ഇസ്രയേലിനെതിരായ ഹമാസിന്റെ ആക്രമണത്തിന് ശേഷം, തീവ്രവാദികളായ ഫലസ്തീന്‍ ഗ്രൂപ്പിലേക്കുള്ള പണത്തിന്റെ ഒഴുക്ക് തടയുന്നതിനും തീവ്രവാദ വിരുദ്ധ ശ്രമങ്ങളെ പിന്തുണയ്ക്കുന്നതിനും ലക്ഷ്യമിട്ട് തങ്ങളും നിരവധി സഖ്യരാജ്യങ്ങളും ഒരു അന്താരാഷ്ട്ര ടാസ്‌ക് ഫോഴ്സ് രൂപീകരിച്ചതായി യുഎസ് അറിയിച്ചു. ഒക്ടോബര്‍ 7-ലെ ആക്രമണത്തില്‍ 1,200 പേര്‍ കൊല്ലപ്പെട്ടതിന് ശേഷം, വാഷിംഗ്ടണും മറ്റ് സര്‍ക്കാരുകളും തീവ്രവാദ ഗ്രൂപ്പായി പ്രഖ്യാപിച്ച ഹമാസിനുള്ള ധനസഹായം നിര്‍ത്തലാക്കാന്‍ യുഎസും യുകെയും സഖ്യകക്ഷികളും ചേര്‍ന്ന് തീരുമാനിക്കുകയായിരുന്നു.

ഓസ്ട്രേലിയ, കാനഡ, എസ്‌തോണിയ, ഫ്രാന്‍സ്, ജര്‍മ്മനി, ഇസ്രായേല്‍, ലിച്ചെന്‍സ്റ്റീന്‍, ലക്സംബര്‍ഗ്, നെതര്‍ലാന്‍ഡ്സ്, ന്യൂസിലാന്‍ഡ്, സ്വിറ്റ്സര്‍ലന്‍ഡ്, യുകെ, യുഎസ് എന്നിവിടങ്ങളില്‍ നിന്നുള്ള ഫിനാന്‍ഷ്യല്‍ ഇന്റലിജന്‍സ് യൂണിറ്റുകളും മറ്റ് യൂണിറ്റുകളും ചേര്‍ന്നതാണ് ടാസ്‌ക് ഫോഴ്സ്. വാഷിംഗ്ടണ്‍ ഹമാസിനെതിരെ നിരവധി ഉപരോധങ്ങള്‍ ഏര്‍പ്പെടുത്തിയിട്ടുണ്ട്. ഇത് ഗ്രൂപ്പിന്റെ നിക്ഷേപ പോര്‍ട്ട്ഫോളിയോയെ ലക്ഷ്യം വയ്ക്കുകയും ഹമാസിന്റെ ധനസഹായത്തെ നേരിടാന്‍ ധനകാര്യ സ്ഥാപനങ്ങള്‍ക്ക് മുന്നറിയിപ്പ് നല്‍കുകയും ചെയ്യുന്നതാണ്.

കഴിഞ്ഞ വര്‍ഷത്തോടെ, തുര്‍ക്കി മുതല്‍ സൗദി അറേബ്യ വരെയുള്ള കമ്പനികളില്‍ 500 മില്യണ്‍ ഡോളര്‍ നിക്ഷേപം കൈകാര്യം ചെയ്യുന്ന കമ്പനികളുടെ ഒരു രഹസ്യ ശൃംഖല ഹമാസ് സ്ഥാപിച്ചിരുന്നു, 2022 മെയ് മാസത്തില്‍ സ്ഥാപനങ്ങള്‍ക്ക് ഉപരോധം പ്രഖ്യാപിച്ചുവെന്ന് യുഎസ് ട്രഷറി വ്യക്തമാക്കിരുന്നു.

ഹമാസ്, മാനുഷിക സഹായങ്ങള്‍ക്കായി ലോകം നല്‍കുന്ന തുക അടക്കം ഭീകര പ്രവര്‍ത്തനങ്ങള്‍ക്കായി ചെലവഴിക്കുന്നുണ്ടെന്ന റിപ്പോര്‍ട്ടുകള്‍ക്ക് പിന്നാലെയാണ് ഹമാസ് സംഘടനയിലേയ്ക്കുള്ള പണത്തിന്റെ ഒഴുക്ക് തടയുന്നതിനായി അന്താരാഷ്ട്ര ടാസ്‌ക് ഫോഴ്സ് രൂപീകരിച്ചത്.