ലെബനനുമായുള്ള രാജ്യത്തിന്റെ അതിര്‍ത്തിയില്‍ മൂന്ന് ഹിസ്ബുള്ള ടാങ്ക് വിരുദ്ധ സ്‌ക്വാഡുകളെ സൈന്യം ആക്രമിച്ചതായി ഇസ്രായേല്‍ ഡിഫന്‍സ് ഫോഴ്സ് വക്താവ് റിയര്‍ അഡ്മിറല്‍ ഡാനിയല്‍ ഹഗാരി പറഞ്ഞു. നേരത്തെ, ലെബനീസ് അതിര്‍ത്തിയിലെ ഒരു ഐഡിഎഫ് പോസ്റ്റിന് നേരെ തീവ്രവാദികള്‍ മോര്‍ട്ടാര്‍ ബോംബ് എറിഞ്ഞെങ്കിലും ആളപായം ഉണ്ടായില്ലെന്നും അദ്ദേഹം പറഞ്ഞു.

വെടിവയ്പ്പിന്റെ ഉറവിടം ഐഡിഎഫ് സേന പീരങ്കികള്‍ ഉപയോഗിച്ച് ആക്രമിച്ചുവെന്നും, വക്താവ് കൂട്ടിച്ചേര്‍ത്തു. ഹിസ്ബുള്ള കേന്ദ്രങ്ങളില്‍ നിന്ന് മിസൈലുകളും മോര്‍ട്ടാറുകളും ഉപയോഗിച്ച് വടക്കന്‍ ഇസ്രായേലിന് നേരെ ആവര്‍ത്തിച്ചുള്ള ആക്രമണങ്ങള്‍ നടന്നതായി ഐഡിഎഫ് പ്രത്യേക പ്രസ്താവനയില്‍ പറഞ്ഞു. യഹൂദ രാഷ്ട്രത്തിനെതിരെ ആക്രമണം നടത്തിയ ഇറാന്‍ ആസ്ഥാനമായുള്ള തീവ്രവാദ ഗ്രൂപ്പിന് ഗുരുതരമായ പ്രത്യാഘാതങ്ങള്‍ നേരിടേണ്ടിവരുമെന്ന് ഇസ്രായേല്‍ മുന്നറിയിപ്പ് നല്‍കിയിട്ടുണ്ട്.

അതിനിടെ ഇസ്രായേലിലേക്ക് ആയുധങ്ങള്‍ കയറ്റുമതി ചെയ്യുന്നത് നിര്‍ത്താന്‍ എല്ലാ രാജ്യങ്ങളോടും സൗദി അറേബ്യ ആവശ്യപ്പെടുന്നുവെന്ന് കിരീടാവകാശി അമീര്‍ മുഹമ്മദ് ബിന്‍ സല്‍മാന്‍ പറഞ്ഞു. ബ്രിക്സ് രാജ്യങ്ങളുടെയും ഗാസയിലെ സ്ഥിതിഗതികള്‍ ചര്‍ച്ച ചെയ്യാന്‍ ക്ഷണിക്കപ്പെട്ട രാജ്യങ്ങളുടെയും വെര്‍ച്വല്‍ ഉച്ചകോടിയില്‍ നടത്തിയ പ്രസംഗത്തിലാണ് ആവശ്യപ്പെട്ടത്.

ഗാസയിലെ ആക്രമണത്തിനെതിരെ ഒരു അന്താരാഷ്ട്ര നിലപാട് രൂപപ്പെടുത്തുന്നതിനും അംഗീകൃത അന്താരാഷ്ട്ര വ്യവസ്ഥക്ക് അനുസൃതമായി സമഗ്രവും ശാശ്വതവുമായ സമാധാനം കൈവരിക്കുന്നതിനും ഗൗരവമായ രാഷ്ട്രീയ പ്രക്രിയക്ക് സമ്മര്‍ദ്ദമുണ്ടാകണമെന്നും എല്ലാ രാജ്യങ്ങളോടും സൗദി ആവശ്യപ്പെടുന്നു.