മോസ്കോയിലെ കണ്സേര്ട്ട് ഹാളിലുണ്ടായ ആക്രമണത്തെ അപലപിച്ച് റഷ്യന് പ്രസിഡന്റ് വ്ളാഡിമിര് പുടിന്
മോസ്കോയിലെ കണ്സേര്ട്ട് ഹാളിലുണ്ടായ ആക്രമണത്തെ അപലപിച്ച് റഷ്യന് പ്രസിഡന്റ് വ്ളാഡിമിര് പുടിന്. ഇതോടൊപ്പം ദേശീയ ദുഃഖാചരണവും പ്രഖ്യാപിച്ചു. ക്രോക്കസ് സിറ്റി ഹാളില് നടന്ന ഭീകരാക്രമണത്തിന് നിരവധി നിരപരാധികള് ഇരകളായെന്ന് അദ്ദേഹം പ്രസംഗത്തില് പറഞ്ഞു. ആക്രമണത്തിന് ഇരയായവരുടെ ജീവന് രക്ഷിക്കാന് ഡോക്ടര് സാദ്ധ്യമായതെല്ലാം ചെയ്യുമെന്നും പുടിന് കൂട്ടിച്ചേര്ത്തു.
ഈ ആക്രമണത്തിന് പിന്നില് ആരായാലും അവരെ വെറുതെ വിടില്ലെന്ന് താന് സത്യം ചെയ്യുന്നുവെന്നും തോക്കുധാരികള് യുക്രെയ്നിലേക്ക് രക്ഷപ്പെടാന് ശ്രമിച്ചതായും അദ്ദേഹം അവകാശപ്പെട്ടു. മോസ്കോയുടെ ഹൃദയ ഭാഗത്ത് സ്ഥിതി ചെയ്യുന്ന ക്രോക്കസ് സിറ്റി ഹാളില് നടന്ന സംഗീത പരിപാടിക്കിടെ ഇരച്ചെത്തിയ അഞ്ചംഗ മുഖംമൂടി സംഘം സംഗീത ആസ്വാദകര്ക്കെതിരെ തലങ്ങും വിലങ്ങും നിറയൊഴിക്കുകയായിരുന്നു.
ഐഎസ്ഐഎസ് ഉത്തരവാദിത്തം ഏറ്റെടുത്തു.വെടിവെപ്പിന്റെയും ബോംബ് സ്ഫോടനത്തിന്റെയും ഉത്തരവാദിത്തം ഭീകര സംഘടനയായ ഇസ്ലാമിക് സ്റ്റേറ്റ് ഓഫ് സിറിയ ആന്ഡ് ഇറാഖ് (ഐഎസ്ഐഎസ്) ഏറ്റെടുത്തിരുന്നു. ഈ ഭീകരാക്രമണത്തില് 115 പേര് കൊല്ലപ്പെടുകയും 145 പേര്ക്ക് പരിക്കേല്ക്കുകയും ചെയ്തു. 'റഷ്യന് തലസ്ഥാനമായ മോസ്കോയുടെ പ്രാന്തപ്രദേശത്തുള്ള ക്രോക്കസ് കണ്സേര്ട്ട് ഹാള് ഞങ്ങളുടെ പോരാളികള് ആക്രമിച്ചു' എന്ന് ഐസിസ് അതിന്റെ ടെലിഗ്രാം ചാനലില് ഒരു പ്രസ്താവന ഇറക്കി.
ആക്രമണകാരികള് സുരക്ഷിതമായി തങ്ങളുടെ താവളങ്ങളിലേക്ക് മടങ്ങിയതായും ഐഎസ് പ്രസ്താവനയില് പറയുന്നു. ആറായിരംപേരോളം വെടിവെപ്പ് നടക്കുമ്പോള് സംഭവസ്ഥലത്തുണ്ടായിരുന്നു. ഭീകരാക്രമണത്തെത്തുടര്ന്ന് ആഴ്ചയവസാനം നടക്കാനിരുന്ന എല്ലാ പരിപാടികളും റദ്ദാക്കിയിട്ടുണ്ട്. ഒരു പതിറ്റാണ്ടിനിടെ മോസ്കോയിലുണ്ടായ ഏറ്റവും മാരകമായ ആക്രമണമായിരുന്നു കഴിഞ്ഞ രാത്രിയില് അരങ്ങേറിയത്.
https://www.facebook.com/Malayalivartha
