ആഘോഷങ്ങള്‍ക്ക് വിലക്ക് പലസ്തീനികള്‍ക്ക് കടിഞ്ഞാണിട്ട് ഇസ്രായേല്‍;മധുരവിതരണം പാടില്ല, കുടുംബസംഗമം വേണ്ട,ഇസ്രയേല്‍ ജയിലില്‍ നിന്ന് മോചിതരായ പലസ്തീനികള്‍ക്ക് വന്‍ വരവേല്‍പ്,ഇതോടെ കടുപ്പിച്ച് ഇസ്രയേല്‍ ഭരണകൂടം,പലസ്തീന്‍ പ്രിസണര്‍ ക്ലബ് ആണ് വാര്‍ത്ത പുറത്തുവിട്ടത്
വെടിനിര്‍ത്തല്‍ കരാര്‍ പ്രകാരം ഇസ്രായേല്‍ ജയിലില്‍ നിന്നും വിട്ടയച്ച 39 ഫലസ്തീനികള്‍ക്കും നാട്ടില്‍ വന്‍ വരവേല്‍പ്പ് ലഭിച്ചിരുന്നു. ജയില്‍ മോചിതരായ ഫലസ്തീനികളെ കാണാന്‍ നൂറ് കണക്കിനാളുകളാണ് എത്തിയത്. ഇവരെ സ്വീകരിക്കാന്‍ കുടുംബാംഗങ്ങള്‍ക്കൊപ്പം നാട്ടുകാരും എത്തിയിരുന്നു. വൈകാരികമായിരുന്നു പലസ്തീനികള്‍ക്ക് നാട്ടില്‍ ലഭിച്ച വരവേല്‍പ്പ്. എന്നാല്‍ ഇപ്പോള്‍ ബന്ദികൈമാറ്റത്തിന്റെ ഭാഗമായി മോചിതരാകുന്ന ഫലസ്തീനികള്‍ക്കു കര്‍ശന നിര്‍ദേശങ്ങളുമായി ഇസ്രായേല്‍ വന്നിരിക്കുകയാണ്. മോചനത്തിന്റെ സന്തോഷത്തില്‍ മധുരവിതരണം നടത്തുന്നതും ആഘോഷം നടത്തുന്നതും വിലക്കിക്കൊണ്ടാണ് ഫലസ്തീന്‍ തടവുകാര്‍ക്ക് ഇസ്രായേല്‍ ഭരണകൂടം നിയന്ത്രണം ഏര്‍പ്പെടുത്തിയിരിക്കുന്നത്. ഫലസ്തീന്‍ തടവുകാരുടെ അവകാശങ്ങള്‍ക്കു വേണ്ടി പ്രവര്‍ത്തിക്കുന്ന ഫലസ്തീന്‍ പ്രിസണര്‍ ക്ലബ് ആണ് വാര്‍ത്ത പുറത്തുവിട്ടത്.
അധിനിവിഷ്ട കിഴക്കന്‍ ജറൂസലമിലെ ഫലസ്തീന്‍ തടവുകാര്‍ക്കാണ് ഇസ്രായേല്‍ നിര്‍ദേശം. മാധ്യമങ്ങളോട് സംസാരിക്കരുത്, കുടുംബസംഗമം നടത്തരുത്, ഒരു തരത്തിലുള്ള ആഘോഷവും നടത്തരുത് തുടങ്ങിയ ഉത്തരവുകളുമുണ്ട്. ഇത് ലംഘിച്ചാല്‍ 70,000 ഇസ്രായേല്‍ ഷെകെല്‍സ്(ഏകദേശം 15.61 ലക്ഷം രൂപ) പിഴ ചുമത്തും. ജറൂസലമില്‍ ജയില്‍മോചനം ആഘോഷിച്ചാല്‍ കടുത്ത നടപടികളുണ്ടാകുമെന്ന് ഇസ്രായേല്‍ ദേശീയ സുരക്ഷാ മന്ത്രി ഇറ്റമാര്‍ ബെന്‍ വിര്‍ നേരത്തെ മുന്നറിയിപ്പ് നല്‍കിയിരുന്നു. അത്തരം നീക്കങ്ങളെ ഉരുക്കുമുഷ്ടി ഉപയോഗിച്ച് നേരിടാനാണ് ഇസ്രായേല്‍ പൊലീസിനു മന്ത്രി നിര്‍ദേശം നല്‍കിയിരിക്കുന്നത്. മോചിതരാകുമെന്നു പ്രതീക്ഷിക്കപ്പെടുന്നവരുടെ വീടുകളുടെ പരിസരത്ത് പൊലീസ് സുരക്ഷ ശക്തമാക്കാനും നിര്‍ദേശമുണ്ട്.
അതെ സമയം നാലുദിവസത്തെ വെടിനിര്‍ത്തല്‍ കരാറിന്റെ ഭാഗമായി ബന്ദികളുടെ രണ്ടാമത്തെ സംഘത്തെയും ഹമാസ് കൈമാറി. 13 ഇസ്രയേല്‍ പൗരന്മാരെയും നാല് തായ് പൗരന്മാരെയുമാണ് ഹമാസ് റെഡ് ക്രോസിന് കൈമാറിയത്. 13 പേരില്‍ ആറുപേര്‍ സ്ത്രീകളും ഏഴുപേര്‍ കുട്ടികളും കൗമാരക്കാരുമാണെന്ന് ഇസ്രയേല്‍ പ്രധാനമന്ത്രി ബെന്യാമിന്‍ നെതന്യാഹു പറഞ്ഞു. ഹമാസ് വിട്ടയച്ച ബന്ദികള്‍ ഇസ്രയേലിലെത്തി.
ബന്ദികളെ സ്വീകരിക്കാനായി തയാറെടുക്കുന്നതിന്റെ വിഡിയോ ദൃശ്യം ഇസ്രയേല്‍ ഡിഫന്‍സ് ഫോഴ്‌സ് സമൂഹമാധ്യമമായ എക്‌സ് പ്ലാറ്റ്‌ഫോമില്‍ പങ്കുവച്ചിരുന്നു. വിട്ടയച്ചവരെ ആശുപത്രികളിലേക്കു മാറ്റുകയാണെന്നും കുടുംബാംഗങ്ങളുമായി അവിടെവച്ച് അവര്‍ വീണ്ടും ഒന്നിക്കുമെന്നും ഇസ്രയേല്‍ ഡിഫന്‍സ് ഫോഴ്‌സ് വാര്‍ത്താക്കുറിപ്പില്‍ പറഞ്ഞു. രണ്ടാം സംഘത്തിലെ ബന്ദികളെ മോചിപ്പിക്കുന്നതില്‍ ഹമാസ് കാലതാമസം വരുത്തിയിരുന്നു. ഗാസയിലേക്ക് സഹായവുമായെത്തുന്നു ട്രക്കുകളെ കടത്തിവിടുന്നതടക്കം വെടിനിര്‍ത്തല്‍ കരാറിലെ എല്ലാ നിബന്ധനകളും ഇസ്രേയല്‍ പാലിച്ചതിനുശേഷം മാത്രം ബന്ദികളെ മോചിപ്പിക്കും എന്ന നിലപാടിലായിരുന്നു ഹമാസ്.
https://www.facebook.com/Malayalivartha
