49 ദിവസം ഹമാസിന്റെ പിടിയിലായിരുന്നവര്‍ക്ക് ഒടുവില്‍ മോചനം. 13 ഇസ്രയേലി പൗരന്മാരെയും തായ്ലന്‍ഡില്‍നിന്നുള്ള 12 പേരെയും മോചിപ്പിച്ചതായി ബിബിസി റിപ്പോര്‍ട്ട് ചെയ്തു. തായ് പൗരന്മാരെ മോചിപ്പിച്ച വിവരം തായ്ലന്‍ഡ് പ്രധാനമന്ത്രി അറിയിച്ചു. നാലു ദിവസത്തെ വെടിനിര്‍ത്തല്‍ കരാറിന്റെ ഭാഗമായാണ് ഹമാസ് ഇസ്രയേലി പൗരന്മാരെ കൈമാറിയത്. തായ്ലന്‍ഡില്‍നിന്നുള്ളവരെ മോചിപ്പിക്കുന്നത് കരാറിന്റെ ഭാഗമായല്ല. റെഡ് ക്രോസിനു കൈമാറിയ ഇസ്രയേല്‍ പൗരന്മാരെ റഫാ അതിര്‍ത്തിയില്‍ എത്തിക്കും. ഇവിടെനിന്ന് ഹെലികോപ്റ്ററില്‍ നാട്ടിലേക്ക് കൊണ്ടുപോകും.

ബന്ദികളെ സ്വീകരിക്കാനുള്ള തയാറെടുപ്പുകള്‍ ഇസ്രയേല്‍ പ്രതിരോധ സേന (ഐഡിഎഫ്) നേരത്തെ പൂര്‍ത്തിയാക്കിയിരുന്നു. സേനയുടെ ഹെലികോപ്റ്റര്‍ ഇവരെ സ്വീകരിക്കാനായി ഗാസയ്ക്ക് സമീപത്തുള്ള ഈജിപ്ഷ്യന്‍ വിമാനത്താവളത്തില്‍ എത്തിയിരുന്നു. ബന്ദികളെ അവരുടെ ബന്ധുക്കള്‍ക്ക് കൈമാറും മുന്‍പ് വൈദ്യ സഹായം നല്‍കുമെന്ന് ഐഡിഎഫ് വ്യക്തമാക്കി. ടവലുകള്‍, സാനിറ്ററി പാഡ്, കുട്ടികള്‍ക്കുള്ള കളിപ്പാട്ടങ്ങള്‍ എന്നിവ ഉള്‍പ്പെടെ ഹെലികോപ്റ്ററില്‍ സജ്ജമാണ്. ഇതിന്റെ വിഡിയോയും സേന പുറത്തുവിട്ടു.

ഇസ്രയേലി ജയിലുകളിലുള്ള 39 പലസ്തീനിയന്‍ തവുകാരെ ഇന്ന് ഹമാസിനു കൈമാറും. തിരികെയെത്തുന്ന ബന്ദികളുടെ സ്വകാര്യതയെ മാനിക്കണമെന്ന് ഇസ്രയേല്‍ സേന പ്രസ്താവനയില്‍ ആവശ്യപ്പെട്ടു. കമാന്‍ഡോ സംഘത്തിനു പുറമെ ഡോക്ടര്‍മാരും മറ്റ് ഉദ്യോഗസ്ഥരും ഹെലികോപ്റ്ററിലുണ്ട്. ഒക്ടോബര്‍ 7ന് നടന്ന ആക്രമണത്തിനു പിന്നാലെ ഇരുന്നോറോളം പേരെയാണ് ഹമാസ് ബന്ദികളാക്കിയത്. ഇതില്‍ സ്ത്രീകളേയും കുട്ടികളേയുമാണ് ഇന്ന് വിട്ടയച്ചത്.