ഗാസയില്‍ ഹമാസ് ബന്ദികളാക്കിയ 12 തായ് പൗരന്മാരെ വിട്ടയച്ചതായി തായ് പ്രധാനമന്ത്രി. എംബസി അധികൃതര്‍ ഇവരെ കൂട്ടിക്കൊണ്ടുവരാന്‍ പോവുകയാണെന്നും അദ്ദേഹം പറഞ്ഞതായി ബിബിസി റിപ്പോര്‍ട്ട് ചെയ്തു. എന്നാല്‍ ബന്ദികള്‍ നിലവില്‍ എവിടെയാണുള്ളതെന്ന് അദ്ദേഹം വ്യക്തമാക്കിയിട്ടില്ല. ഈജിപ്തിന്റെ ശക്തമായ പരിശ്രമത്തിന്റെ ഫലമായാണ് 12 തായ് പൗരന്മാരെ വിട്ടയക്കുന്നതെന്ന് ഈജിപ്ത്യന്‍ സ്റ്റേറ്റ് ഇന്‍ഫര്‍മേഷന്‍ സര്‍വീസും പറഞ്ഞു. അതേസമയം ഹമാസ് ഇതുവരെ വിഷയത്തില്‍ പ്രതികരിച്ചിട്ടില്ല. തായ് പൗരന്മാരെ വിട്ടയച്ചതിന് ഖത്തറിന്റെ മധ്യസ്ഥതയില്‍ ഇസ്രയേലും ഹമാസുമുണ്ടാക്കിയ കരാറുമായി ഇതിന് ബന്ധമില്ല എന്നാണ് ബിബിസി റിപ്പോര്‍ട്ട്. ബന്ധികളാക്കിയ 13 ഇസ്രയേലുകാരെ ഉടനെ മോചിപ്പിക്കുമെന്നാണ് പ്രതീക്ഷയെന്നും റിപ്പോര്‍ട്ടില്‍ പറയുന്നു.

നാല് ദിവസത്തെ താത്കാലിക വെടിനിര്‍ത്തല്‍ അവസാനിച്ചാല്‍ ഇസ്രയേലിന്റെ സൈനിക ആക്രമണം ഏറ്റവും കുറഞ്ഞത് രണ്ട് മാസമെങ്കിലും തുടരുമെന്ന് ഇസ്രയേല്‍ പ്രതിരോധമന്ത്രി യോവ ഗാലന്റ് പറഞ്ഞു. വരും ദിവസങ്ങളില്‍ ബന്ദികളുടെ ആദ്യഘട്ട മോചനം നിങ്ങള്‍ കാണും. ഈ ഇടവേള ചെറുതായിരിക്കും. ഈ ഇടവേളയില്‍ നമ്മള്‍ സംഘടിക്കുകയും തയ്യാറാകുകയും അന്വേഷിക്കുകയും വീണ്ടും ആയുധങ്ങള്‍ എത്തിക്കുകയും സൈനിക നീക്കം തുടരുവാന്‍ തയ്യാറാവുകയും വേണം. സൈനിക നീക്കം നമ്മള്‍ ഇനിയും തുടരും. കാരണം നമുക്ക് പൂര്‍ണ വിജയം നേടണം, ബന്ദികളുടെ അടുത്ത സംഘത്തെ തിരിച്ചെത്തിക്കുകയും വേണം. സമ്മര്‍ദത്തിലൂടെ മാത്രമേ അവരെ തിരിച്ചെത്തിക്കാന്‍ സാധിക്കൂ,' ഗാലന്റ് പറഞ്ഞു. വിജയം കൈവരിക്കുന്നത് വരെ തങ്ങള്‍ യുദ്ധം അവസാനിപ്പിക്കില്ലെന്ന് ഇസ്രയേല്‍ സേനയുടെ മേധാവി ലെഫ്റ്റനന്റ് ജനറല്‍ ഹെര്‍സി ഹലേവിയും പറഞ്ഞിരുന്നു.

വെടിനിര്‍ത്തല്‍ നടപ്പായതോടെ ഗസയിലേക്ക് സഹായങ്ങളെത്തിക്കാനുള്ള ട്രക്കുകള്‍ റഫ അതിര്‍ത്തി വഴി വന്നുതുടങ്ങി. അതേസമയം, വെടിനിര്‍ത്തല്‍ പ്രഖ്യാപനത്തെ തുടര്‍ന്ന് തെക്കന്‍ ഗസയില്‍ നിന്ന് വടക്കിലേക്ക് മടങ്ങിയവരെ ഇസ്രയേല്‍ സേന തടഞ്ഞതായി റിപ്പോര്‍ട്ടുകളുണ്ട്. വടക്കന്‍ ഗസ ഇപ്പോഴും യുദ്ധഭൂമി തന്നെയാണെന്നും അവിടേക്ക് പ്രവേശനം അനുവദിക്കില്ലെന്നുമാണ് ഇസ്രഈല്‍ അറിയിക്കുന്നത്. ഇസ്രയേല്‍ ഉത്തരവ് മറികടന്ന് വടക്കന്‍ ഗസയിലെ വീടുകളിലേക്ക് മടങ്ങാന്‍ ശ്രമിച്ചവരെ ഇസ്രയേല്‍ സേന പരിക്കേല്‍പ്പിക്കുകയും രണ്ട് പേരെ കൊലപ്പെടുത്തുകയും ചെയ്തതായി അസോസിയേറ്റഡ് പ്രസ് റിപ്പോര്‍ട്ട് ചെയ്തിരുന്നു.