ഇന്ന് രാവിലെ എക്‌സ്ട്രാ ടൈം വരെ നീണ്ട പോരാട്ടത്തിനൊടുവില്‍ ഒന്നിനെതിരെ മൂന്ന് ഗോളുകള്‍ക്കാണ് അര്‍ജന്റീന സ്വിറ്റ്‌സര്‍ലാന്‍ഡിനെ തകര്‍ത്ത് സെമിയില്‍ പ്രവേശിച്ചത്. പിന്നാലെ കേരളത്തിലെ പല പ്രദേശങ്ങളിലും വിജയാഘോഷങ്ങള്‍ നടന്നിരുന്നു.

കോഴിക്കോട് അര്‍ജന്റീനയുടെ വിജയം ആഘോഷിക്കുന്നതിന്റെ ഭാഗമായി പടക്കം പൊട്ടിച്ച യുവാവിന്റെ വിരലുകള്‍ അറ്റുപോയി. ചക്കുംകടവ് സ്വദേശി മുഹമ്മദ് സഹദിനാണ് (22) പരിക്കേറ്റത്. അബദ്ധത്തില്‍ പടക്കം കൈയില്‍ വച്ച് പൊട്ടുകയായിരുന്നു. യുവാവിനെ സ്വകാര്യ ആശുപത്രിയില്‍ പ്രവേശിപ്പിച്ചു.

സഹദിന്റെ ഇടത്തേ കൈയിലെ രണ്ട് വിരലുകളാണ് അറ്റുപോയത്. ചെറുവിരലും മോതിരവിരലും പൂര്‍ണമായും നടുവിരലിന്റെ പകുതിയും നഷ്ടമായി. യുവാവിന്റെ ഇടത് കൈയിലും വലത് കൈയിലും പടക്കം ഉണ്ടായിരുന്നു. വലതുകൈയിലെ പടക്കം പൊട്ടിച്ച് എറിയുന്നതിനിടെ ഇടതുകൈയിലെ പടക്കത്തിന് തീപിടിച്ച് പൊട്ടുകയായിരുന്നു.