നാളെ പൊതുതിരഞ്ഞെടുപ്പ് നടക്കുന്ന പാകിസ്ഥാനില്‍ പരസ്യ പ്രചാരണം അവസാനിച്ചു. ഇന്ന് നിശ്ശബ്ദ പ്രചാരണമാണ്. ദേശീയ അസംബ്ലിയിലെ 272 സീറ്റുകളിലേക്കാണ് തിരഞ്ഞെടുപ്പ് നടക്കുന്നത്. 12.7 കോടി വോട്ടര്‍മാരാണ് പട്ടികയിലുള്ളത്.

രാജ്യത്തുടനീളം ഭീകരവാദ ഭീഷണിയും അക്രമ സാദ്ധ്യതയും നിലനില്‍ക്കുന്നതിനാല്‍ ജനങ്ങള്‍ കനത്ത ഭീതിയിലാണ്. വോട്ടിംഗ് ശതമാനം കുറയുമെന്ന ആശങ്കയിലാണ് രാഷ്ട്രീയ കക്ഷികള്‍.

ഇമ്രാന്‍ ഖാന്‍ മത്സര രംഗത്തില്ലാത്തതിനാല്‍ നിഷ്പ്രയാസം ജയിക്കാമെന്ന പ്രതീക്ഷയിലാണ് നവാസ് ഷെരീഫ്. രാജ്യത്ത് ഏറ്റവും ജനപിന്തുണയുള്ള ഇമ്രാന്‍ ഖാന്‍ അഴിമതി കേസുകളില്‍ ശിക്ഷിക്കപ്പെട്ട് ജയിലിലാണ്. അദ്ദേഹത്തിന്റെ പാര്‍ട്ടിയായ പാകിസ്ഥാന്‍ തെഹ്രീകെ ഇന്‍സാഫിന് സ്വന്തം ചിഹ്നമായ ക്രിക്കറ്റ് ബാറ്റില്‍ മത്സരിക്കാന്‍ തിരഞ്ഞെടുപ്പ് കമ്മിഷന്‍ അനുമതി നിഷേധിച്ചിരുന്നു.

സ്വതന്ത്ര സ്ഥാനാര്‍ത്ഥികളായാണ് പി.ടി.ഐ ഇത്തവണ മത്സരിപ്പിക്കുന്നത്.ഇമ്രാനെ തിരഞ്ഞെടുപ്പില്‍ നിന്ന് പുറത്താക്കാനുള്ള പാക് സൈന്യത്തിന്റെ തന്ത്രം വിജയിച്ചത് നവാസ് ഷെരീഫിനെ ആത്മവിശ്വാസത്തിലാക്കി.



നീണ്ടകാലത്തെ പ്രവാസ ജീവിതത്തിനു ശേഷം മടങ്ങിയെത്തിയ നവാസ് പാകിസ്ഥാന്‍ മുസ്ലിം ലീഗ് പാര്‍ട്ടിയുടെ നേതൃത്വം ഏറ്റെടുക്കുകയായിരുന്നു. നവാസ് ഷെരീഫ് മൂന്നു തവണ പാകിസ്ഥാന്‍ പ്രധാനമന്ത്രിയായിട്ടുണ്ട്.ബേനസീര്‍ ഭൂട്ടോയുടെ മകന്‍ ബിലാവല്‍ ഭൂട്ടോയുടെ പാകിസ്ഥാന്‍ പീപ്പിള്‍സ് പാര്‍ട്ടി മത്സര രംഗത്തുണ്ടെങ്കിലും സൈന്യത്തിന്റെ പിന്തുണ നവാസ് ഷെരീഫിനാണ്.