ഗാസ മുനമ്പിലെ പലസ്തീന്‍ തീവ്രവാദി ഗ്രൂപ്പായ ഹിസ്ബുള്ളയുടെ സഖ്യകക്ഷിയായ ഹമാസിനെ ഉന്മൂലനം ചെയ്യാനുള്ള ഇസ്രായേലിന്റെ ശ്രമങ്ങള്‍ കഴിഞ്ഞ എട്ടുമാസമായി തുടരുകയാണ് . ഇതിനൊപ്പമാണ് ഇപ്പോള്‍ ഇറാനും ഹിസ്ബുല്ലയും യുദ്ധ രംഗത്തേയ്ക്ക് എത്തിയിരിക്കുന്നത് എട്ട് മാസത്തിലേറെ നീണ്ടുനിന്ന സംഘര്‍ഷത്തിന് ശേഷം സമ്പൂര്‍ണ യുദ്ധഭീഷണി മുഴക്കി ഇസ്രായേലും ലെബനന്‍ തീവ്രവാദി സംഘടനയായ ഹിസ്ബുള്ളയും. യുദ്ധം പൊട്ടിപ്പുറപ്പെട്ടാല്‍, ഗാസ മുനമ്പില്‍ ഹമാസില്‍ നിന്ന് നേരിടേണ്ടി വന്നതിനേക്കാള്‍ ശക്തമായ ശത്രുവിനെയാണ് ലെബനനില്‍ ഇസ്രായേലിന് നേരിടേണ്ടിവരുക എന്നും ഹിസ്ബുള്ള തലവന്‍ വെല്ലുവിളിച്ചിരുന്നു .

ബെയ്‌റൂട്ട് മുതല്‍ തെക്കന്‍ ലെബനന്‍ വരെ നൂറുകണക്കിന് കിലോമീറ്റര്‍ നീളമുള്ള തുരങ്കങ്ങളുടെ ശൃംഖലയാണ് ഹിസ്ബുള്ള ഭീകരസംഘം കുഴച്ചിട്ടുള്ളത്. തെക്കന്‍ ലെബനനില്‍ നിന്ന് വടക്കന്‍ ഇസ്രായേലിലേക്ക് ഹിസ്ബുള്ള കുഴിച്ച തുരങ്കങ്ങള്‍ കണ്ടെത്തി നശിപ്പിക്കാനുള്ള ശ്രമത്തില്‍ ഐഡിഎഫ് 2018 ഡിസംബറിനും 2019 ജനുവരിക്കും ഇടയില്‍ ഓപ്പറേഷന്‍ നോര്‍ത്തേണ്‍ ഷീല്‍ഡ് നടത്തിയിരുന്നു .വടക്കന്‍ ഇസ്രായേലിലെ സൈനിക, സിവിലിയന്‍ ലക്ഷ്യങ്ങളിലേക്ക് നുഴഞ്ഞുകയറ്റ ആക്രമണം നടത്താന്‍ ആയിരക്കണക്കിന് ഹിസ്ബുള്ള ഭീകരരെ പ്രാപ്തരാക്കുക എന്ന പ്രത്യേക ലക്ഷ്യത്തോടെയാണ് ആറ് തുരങ്കങ്ങള്‍ നിര്‍മ്മിച്ചതെന്ന് ഐഡിഎഫ് പറഞ്ഞു. മിഡില്‍ ഈസ്റ്റിലെ ഏറ്റവും തന്ത്രപ്രധാനമായ അതിര്‍ത്തി ഇസ്രായേലിനും ലെബനനും ഇടയിലാണ്. കഴിഞ്ഞ എട്ടുമാസമായി നിരന്തരം പ്രക്ഷുബ്ദമേഖലയാണ് ഇവിടെ. ഹമാസ് ഹിസ്ബുള്ള തീവ്രവാദികളെ വേരോടെ പിഴുതെറിയുന്നതിനോടൊപ്പം ബന്ദി മോചനവും ഒക്‌ടോബര്‍ ആദ്യം യുദ്ധം ആരംഭിച്ചതിനുശേഷം വടക്കന്‍ പ്രദേശങ്ങളില്‍ നിന്ന് ഒഴിഞ്ഞുപോയ 90,000 ഇസ്രായേലികളെ തിരികെ കൊണ്ടുവരിക എന്നതുമാണ് ലക്ഷ്യമെന്ന് നെതന്യാഹു ആവര്‍ത്തിക്കുന്നു.

