ് ജീവനക്കാര്‍ക്ക് മുന്നറിയിപ്പ് നല്‍കിയിരുന്നു. സാമ്പത്തിക മാന്ദ്യത്തെ തുടര്‍ന്ന് പുതിയ നിയമനങ്ങള്‍ മെറ്റാ ഇതിന് മുന്‍പ് തന്നെ കുറച്ചിരുന്നു. പിന്നാലെയാണ് പിരിച്ചുവിടലും ആരംഭിച്ചത്.