ഗസ്സ വെടിനിര്‍ത്തല്‍ -ബന്ദി മോചന ചര്‍ച്ചകള്‍ക്കായി എത്തിയ യു.എസ് വിദേശകാര്യ സെക്രട്ടറി ആന്റണി ബ്ലിങ്കന്‍ നാലു ദിവസത്തെ പശ്ചിമേഷ്യന്‍ സന്ദര്‍ശനം കഴിഞ്ഞ് മടങ്ങി.

വെടിനിര്‍ത്തല്‍ നിര്‍ദേശം അംഗീകരിപ്പിക്കാനായി ഇസ്രായേല്‍ പ്രധാനമന്ത്രി ബിന്യമിന്‍ നെതന്യാഹുവിന് മേല്‍ സമ്മര്‍ദം ചെലുത്തല്‍ സന്ദര്‍ശന ലക്ഷ്യമായി യു.എസ് മാധ്യമങ്ങള്‍ റിപ്പോര്‍ട്ട് ചെയ്തിട്ടുണ്ടായിരുന്നു. എന്നാല്‍, പൂര്‍ണ വിജയം നേടാതെ യുദ്ധം നിര്‍ത്തില്ലെന്ന് നെതന്യാഹു പ്രഖ്യാപിച്ചത് ബ്ലിങ്കന് മുഖത്തേറ്റ അടിയായാണ് മാധ്യമങ്ങള്‍ വിലയിരുത്തുന്നത്.

സൗദി, ഖത്തര്‍, ഈജിപ്ത് സന്ദര്‍ശന ശേഷം അദ്ദേഹം ഇസ്രായേലില്‍ എത്തിയ ദിവസമാണ് നെതന്യാഹു വാര്‍ത്തസമ്മേളനം നടത്തി എല്ലാ മധ്യസ്ഥശ്രമങ്ങളും തള്ളിയത്. നെതന്യാഹുവിന്റെ കടുംപിടിത്തം യു.എസും ഇസ്രായേലും തമ്മിലുള്ള ബന്ധത്തില്‍ വരെ വിള്ളലുണ്ടാക്കിയതായി രാഷ്ട്രീയ നിരീക്ഷകര്‍ പറയുന്നു. ഗസ്സ യുദ്ധത്തിന്റെ തുടക്കം മുതല്‍ ഇസ്രായേലിന് പൂര്‍ണ പിന്തുണയും സൈനിക-സാമ്പത്തിക സഹായവും നല്‍കിയ സഖ്യകക്ഷിയാണ് അമേരിക്ക. എന്നാല്‍, സംഘര്‍ഷം എങ്ങനെയെങ്കിലും അവസാനിപ്പിക്കണമെന്ന് യു.എസ് ഇപ്പോള്‍ കരുതുന്നു. ബന്ദി മോചനത്തിനായി വിട്ടുവീഴ്ച ചെയ്യണമെന്ന് ഇസ്രായേലിനകത്തും അഭിപ്രായമുണ്ട്. എന്നാല്‍, തീവ്രവലതുപക്ഷത്തിന്റെ പിന്തുണയോടെ ഭരിക്കുന്ന നെതന്യാഹുവിന് വിട്ടുവീഴ്ചക്ക് കഴിയില്ല. യുദ്ധം അവസാനിച്ചാല്‍ അദ്ദേഹത്തിന് ഭരണം വിട്ടൊഴിയേണ്ടി വരുമെന്ന് സ്ഥിതിയാണുള്ളത്.