ഇറാന്റെ പിന്തുണയുള്ള സായുധ ഗ്രൂപ്പുകളാണ് ഹിസ്ബുള്ളയ്ക്ക് സഹായം നല്‍കുന്നത് . ലെബനനെതിരെ ഇസ്രായേല്‍ നടത്തുന്ന ഏത് സൈനിക നടപടിയെയും നേരിടുക എന്നതില്‍ ഹമാസ്, ഹിസ്ബുള്ള, ഹൂത്തികള്‍ കൂട്ടുകെട്ട് പ്രതിജ്ഞാബദ്ധമാണ് . ഇറാനും സിറിയയും ഹമാസും ചേര്‍ന്നുള്ള സഖ്യം ഇസ്രായേലിനെതിരെ 'പ്രതിരോധത്തിന്റെ അച്ചുതണ്ട്' തീര്‍ക്കുമ്പോള്‍ ഗാസയ്‌ക്കെതിരായ ഇസ്രായേലിന്റെ യുദ്ധം മിഡില്‍ ഈസ്റ്റില്‍ പിരിമുറുക്കങ്ങള്‍ സൃഷ്ടിക്കുമെന്ന് മാത്രമല്ല അമേരിക്ക ഉള്‍പ്പെടെയുള്ള മറ്റ് രാജ്യങ്ങളെ ഈ പോരാട്ടത്തിലേക്ക് വലിച്ചിഴയ്ക്കുകയും ചെയ്യും. ഇറാഖിലെ ഷിയാ മിലിഷ്യകളും യെമനിലെ ഹൂത്തി സേനയും പോലെ മേഖലയിലെ ഇറാന്റെ പിന്തുണയുള്ള മറ്റ് സേനകളുമായും ഹിസ്ബുള്ള സഖ്യത്തിലാണ്. ഒക്ടോബര്‍ 7 മുതല്‍ , ഹിസ്ബുള്ള ഇസ്രായേലിന്റെ വടക്കന്‍ അതിര്‍ത്തികളില്‍ സാനിധ്യവും സജീവമാക്കി.

വര്‍ഷങ്ങളോളം, ലെബനന്റെ തെക്കന്‍ ഭാഗം ഒരു ബഫര്‍ സോണായി ഇസ്രായേല്‍ കൈവശപ്പെടുത്തിയിരുന്നതാണ് . ലെബനനിലെ ആഭ്യന്തര യുദ്ധകാലത്ത് 1982 ല്‍ സ്ഥാപിതമായ ഹിസ്ബുള്ളയുടെ പ്രാഥമിക ലക്ഷ്യം തെക്കന്‍ ലെബനനിലെ ഇസ്രായേലിന്റെ അധിനിവേശം അവസാനിപ്പിക്കുക എന്നതായിരുന്നു. 2000 ല്‍ അത് നേടുകയും ചെയ്തു. ഇറാനിയന്‍ പിന്തുണയുള്ള വിഭാഗങ്ങളുടെയും സര്‍ക്കാരുകളുടെയും ഒരു ശേഖരത്തിന്റെ ഭാഗമാണ് ഷിയാ മുസ്‌ലിം ഹിസ്ബുള്ള. പൊളിറ്റിക്കല്‍ ഇസ്‌ലാമിസത്തിന്റെ ബ്രാന്‍ഡ് വളര്‍ത്താനുള്ള മാര്‍ഗമായി ഇറാന്‍ പിന്തുണയ്ക്കുകയും ഉപയോഗിക്കുകയും ചെയ്ത ആദ്യത്തെ ഗ്രൂപ്പാണിത്. 25,000ലധികം മുഴുവന്‍ സമയ പോരാളികളും ഏകദേശം 30,000 റിസര്‍വിസ്റ്റുകളും (ജെയ്ന്‍ 2017) 800 മില്യണ്‍ ഡോളറില്‍ കൂടുതലുള്ള സൈനിക ബജറ്റുള്ള കേഡര്‍ ശക്തിയുള്ള ലെബനനിലെ ദേശീയ സൈന്യത്തേക്കാള്‍ വളരെ ഉയര്‍ന്ന ശക്തിയായി ഇത് പരക്കെ കണക്കാക്കപ്പെടുന്നു. ഹിസ്ബുള്ള ഒരു പ്രാദേശിക ശക്തിയായി വളര്‍ന്നതോടെ അതിന്റെ സ്വാധീനം സിറിയ, ഇറാഖ്, യെമന്‍ എന്നിവിടങ്ങളിലേക്കും വ്യാപിച്ചു.

