ലോകത്തെ ഏറ്റവുംവലിയ ആഡംബരക്കപ്പലായ 'ഐക്കണ്‍ ഓഫ് ദ സീസ്' ഫ്ലോറിഡയിലെ മയാമിയില്‍ നിന്ന് ശനിയാഴ്ച കന്നിയാത്ര തുടങ്ങി. ഒരാഴ്ചയെടുത്ത് കരീബിയനിലെ മൂന്നു ദ്വീപുകള്‍ സന്ദര്‍ശിച്ച് മയാമിയില്‍ തിരിച്ചെത്തും. അമേരിക്കന്‍ കമ്പനിയായ റോയല്‍ കരീബിയന്‍ ഇന്റര്‍നാഷണലാണ് കപ്പലിന്റെ ഉടമകള്‍. 2350 ജീവനക്കാരാണ് കപ്പലിലുള്ളത്.

ഏഴു നീന്തല്‍ക്കുളങ്ങള്‍, വാട്ടര്‍പാര്‍ക്ക്, ഐസ് സ്‌കേറ്റിങ്ങിനുള്ള സൗകര്യം, ആറു വാട്ടര്‍ സ്ലൈഡുകള്‍, 40 ഭക്ഷണശാലകളും ബാറുകളുമുള്‍പ്പെടെ ഒട്ടേറെ സൗകര്യങ്ങള്‍ കപ്പലിലുണ്ട്. അമ്പതോളം സംഗീതജ്ഞരും ഹാസ്യാവതാരകരും സംഗീതസംഘവുമുണ്ട്.

ഫിന്‍ലന്‍ഡിലെ തുര്‍ക്കുവില്‍ 900 ദിവസമെടുത്താണ് കപ്പല്‍ പണിതത്. ഏകദേശം 16,624 കോടി രൂപയാണ് നിര്‍മാണച്ചെലവ്. ദ്രവീകൃത പ്രകൃതിവാതകമാണ് ഇന്ധനം.
റോയല്‍ കരീബിയന്റെ തന്നെ 'വണ്ടര്‍ ഓഫ് ദ സീസാ'യിരുന്നു ഇതുവരെയുള്ളതില്‍ ഏറ്റവും വലിയ ആഡംബരക്കപ്പല്‍.
ഫുട്ബോള്‍ സൂപ്പര്‍താരം ലയണല്‍ മെസ്സിയാണ് ചൊവ്വാഴ്ച കപ്പലിന് ഔദ്യോഗികമായി പേരിട്ടത്.