ഇംഗ്ലണ്ടിലെ ബെര്‍ക്ക്‌ഷെയര്‍ കൗണ്ടിയിലെ മെയ്ഡന്‍ഹെഡിയിലെ റീഡിംഗ് ക്രൗണ്‍ കോടതിയാണ് 37കാരിയായ ഇന്ത്യന്‍ വംശജയ്ക്ക് മാനസികാസ്വാസ്ഥ്യത്തിനുള്ള ചികിത്സ ലഭ്യമാക്കണമെന്ന് കോടതി. നാല് വയസുള്ള മകനെ ക്രൂരമായി കുത്തിക്കൊന്ന ശേഷം ആത്മഹത്യയ്ക്ക് ശ്രമിച്ച ഇന്ത്യന്‍ വംശജയായ ഇന്‍ഫ്‌ലുവന്‍സര്‍ക്കാണ് മാനസികാരോഗ്യ ചികിത്സ ലഭ്യമാക്കണമെന്ന് കോടതി ഉത്തരവിട്ടിരിക്കുന്നത്.

കഴിഞ്ഞ ആഴ്ചയാണ് യുവതിക്കെതിരായ വിചാരണയില്‍ കൊലപാതക കുറ്റം തെളിഞ്ഞത്. ആകാംന്‍ക്ഷ ആദിവരേക്കര്‍ എന്ന 37കാരി നാല് വയസ് പ്രായമുള്ള മകനെ 11 ലേറെ തവണ കുത്തിയാണ് കൊലപ്പെടുത്തിയത്. ഇന്ത്യയില്‍ വച്ച് തന്നെ ആകാംന്‍ഷ ആദിവരേക്കറിന് ബൈ പോളാര്‍ ഡിസോഡര്‍ ഉള്ളതായി കണ്ടെത്തിയിരുന്നു. യുകെയിലേക്ക് കുടിയേറുന്നതിനുമുമ്പ് മുംബൈയില്‍ ദന്തരോഗവിദഗ്ദ്ധയായി ജോലി ചെയ്തിരുന്ന ആകാംന്‍ക്ഷ ജോലിസ്ഥലത്തെ പ്രശ്‌നങ്ങളെ തുടര്‍ന്ന് രാജി വയ്ക്കുകയായിരുന്നു.

വിവാഹത്തിന് ശേഷം ബ്രിട്ടനിലേക്ക് എത്തിയ ശേഷവും വിഷാദത്തിനും അമിതമായ ഉത്കണ്ഠയ്ക്കും ചികിത്സ തേടിയിരുന്നു. എന്നാല്‍ തുടര്‍ ചികിത്സകളില്‍ യുവതിക്ക് വലിയ രീതിയിലുള്ള മാറ്റങ്ങള്‍ കണ്ടിരുന്നു. മകനും ഭര്‍ത്താവുമടങ്ങിയ കുടുംബത്തോടൊപ്പം യുവതിയെ ഏറെ സന്തോഷത്തോടെയാണ് കാണാന്‍ സാധിച്ചതെന്നും പ്രോസിക്യൂട്ടര്‍ പ്രതികരിച്ചു. ആകാംന്‍ക്ഷയ്ക്ക് ചികിത്സ ലഭ്യമാക്കണമെന്ന് ഐടി ജീവനക്കാരനായ ഭര്‍ത്താവ് കോടതിയില്‍ ആവശ്യപ്പെട്ടിരുന്നു.

ജൂണ്‍ 10നാണ് കേസിന് ആസ്പദമായ കൊലപാതകം നടക്കുന്നത്. മകന്‍ അഗസ്ത്യ ഹെഗിഷ്‌തെയെ കഴുത്തില്‍ 11 തവണ കുത്തിയാണ് ആകാംന്‍ക്ഷ ആദിവരേക്കര്‍ കൊലപ്പെടുത്തിയത്. ആത്മഹത്യാശ്രമം പരാജയപ്പെട്ടതോടെ ഇവര്‍ കമ്മ്യൂണിറ്റി ഹോസ്പിറ്റലിലെത്തി താന്‍ മകനെ കൊന്നുവെന്ന് ഡോക്ടര്‍മാരോട് പറഞ്ഞതോടെയാണ് സംഭവം പുറത്ത് അറിയുന്നത്. ജൂണ്‍ 10ന് നാട്ടിലേക്ക് തന്നെ കൂട്ടാതെ പോകുമോയെന്നും വിവാഹ മോചനം നേടിയാല്‍ കുട്ടിയുടെ അവകാശം ആര്‍ക്ക് ആയിരിക്കുമെന്ന് ആകാംന്‍ക്ഷ ഭര്‍ത്താവിനോട് ചോദിച്ചിരുന്നു. തീര്‍ത്തും ദുരന്തപൂര്‍ണമായ സംഭവമാണ് നടന്നതെന്ന് വിലയിരുത്തിയ കോടതി, യുവതിക്ക് ശിക്ഷയല്ല ചികിത്സയാണ് വേണ്ടതെന്ന് കോടതി വിശദമാക്കിയത്.

കുടുംബത്തിന്റെ അഗാധമായ ദുഖത്തില്‍ പങ്കുചേരുന്നുവെന്ന് വിശദമാക്കിയ ശേഷമാണ് മാനസിക വിഭ്രാന്തിയാണ് കൃത്യത്തിന് കാരണമെന്നും ചികിത്സയാണ് വേണ്ടതെന്നുമാണ് റീഡിംഗ് ക്രൗണ്‍ കോടതി ജഡ്ജി ഗ്രീവ് വിശദമാക്കിയത്. ആകാംന്‍ക്ഷയ്ക്ക് ചികിത്സ ലഭ്യമാക്കണമെന്ന് ഐടി ജീവനക്കാരനായ ഭര്‍ത്താവ് കോടതിയില്‍ ആവശ്യപ്പെട്ടിരുന്നു.

ഫൗണ്ടന്‍ പേനകളുടെ ചിത്രങ്ങള്‍ പങ്കുവച്ച് 'പെന്‍ഫ്‌ലുവന്‍സര്‍' എന്ന നിലയില്‍ ശ്രദ്ധ നേടിയ വ്യക്തിയാണ് യുവതി. ഓക്‌സ്‌ഫോര്‍ഡ്‌ഷെയറിലെ ലിറ്റില്‍മോര്‍ മാനസികാരോഗ്യ കേന്ദ്രത്തിലെ ജീവനക്കാരുടെ നിരീക്ഷണത്തിലാണ് 37കാരിയുള്ളത്. നീതിന്യായ മന്ത്രാലയത്തിന്റെയോ മാനസികാരോഗ്യ ട്രൈബ്യൂണലിന്റെയോ അനുമതിയോടെ മാത്രമാകും യുവതിയെ ആശുപത്രിയില്‍ നിന്ന് മോചിപ്പിക്കുകയെന്നും കോടതി വ്യക്തമാക്കി.