ഇസ്രായേല്‍ തങ്ങളുടെ ശ്രദ്ധ മുഴുവനും ഹിസ്ബുല്ലയുടെ പ്രവര്‍ത്തനങ്ങളെ നിരീക്ഷിക്കുന്നതില്‍ കേന്ദ്രീകരിച്ചതിനാല്‍ ആണ് തെക്കന്‍ ഗാസ മുനമ്പില്‍ നിന്ന് ഉള്ള ഹമാസിന്റെ നുഴഞ്ഞുകയറ്റത്തിന്റെ സൂചനകള്‍ ഇസ്രായേല്‍ സൈന്യത്തിനു ലഭിക്കാതെ പോയതും. തന്റെ ഗ്രൂപ്പിന് പുതിയ ആയുധങ്ങളും കഴിവുകളും ഉണ്ടെന്ന് ഹിസ്ബുള്ള സ്ഥാപക നേതാവ് ഹസന്‍ നസ്‌റല്ല കഴിഞ്ഞ ആഴ്ച ഇസ്രായേലിന് മുന്നറിയിപ്പ് നല്‍കിയിരുന്നു. 1960 ല്‍ ബെയ്‌റൂട്ട് പ്രാന്തപ്രദേശമായ ബൂര്‍ജ് ഹമ്മൂദിലെ ഒരു ദരിദ്ര ഷിയ കുടുംബത്തില്‍ ജനിച്ച നസ്‌റല്ല, പിന്നീട് തെക്കന്‍ ലെബനനിലേക്ക് കുടിയേറി. പിന്നീട് ദൈവശാസ്ത്രം പഠിക്കുകയും ഹിസ്ബുള്ളയുടെ സ്ഥാപകരിലൊരാളാകുന്നതിന് മുമ്പ് ഷിയാ രാഷ്ട്രീയ, അര്‍ദ്ധസൈനിക സംഘടനയായ അമല്‍ പ്രസ്ഥാനത്തില്‍ ചേരുകയും ചെയ്തു. തന്റെ മുന്‍ഗാമി ഇസ്രായേല്‍ ആക്രമണത്തില്‍ കൊല്ലപ്പെട്ടതിനെത്തുടര്‍ന്ന് 1992 ല്‍ ഹിസ്ബുള്ളയുടെ നേതാവായി. ഇസ്രയേലിനെ ഭയന്ന് വര്‍ഷങ്ങളായി ഒളിവില്‍ കഴിയുന്ന നസ്‌റല്ല അജ്ഞാത കേന്ദ്രങ്ങളില്‍ നിന്നാണ് പ്രസംഗങ്ങള്‍ തയ്യാറാക്കി പുറത്തുവിടുന്നത്. എന്ത് വില കൊടുത്തും നസ്‌റല്ലയെ ഒളിത്താവളത്തില്‍ നിന്ന് പുറത്തെത്തിക്കാനുള്ള ശ്രമത്തിലാണ് ഇസ്രായേല്‍.